#__وتين__🍃
🌷الحلقة 42🌷
ترررن ترررن 📱
تسنيم كانت راقدة وفاقت علي صوت تلفونها يرن : الو😪
قيس : ااا انتي...ماوقفتش الدنيا عليييييك فف فاهمة مم ماوقفتش عليييك
تسنيم : قيييس خيرك😮 خيره صوتك هكي
قيس : اششش مم ماتدويييش ربي يااااخد فيك الحق
تسنيم : انت سكران 😦
قيس : مم مادخلكش فيااا ااني صص صاحي وفف فاهم ششن نقول...عل عل علااااش هكي اديري علاااش ااني الحماااار اللي ح حبيتك اني ال...
تسنيم :😨صوت كلاكس انت تسوووق
قيس : هه😏 شش شني خايفة عليا متلا....كانك خخ خايفة ماوصلتينيش للحالة هادي....اني نحبك علاش نحبك فهميييينييي علاش نحبك زي الغبي زي الحماااار وانتي اصلا ماتستاهليش حبي ياظالمة
~~
~~
ترررن ترررن📱
كنت ساهرة نقرا شفت لقيت تسنيم تتصل نصدمت من مكالمتها ومابيتش نرد لكن استغربت شن اللي خلاها تتصل ف هالوقت
_________________________________________
تسنيم : ردي ضروري...
_________________________________________
~~
وعاودت اتصلت مرة تانية
اني : الو
تسنيم : اسفة ع الازعاج
اني : نعم 😒
تسنيم : اا كلمني قيس توا وصوته سكران
اني : قيس سكران😮
تسنيم : مش اهني المشكلة....المشكله انه يسوق وهوا مايندريش علي روحه...مش عارفة علاش اتصلت بيك لكن معاش عرفت كيف نتصرف 😢
اني : واني شن بندير توا
تسنيم : مش عارفة...خايفة يدير حادث
اني : المشكلة الوقت متأخر هلبا
تسنيم : قولي لخوك نادر مرات يمشيله
اني : ولما يسألني شن عرفك...
تسنيم : اي صح...به كلمي سراج ع الاقل لو حكيتيله القصة عادي
اني : سس سراج
تسنيم : اي بسرعة شن تستني لين نسمعو بيه ف المستشفى 😣
اني : به سكري تو نكلمه
~~
اني : راقد
سراج : اي 😪..
اني : سوري ع الازعاج
سراج : لالا عادي
اني : بنقولك علي موضوع
سراج : انشالله خير
اني : قيس......وحكيتله
سراج : ومن قالك وكيف عرفتي
اني : غر توا حلها وبعدين نحكيلك كل شي
سراج : به ماتعرفيش وين هوا ؟؟
اني : تؤتؤ
سراج : غر سكري توا
~~
ترررن ترررن 📱
قيس شاف وحط التلفون ماباش يرد وعاود سراج مرة واتنين وتلاته وماباش يرد
_________________________________________
سراج : قيس رد بسرعة في موضوع ضروري ضروري
_________________________________________
~~
ماباش قيس يرد...
كان قيس يسوق والسيارة تمشي بالشوية وتتحرك ايمين وايسار ولحسن الحظ كانت الطريق فاضية بعدين قيس وقف السيارة وقعد يخبط ع الدومان ويبكي : ااااه ياربي علاااش هكي ياااااربي💔 كرررهت رووحي وكرهت عييشتي...كرهت الناااس كلهم الا هياااااا علااااش علاااش
خطمت سيارة فيها شيباني كبير ف العمر وقف ونزلل
الشيباني: تبي مساعدة ولدي ....اني حوشي قريب
قيس عيونه حمر ومعبيات دموع : مانبي ش شي...اا اني تعباااان تت تعبااااان
الشيباني عرفه سكران قعد واقف معاش عرف كيف يتصرف...شوية وسراج عاود اتصل
قيس شاف للتلفون : شش شووف كك كلهم يتصلو بيااا الا هياا هيااا قلبها اس اس اسوود نكرهااا
الشيباني قعد يضحك : والله شكلك وليد حلال ونيتك صافية
عاود سراج اتصل خدي الشيباني التلفون ورد
سراج : الوو
الشيباني: ايوا
سراج: تلفون قيس ولالا 😕
الشيباني: اا والله مانعرف...اني ياولدي لقيت مولا التلفون مدرس سيارته اهني
سراج : سيارة بيضا ؟؟
الشيباني: ايوا
سراج يسمع ف قيس يتكلم : سكران هوا شكله؟؟
الشيباني: اي ياولدي..انت خوه
سراج : اني ولد عمه...وين انت توا
الشيباني: اني في ### توا الوقت تأخر تو ندخله يبات ف حوشي والصباح رباح ياولدي
سراج : انت حوشك قريب من غادي
الشيباني: اي حوشي اهني...خلاص كون مطمن
~~
~~
سراج : اي رد عليا شيباني
اني : به اللي ماقلبش السيارة ولا دار حادث
سراج : من قالك هوا يسوق ومن قالك اصلا انه سكران
اني : قصة طويلة
سراج : احكي نسمع فيك
اني : هوا يحب بنت و...
سراج قص علي كلامي: وسكران علي خاطرها وطبعا متصل بيها هوا توا 😂 شن اسمها ليلى
اني :😂😂 لا مع الاسف ماحالفش الحظ اسمها مش ليلى
سراج : به وانتي من وين تعرفيها
اني : ااا هه هي صاحبتي😶
سراج : شورا كل واحد ف العيلة بتطلع وحدة من صاحباتك تحبه
اني : قيس يحبها لكن هيا تحبك انت
سراج نصدم : قصدك نفسها
اني : اي شفت الصدفه
سراج : ومن وين يعرفها قيس
اني : متلاقيين اكتر من مرة وبعدين هدرزو فترة طويلة مع بعض
سراج : اها...وانتي وياها تتكلمو عادي بعد اللي صار
اني : قصدك بعد اللي درته انت 😏
سراج : اي بعد اللي درته اني وانتي ماتنسيش 😑
اني :هده اول مرة تكلمني
سراج : تؤتؤتؤ.... قلبها اسود
اني : احتفظ بتعليقاتك لنفسك😊
سراج : قلبها اسود ومسمومة وقل لي من صاحبك اقول لك من انت
اني : اي واحني طنجرة ولقت غطاها😁
سراج : اني بعد اللي درتيه فيا وقاعد نكلم فيك...يعني قلبي مش ابيض قلبي شفاف
اني : هههههه...قصدك بجديات تشوف فيا قلبي اسود
سراج : مش عارف...
اني : مش عارف 😒
سراج : مزال ماغلطش بش نشوفك تسامحيني ولالا
اني : اولاً غلطت ولو ناسي ندكرك...تانيا اصحاب القلوب السودة مايحبوش 😒
سراج : دكريني ف شن غلطت معاك
اني : تسنيم خشت انتظار نكلمها ونعاودلك
سراج : بسرعة ماتعطليش عليا ❤
اني : هههه به ❤
~~
تسنيم : شن صار معاك
اني : خلاص الامور تمام
تسنيم : روح للحوش
اني : في ناس دخلوه لحوشهم...وهما ردو علي سراج
تسنيم : ااه...به تمام بري كملي حديثك معاه😒
اني : انتي مصرة تعاديني بجديات شكلك
تسنيم : لا لكن بنفهمك اني عرفت انكم علي علاقة
اني : به عادي...واني نفهمك اني عارفة ان رتاج حكتلك ومش هامني...لان لقيت روحي كان عاملت كويس مش ف خير وكان تعاملت مش كويس مش ف خير
تسنيم : لا علاش مش كويس...هده حياتك وانتي حرة فيها...واني مسحته من دماغي بكل
اني : اي واضح الشي هدا....والدليل خوفك علي قيس بالطريقة هده
تسنيم : ااا لالا لاقيس ولا غيره السريب هدا سكرته
اني : براحتك....لكن اللي داره فيك سراج انتي توا تردي فيه لقيس وبضوقيله نفس المرار اللي ضقتيه
تسنيم : شكرا ع النصيحة 😑
اني : ولو 😒
~~
اتصلت بسراج سكر وعاودلي🙈💗
سراج : اي وين كنا
اني : قتلي ندكرك ف شن غلطت
سراج : اي
اني : مع مطلب...مع تسنيم...انت وصلت بيك لدرجة تهدد فيا ياسراج
سراج : تمام...وعلاش درت هدا كله
اني : مش مهم علاش لكن المهم درت هكي وتوا اني ف عداوة مع اعز الناس ليا والسبب انت
سراج : هه 😏 اعز الناس علي اتفه سبب عاداتك وبعدين اني فهمتها انك علي خاطرها مابيتيش تكوني معاي يعني هيا مفروض تشكرك مش تعاديك
اني : المهم...غير الموضوع
سراج : شن مسهرك للوقت هدا
اني : كنت نقرا
سراج : اييي علينا..ماتعييش
اني : حسستني انك ماخشيتش جامعة وماقريتش
سراج : انتي مبالغة
اني : لا الطب هكي ويالا
سراج : به توا طيرتيلي النوم هي....فوتي قرايتك وقعمزي هدرزي عليا مادخليش فيك
اني : هههههه كان بودي نهدرز عليك...لكن اني زعلانة 😔
سراج : مني ؟؟
اني : اي
سراج : علاش
اني : علي عياطك عليا بكري
سراج : باهي وانتي شن تقوليلي سلملي علي مراد😡
اني : فيها عيب
سراج : اي مانسلملك علي حد...واصلا جو متع تهدرزي مع الولاد وتقعمزي معاهم مانحباش اني ره
اني : اني نهدرز مع الاولاد😮؟؟
سراج : قصدي حتى الكلام العادي...مدي ايدك خير خير وخلاص
اني : بالله...ننقطع ع الدنيا يعني
سراج : كان مالكلمتيهمش معناها نقطعتي ع الدنيا؟؟...
اني : سراج اني طول عمري فارضة احترامي ونعرف كيف نتصرف مع ولاد عمي وغيرهم
سراج : عارف يالونا...ولو انتي مش هكي ماكنتش حبيتك لكن اني مانحبش تهدرزي معاهم وتضحكي هكي خلي المعاملة جدية
اني : علاش
سراج : هكي
اني : كيف هكي...اعطيني سبب مقنع
سراج تكلم بأسلوب حاد: هكي ماتكلمي حد اني مانحبش هكي مايمشيش معاااي....عندك شخصين مسموحلك بيهم بوك وخوك وغيرهم ماتكلمي حد وماتهدرزي مع حد واهم شي ماتضحكي لحد😤
اني قعدت نضحك: خيرك انفعلت
سراج : لان شي يحرق الدم
اني : به كان حد قال حاجة اضحك...وماقدرتش نشد ضحكتي
سراج : ليااال😠
اني : 😂😂
°
•
°
•
°
☀️⛅
مراد : ماروحتش صاحبتك من امريكا
يارا : لالا...علاش تسأل 😒
مراد : سؤال عادي 😑
يارا : تحبني مراد
مراد : شن السؤال الغريب
يارا : وين الغرابة
مراد : شن خطر عليك تسألي توا
يارا : من لما خطبنا ماقلتليش كلمة نحبك
مراد : ياسر قلتهالك قبل لما نهدرزو ع المسنجر 😏
يارا : مستخصر تقولها ع الواقع
مراد : علاش انتي عمرك قلتيها
يارا : اي نقولك فيها...بالك انت مش مركز
مراد : في فرق بين تقوليلي حبيبي وبين نحبك
يارا : به اني نحبك
مراد : من قلبك😏
يارا : شن قصدك
مراد : بعد مارفضتيني المرة الاولى شن اللي خلاك توافقي لما خطبتك
يارا : في البداية اقتنعت بيك وعجبتني وتوا حبيتك
مراد في خاطره "واني العكس😑" : حبيتيني 😏
يارا: اي شني مش مصدق
مراد تنهد : مصدق
°
•
°
•
°
مؤيد : شريت حوش
مسرة : باهي مبروك 😑
مؤيد : الله يبارك فيك
مسرة : وين مكانه
مؤيد : في####.....جنب###
مسرة : حلوا الجيهة هديكا 💕....كيف شكله الحوش
مؤيد : تو نبعتلك صوره
مسرة : به
~~
~~
عبسي : حبيبتي
رنا : ايوا
عبسي : بنبدا نفرش الحوش...وضروري يكون كل شي علي دوقك ياعمري
رنا : حياتي انت😍...اي خطوة حلوة للحياة الجوزية
عبسي : شن رايك نرفعك يوم تشوفيه الحوش
رنا : ت ترفعني 😮
عبسي : اي حبيبتي...قصدي بش لما نأتتوه تبدي شايفتيه وتعرفي كل حاجة كيف تجي
رنا : تو نشوف
عبسي تمام
علا : هيا رنا اني واتية
رنا اشرتلها تبيها تسكت
رنا : حبيبي بنطلع اني ره
عبسي : وين
رنا : علا تبتت وهكي
عبسي : من بيرفعكم
رنا : ف سيارتي
عبسي : انتي وعلا بس
رنا : اي عبسي خيرك
عبسي : شي
°
•
°
•
°
مسرة فاتحة النت شافت لقت سراج فاتح " اونلاين" بعتتله
_________________________________________
مسرة : سيرجوو
_________________________________________
سراج : نعم
_________________________________________
مسرة : شن جوك
_________________________________________
سراج : باهي
_________________________________________
مسرة : شن مداير
_________________________________________
سراج : شي....شورك ديما ع الفيس لاضمان لا تطييب 😂
_________________________________________
مسرة : 😂 بالعكس نضم ونطيب
_________________________________________
سراج : ياودي ماضنيت
_________________________________________
مسرة : صح نطيب لكن الضمان و الحاجات هده مخليتها لليال حتى فراشي اضم فيه هيا😂
_________________________________________
سراج : ماك بايرا
_________________________________________
مسرة : لا مش بايرة لكن هيا موجودة علاش نتعب ف روحي 😌
_________________________________________
سراج : ولما تتجوزي مش دايمتلك ليال😏
_________________________________________
مسرة : نجيبها اضم...شغالة من غير فلوس😂
_________________________________________
سراج : مافي شي يضحك...
_________________________________________
مسرة نحرجت من رده : المهم غير الموضوع
_________________________________________
سراج : لالا ماتعبيش روحك وتفكري ف موضوع جديد عندي خدمة.....سلام
_________________________________________
مسرة : سلام
_________________________________________
~~
مسرة : ياودي خايفة منها اللي اسمها ليال هده
هيام : نحس فيه ساخف عليها وخلاص....ياغبية انتي مفروض اضاهرتي انك تحبيها وانها هيا اللي مادير ف شي وماضم ف شي
مسرة : حقاا😦
هيام : غبيييية للنم انتي
مسرة تنهدت : افففف😤
°
•
°
•
°
قيس: سامحوني ع الازعاج والله ماعارف كيف نشكركم
الشيباني : ولو ياولدي...والله عرفت انك وليد حلال ومليعاتك شكلها😂
قيس ضحك : شكلي رغيت هلبا واني سكران
الشيباني : ههههه عادي اني زي بوك انشالله ربي يجمعك بيها
قيس : انشالله...اني نستأدن اكيد العويلة انشغلو
العزوز : والغدي ياولدي
قيس : صحيتي ياحجة كأني كليت
~~
~~
ع سعاد : لتوااا تشغلني عليييك وقلبي علي نار😢
قيس حضنها: يام اهو جيت زي الجن مافيا شي
ع سعاد شمت ريحته : شن صنتك😒😡
قيس : ااا شش شي
ع سعاد: صنتك شرب ياقيس شرررررب😦 انت تشرب انت 😮
قيس تلخبط : ااا يام مش اني صحابي
امه قعدت تعيط : صحاااابك....صحاااابك لابسين حوايجك....تي ريحتك شرررب تكدب عليا ياولد بطني تكدب عليا😭كان يسمع بوك تجيه الجلطة 😭
قيس : تو شن يبكي فيك ياااام...اني مانيش هييييل افهموها الزززح مانيش عيل😠
ع سعاد: كلله ادير فيه هلي خاااطرها عارفاتك....غر كان تفهمني علاش ماتبينيش نخطبهااالك بسس
قيس يعيط من داره: اسي جد امه الموضووووع هده انسيييييه 😡
تررررن ترررن 📱
قيس شاف لقاها تسنيم ماباش يرد وبعتلها رسالة
_________________________________________
قيس : معاش ندكر شن اللي قلتهولك البارح لكن مش بوعيي اني اسف ع الازعاج سامحيني
_________________________________________
تسنيم : رد عليا بنكلمك
_________________________________________
قيس : مافيش دوا بينا....غلطت ومنك السماح
_________________________________________
°
•
°
•
°
🌒
رنا : رجيلاتي طاحو
فريال : شن شريتو ورونا
معتصم : ههههه سنتيااان 😂😂
علا خدت منه : هني روحك😡
رنا : شوفي هده ماما
فريال: شن اللون المشعشع هدا
علا : موضا ماما😑
رنا : سامي يحب اللون هدا😂😂
علا فنصت فيها
~~
_________________________________________
سراج : لونتي 💕
_________________________________________
~~
محلاااه ومحلا اسلوبه وكلامه وحنيته 💓
_________________________________________
اني : نعم 🙈💖
_________________________________________
سراج : وير ار يو
_________________________________________
اني : ان هوم
_________________________________________
سراج : اي ام كومينج تو يور هاوس
_________________________________________
اني : بجديات
_________________________________________
سراج : اي
_________________________________________
~~
ترررن ترررن 📱
اني : حقا بتجي
سراج : في الطريق
اني : انستنا....لكن لمن جاي
سراج : جايك انتي
اني : بجديااات😨
سراج يضحك: جاي لبوك ياعبيطة😂
اني : عبيطة😒
سراج : عبيطة وختشة....تبي نجيبلك معاي حاجة 💕
اني : لالا سلامتك 🙈💓
سراج : غر بجديات تبي حاجة
اني : لا والله سلامتك...🤗
سراج : غر ماتتحشميش😂
اني : لالا صحيت😂
سراج : اللي بيدير الباهية مايسألش ولالا؟؟😂
اني : 😂😂والله جو انت
~~
نادر : تعالي تسمسمي لينا ساعة انادو
اني : اللطف حتى جعانة طيرتلي النية من الماكلة
نادر: لونا ياحلو تعالي كولي 😁😒
اني : به
~~
ايناس : خايفة تجي توتي معانا الصفرة
اني : كنت نقرا
ايناس : سيبي اللي فيدك وانزلي
اني شبحتلها : الفطور درته اني الغدي درته اني الحمامات اني حكيتهم مناسك غيرتلها شمالها تلاته مرات وقفت علي العشي 😒
نادر : باهي لونا خيرك استاكيتي😂
اني غصرتني العبرة: لان شي يبغضض😢..؛ ونضت
بابا : تعالي كملي ماكلة😡
اني : شبعت💔
مسرة : التجكتير الزايد😒
نادر : تجكتير امك....قايمة الحوش فوق راسها وانتي موليا زي البقرة من التقعميز
ايناس : به احترم الصفرة اللي مقعمز عليها
نادر : احترمتيها انتي....الزح الماكلة خليتيها ف رقبتنا
بابا خبط بقوة : اسكتوووو جبتولي الضغط اسكتوووو....وانتي نوضي نادي اختك
مسرة : هدا ماناقص😏
بابا : نوضي قلت اني 😡
مسرة ناضت وخشت لدارها مابتش تجيني شوية وركبلي نادر
اني كنت حاطة السماعات ونسمع ف اغاني لانهم شبه الوسيلة اللي نلجألها لما نتعصب
نادر : ليال...
اني نحيت السماعات : هممم
نادر : نوضي كولي مركك
اني : نبيش
نادر : نوضي الزح
اني : والله مانبي 😢 ؛ ونضت بنخش للحمام بش مايشوفنيش نبكي...واني ماشية شدني وحضني
نادر : خلاص ماتعدليش ليوول 💔
اني قعدت نبكي
نادر : ياسر عاد
°
•
°
•
°
رتاج : به نفهم منك ان انتي وليال تتكلمو 😀
تسنيم : لا
رتاج : مركك...به وعلاش اليوم ماباش يرد عليك
تسنيم : مانعرفش
رتاج : به مدامك تحبيه قوليله وريحيني 😑
تسنيم : هوا بمجرد ماصديته المرة الاولى ماصدق...خيره ماعاودش وقالي نبيك مرة تانية
رتاج : اما ماصح وجهك وموقحك
تسنيم : اقلبي وجهك بنقرا
رتاج : اقعدي هكي ياوجه الزينقو😬
°
•
°
•
°
سراج : تمام الحمد لله والله
بابا : قلت نعطيك الامانة انت وتعطيهاله لان اني غدوا انشالله مسافر لتونس فهمت
سراج : اي اي عادي...ماشي سياحة ولا في حاجة
بابا : لا والله سياحة ماشي اني وايناس بس
نادر وشوش لسراج: شهر عسل
سراج وجهه احمر وشاد ضحكته
ايناس : شن الجو سيرجو
سراج : الحمد لله شن جوك انتي
ايناس : تمام
اني : السلام عليكم
سراج ابتسم لا اراديا لما خشيت
اني : شن الجو
سراج : تمام
طبعا مسرة ع الخط وتشبح لملامحه وملامحي وسراج مانحاش عيونه من لما خشيت لين قعمزت ومسرة مركزة عليه
ايناس : لونا حبيبتي زعلانة مني
اني شبحتلها : علي شني ولا شني
ايناس ملامح وجهها تغيرت : فيك الا تلقيح
بابا : تي نوضو ديرو قهوة
مسرة : تو انوض اني
اني نضت خشيت لداري..
_________________________________________
سراج : اسمعي
_________________________________________
اني : ايوا
_________________________________________
سراج : جايبلك حاجة لكن مش عارف كيف بنعطيهالك
_________________________________________
اني : حقاا💗
_________________________________________
سراج : كدبة
_________________________________________
اني : نقولك وين تحطها
_________________________________________
سراج : وين
_________________________________________ اني : حطها ف الجنان تحت الشجرة اللي جنب الباب وتو نطلع في الليل موخر ناخدها
_________________________________________
سراج : تمام
________________________________________
~~
روح سراج وخليتهم خشو رقدو وطلعت بالشوية ليقته حاطلي كيسة تحت الشجرة خديتها وركبت...
طبعا الكيسة كيووت تهبل وفيها سلة صغيرة من الخشب ومعبية مكسرات من جميع الانواع 🙈💕
اتصلت بيه
سراج : ايوا
اني : رقدت
سراج : تؤتؤ
اني : تهببببل السلة والكيسة واللي فصتهم 💗
سراج : حتى اللي بياكلهم يهببل
اني ابتسمت كان خاطري نقوله حتى اللي جابهم يهبل لكن تحشمت : شكرا 💕
سراج : ولو ❤
اني : شن ادير
سراج : كسوودي...قوية تلقيحتك لايناس بكري😂
اني : نعجبك 😉
سراج : اي عاجبتيني❤
اني :ههههه
سراج : دومات 😘...وانتي شن اديري
اني : ناكل ف مكسرات 🙈💓
سراج : هههه صحتين ❤
~~
~~
☀️⛅
ع سعاد : كيف حالكم باهيين
اني : كويسين عميمة كيف حالك انتي
مسرة : خشي عمتي
اني : تشربي قهوة ولا شاهي
ع سعاد : لا نبي قهوة لا شاهي...نبيك تنعتيني علي حوش صاحبتك هده نسمة ولا شن اسمها
اني : تسنيم 😮
ع سعاد : ايوا هيا هده...انعتيني حوشها بنتي..عمك يستنى برا
اني : اا علاش..
ع سعاد : ....
🌷يتبع🌷
600كومنت = حلقة جديدة العشية 😉
.
.
#__timOo__💕
