#__وتين__🍃
🌷الحلقة 83🌷
وبعدين طلعوها يارا ومروحين بيها وكيف بتركب ف السيارة شبحت مراد واقف مع الولاد
يارا بينها وبين نفسها " الدنيا نصيبات " وركبت ومشت
~~
والله حق الدنيا نصيبات من قال مراد يحب صاحبة يارا بعد ماكان حيتجوز يارا وكانت هاليلة حتكون ليه هو...هو مش مأثر فيه الموضوع وقلبه وعقله مع ميرا لكن يارا...💔
ورغم ان رنا متجوزة ليها مدة وعلا تجوزت اليوم لكن القدر رايد انهم يدخلو ف نفس الليلة...
سبحان الله قد مالانسان يقرر ويخطط لكن اللي كاتبه القدر ح يصير...
من قال ان يجي يوم وبابا يرجع يحب ماما من جديد وترجعله المشاعر بعد سنين...ولو بنشوف للواقع هو ماحبهاش زمان بكل وكان عقله مع ايناس بس القدر راد انه يحبها توا 💔والقدر راد انها ترفضه.....والقدر راد انه قلبه ينكسر زي ماكسرلها قلبها...
°
•
°
•
°
مع الساعة 3 في الليل كنا مقعمزين في الخيمة بنات وولاد ونهدرزو وطبعا النساوين الكبار داخل وشبه كلهم راقدين وشوية وتطلع فريال مرت عمي وجتنا في الخيمة : لقيت علا متصلة بيا وماعنديش رصيد باش نعاودلها اعطوني نكلمها
مدلها عمر تلفونه : هاك كلميها
خدت التلفون واتصلت بعلا ومشت من جنبنا خشت داخل للحوش وشوية ونسمعو زغروطتها اللي تنوض الميت من قبره
طبعا اني وجهي نسلخ من الحشمة وقمت عيوني نشبح في مراد وسراج يتهامسو بالشوية
مراد يضحك: دارها عمك سامي😂
سراج : العقبا لينا😂😂
نادر شبحلهم : نسمع فيكم 😁😂
~~
اني شبحت لمسرة ومريم : نوضو نخشو
مريم : اي هي بنرقد
مسرة : لالا بنسمع بالك يلقحو😂
اني : موقحك 😒
عمر شاد ضحكته: جيبي التلفوون ياااام
جاته فريال وعيونها دموع ومدايرتها ع المكشوف : هاك 😢
احمد : تي غر خيرك تبكي 😂
مريم فنصت فيه متع تحشم
°
•
°
•
°
☀️⛅
ترررن ترررن📱
مريم : صباااحو
علا : صباح النور
مريم: انشالله مش راقدة
علا : لا نايضة...شن جوكم
مريم : انتي اللي شن جوك مش احني 😂
علا ضحكت: هههه مبردك
مريم : كان تشوفي لبارح شن صار...امك فضحت بيك
علا : وووه عليا والله من لما زغرطت قلت نهار احرف حشمتني😂
مريم : تخايلي كلنا مقعمزين ف الخيمة وجت خدت تلفون عمر قدامنا وخشت وبدت فيها زغاريط وخوتك الصايعين يضحكو😂😂
علا : حي ع العاار 😳
كانت علا تهدرز مع مريم وواقفة قدام التلاجة وفاتحتها وتتفرج ع الشكاليط وماحستش الا وسامي وراها ولاف يديه ع خصرها وحط رايه ع كتفها : صباح الخير
علا : ااا بباي مريم بعدين نكلمكم
مريم : باي باي
علا تلفتتله: واخيرا حضرت جنابك نضت ليا ساعة مبومة بروحي
سامي ضحك : ههههه وشن مفيقك بكري
علا : شفت الساعة كم انت
سامي : تؤتؤ
علا تفتح في شكلاته: خلاص اسكت 😌
سامي باسها من خدها : محلاك محلاك ❤
علا تضحك
°
•
°
•
°
فتحت رنا عيونها وابتسمت اول ماشافت وجهه قريب من وجهه وراقد زي البيبي❤ حطت ايدها ع خده وقعدت تتحسس في لحيته وبعدين نزلت صبعها لفمه وتحرك فيه بهدوء...فتح محمد عيونه وابتسملها ورجع سكرهم
رنا قربت وجهها منه وهمست : تبيش تنوض
محمد فتح عيونه وقرب وحط ايده تحت راسها وايده التانية يمشي فيها ع ظهرها : نحلم اني ولا في واقع 💕
رنا تلعب بلحيته ومبتسمة
محمد باسها من خشمها : تعبتيني معاك
رنا : انت اللي تعبتني...وتلعب باعصابي كل ماتقرب مني...وبعدين تبعد
محمد : عارف 😜
رنا : علاش هكي ادير
محمد يلعب بشعرها : انتي قلتيها...نبي نلعب بأعصابك
رنا : هكي من غير سبب
محمد : لا في اسباب واولهم موقفك معاي اول ماتجوزنا
رنا : قلبك اسود😢
محمد : لا مش قلبي اسود لكن وجعتني وحسيت روحي واخدك غصب 💔
رنا : ممكن كنت واخداتك شبه غصب لكن...
محمد : لكن شنو
رنا : لكن ماعمري حبيت شخص بالشكل هدا 😢
محمد قرب وباسها في رقبتها : خلاص اللي فات مات...ونبدو صفحة جديدة
°
•
°
•
°
مقعمزين نفطرو كلنا وخش عمي قعمز يفطر معانا وهدرزة وضحك وطبعا عمي جوه مش عادي ❤
وبعدين خش في الجديات
ع عبدالله: هده علا مشت توا مزال سراج يتجوز ويستقر.....وحتى ربي ياخد امانته نبدا مرتاح
سندس : بعد عمر طويل انشالله تشوف احفادهم
ع عبدالله شبح لسراج : تو انت ياولد خيرك ماتهنينيش وتفتح حوشك وتستقر
سراج ضحك : انشالله
ع عبدالله: انشالله 😒
سراج : شن تبيني نقولك.... هي برا اخطبلي
ع عبدالله: هيا والله ماوليت
سراج : هي نوض هي
ع عبدالله ضحك : وين بنتوجهو
سراج : في الطريق نقولك😜
اني عيوني ف تلفوني ولا اراديا وجهي ولا احمر وطبعا البنات يديرو في القطات المضوحة اللي تحرق الدم 😑
عمر : هيا ياسندس
سندس : هي نلبس ماريا ونطلع
ع عبدالله: مروحين
عمر : اي
ع عبدالله: امتى بتسافر
عمر : يومين تانيات وماشي اني وسراج ممكن
ع عبدالله: والله...
عمر هز لبوه براسه متع تعالى شوية وطلع هو وياه قعمزو برا
ع عبدالله: شن في
عمر : والله موضوع ماني عارف كيف بنقولهولك..
ع عبدالله: انشالله خير
عمر : خلي نفقشهالك طول من غير مقدمات😅
ع عبدالله يشبحله متع شني
عمر : اني تجوزت
ع عبدالله: مرا تانية 😨
عمر هز راسه بمعنى اي
ع عبدالله: تت تي كييف وامتى
عمر : ليا شهور
ع عبدالله: وخيرك ماقلتش ومن هي بنت منو
عمر : ماقلتش لان امي تعرف طبعها ودوتها والخرا التانية حتى هي بتقلب الدنيا
ع عبدالله: الله اكبر عليك
عمر : خيرك بوي مش معجزة ره عادي
ع عبدالله: ووين مخليها
عمر : في بريطانيا
ع عبدالله: تررررك وبريطانيا 😨
عمر : تي لا ليبية من $### لكن عايشة غادي
ع عبدالله: وشن جيبك ليها انت 😶
عمر : البنت هده نعرفها من قبل مانخد سندس وناوي ناخدها لكن انتو سكرتو راسكم ناخد هده ماعطيتونيش فرصة حتى نقوللكم
ع عبدالله تنهد : تي باهي حصل خير المهم بنت عيلة وكويسة
عمر هز راسه بمعنى اي
ع عبدالله: بتجيبها اهني ولا كيف
عمر : اي بنجيبها
ع عبدالله : ومرتك
عمر : الشرع حلل اربعة مش عاجبها تتسقد
ع عبدالله: تو تقول في كلام زي هدا وبننننتك😡
عمر : عادي والله المرا هديكا تحطها ف عيونها وتتربى مايصيرلها شي
ع عبدالله: غر قول لمرتك قبل ماتجيب هديكا
عمر : وانت قول لمرتك النفاخة اللي بديرلي سريب😑
ع عبدالله: باهي به
°
•
°
•
°
ناجية : ماعرفتش كيف نتفاهم معاها بنتك هده اللي تسكر في راسها
بو رتاج :قاعدة مسكرة راسها؟
ناجية : اي زي العبدة
بو رتاج : والله العيلة لا ماينخسرو...غر بنتك هده مافهمتش خيرها
ناجية : شن رايك نرد عليهم نقوللهم يجي هو يكلمك ويدير مقابلة شرعية بالك يعجبها
بو رتاج : زعما هكي رايك
ناجية : اي لان اتصلو قريب تلاتة مرات واني مارديتش عليهم عاد تحشمت منها المرا
°
•
°
•
°
🌒
ترررن ترررن 📱
خ ليلى : الو
ناجية : اهلين ليلى كيف حالك
خ ليلى : الحمد لله كيف حالك انتي
وهدرزو وام رتاج قتلهم يجي عبسي يكلم بوها ويديرو مقابلة وخالتي فرحت واتصلت قالت لماما وماما قالت لعبسي وهدا كله ورتاج ماتندري علي شي
وطبعا كلمتني ماما قتلي واستغربت لان كانت ماتبيش وتغير رايها ف كلمتها نشوف فيها
~~
رتاج : ايوا لولو شجو
اني : شني وليتي ووافقتي
رتاج باستغراب : لالا
اني : تي شن لا توا كلمتني ماما قتلي بديرو مقابلة😏
رتاج : كييييف 😨....تت تي من قال
اني : امك اتصلت وقالت
طبعا معاش سمعت الا عيطتها وهي تنادي ف امها : ماماااااااا😠
وبعدين تسكر الخط
°
•
°
•
°
ع عبدالله: شفته خوك والعملة اللي دايرها
سراج ضحك : قالك
ع عبدالله: حتى انت تندري😡
سراج : مافهمتش خيركم تعقدو ف الامور عادي
وعلي خشت فريال جايبة طاست شاهي : هي تفضل ياعبدالله
ع عبدالله: قعمزي يافريال قعمزي
سراج ضحك
فريال : شنو
ع عبدالله: السي عمر واخد مرا تانية
فريال حطت ايديها علي بعضهم : بالله عليييك😮
سراج : اي مسكنها في بريطانيا
فريال ضحكت : ريته هالطحان مايطلع منه
ع عبدالله: هدا حدها...واني قلت تو تقلب الدنيا
فريال : وعلاش ياكبدي خلي والله وليدي يتجوز مدام عنده الفلوس 😌
سراج : نوض بوي نخطبلك امي شكلها تحب الضراير 😂
فريال : نوض عفريت يكسر رقبتك
ع عبدالله: ولدك بيجيب يسكنها اهني راهو
فريال : وين
ع عبدالله: مش عارف لكن بيجيبها لليبيا
فريال : وبنت منو وليبية ولالا وشن اصلها وفصلها
ع عبدالله: ليبية قال لكن عايشة برا
فريال : انشالله غر مش امرمدينها الاجانب
سراج تحشم وناض
ع عبدالله تعصب : خيرك تلكلكي في اي كلام قدام الولد
فريال شهقت : هييي ولدي نافص غر نتحشم قدام ولدي
ع عبدالله: تو هو ماعنداش حوش تاني ولدك مافهمتش حتى وين بيجيبها😑
فريال : عادي مبدأيا تبعد معاي تونسني وكان ماعجبتنيش نتلفها
ع عبدالله: باهي كويس
فريال : وسندس تندري
ع عبدالله: لالا
فريال ضحكت: ياغبارتها 😂
ع عبدالله: اما مصح وجهك وخلاص😒
°
•
°
•
°
🌒
ترررن ترررن 📱
داليا : هااي
عمر : اهلين
داليا : كيف حالك
عمر : بعد ماسمعت صوتك اي 💕
داليا : امتى بتجي يسألو عليك في العمل
عمر : اي جاي انشالله ياعمري غر فوتت عرس علا بس
داليا: مبروك عليها 😊
عمر : وممكن جاي معاي خوي ره...بنستضيفوه عندنا😁
داليا : الله... اما واحد🙈
عمر : سراج
داليا : ااه اللي جي معاك مرة قبل مانتجوزو
عمر : اي جاي
داليا : اهلا وسهلا بيه💛
~~
ناضت سندس من النوم مالقاتاش جنبها طلعت لقاته في البلكونة وشاد التلفون
سندس : منو
عمر : باي توا
داليا : باي حبيبي
تلفت عمر لسندس لقاها قارنتهم : في من كنت تكلم
عمر باستغراب : نعم ؟؟
سندس : في من كنت تكلم
عمر : تعالي اضربيني خير ☺
سندس : عمرر اني عيييت منها العيشة هادي عييييت تعامل فيا زي الكلبة 😭...من حقي نسألك ومن حقي نعرف من اللي تكلم فيه يوميا في نفس الموعد....عييييت اني عيييت
عمر عيط عليها : نقصي امممممه صووتك 😠...بالك تحسابي روحك بديريلي دراما بش تسخفيني ....تي اني اللي عييييت مش انتي اني اللي فدييييت وكرهت جد عم ام العيشة اللي عايشها تي انتي لما قعدة عروسة وجديدة نروح للحوش النم نلقى فيك اضمي اطيبي تكنسي منظرك تقول وحدة ليا عشرين سنة متجوزة😠
سندس : لالالا هدا زمان ودويتلي فيها ومن لما حولنا اهني اني تغيرت لكن انت من البداييييه ماتبينيش ولا مش مقتنع بيا ولا مافهمتش شن علللتك 😭
عمر نقص صوته وتكلم عادي : العلة فيك انتي مش فيا اني انتي اللي غريبة مافهمتكش كيف تي حولتك من فوق اماليا وقلت حوش بروحنا تو يتغير الوضع لقيتك زي ما انتي كان ماضميش وماطيبيش مقعمزة تلبسي ف بنتك...
ومشي وقف جنب الشكماجة وحط عليها ايده : شفتي امها هده ماعمري ريتك مقعمزة عليها...تي ماعمري شفتك حاطة حتى كحل في الحوش وجاية تقوليلي عيييتي تي اني اللي عيييت اني😠....الزززح الحرف امي اللي باحفادها نجي علي غفلة نلقاها في قفاطين قصيرات ومكياج ودايرا لي روحها راس موضوع وانتي الززح قفاطينك حتى جداااي معاش تلبس فيهم...تي الواحد يمللل والله العظيم يمللل😡
سندس : طلقني عمر...مش عاجباتك طلقني لكن ماتعيشنيش في الذل هداااا
عمر : اسمعي يابنت الناس احني عندنا بنت وفي الاخير بكل بيناتنا عشرة ومانبوش نخسرو بعضنا لكن اني من الاخير هكي اني واخد مرا تانية ره وماكنتش نبي نجرحك لكن هدا شي مايدرقش ولازم تعرفي😔...
سندس هرب الدم من عروقها ووجها ولا اصفر مايتفسرش والصدمة اللي في وجهها غريبة...بدت تشوف في الدنيا سودة قدامها والعبرة خانقتها كانت ع شوية وتجي صايخة قدامه
عمر : قصدي اني هدا اللي عندي تبي تربي بنتك وتقعدي ف حوشك معززة مكرمة باهي...ماتبيش عادي براحتك...واني مانبيش نقولك انتي زايد ناقص ولا مانيش معدل عليك قصدي كانك بتجي ليا اني متمني تقعدي ولاك اول ولا اخر وحدة عادي....ومادبيا ماريا ما تتمردش بينا قصدي انتي في الاخير الخيار ليك تبي تحافظي علي حوشك واستقراره اني معاك... قلتي تبي الطلاق عندنا كلام تاني
سندس : مم متجوز 😢
عمر هز راسه بمعنى اي
سندس خانقتها العبرة : كنت حاسة والله العظيم كنت حاسة 😢...هههه ههههههه قداش ما اني نية ونهز ف راسي😢....
عمر : الموضوع مافيشي نية ومش نية ويابنت الناس الشرع محلل اربعة
سندس : اي ماهو انت اطبق في الشرع بالباء والتاء
عمر : توا هدا اللي صار
سندس : طلقني
عمر : فكري بعقلك ماتخربيش حوشك بايدك
سندس : طلقنييييي....ولا نقولك تو يجو اماليا يتفاهمو معاك اني معاش عندي معاك كلام😭...ومشت تلم في دبشها
عمر : قعزي واهفتي ليل
سندس انهارت بالبكي وقعمزت ع الارض : كييييف نهفت كييييف😭....ولعت فيااا نار وجاي تقووولي اهفتي...طلقنيييي طلقنييييييي😭
ماريا فاقت وقعدت تبكي لما شافت امها : 😭😭😭
عمر : البنت نوضتيها نقصي صوتك 😠
سندس : طلقنييييييي طلقنيييي توا طلقنييي 😭😭
عمر : نقصي صوتك لييييل نقصي صووتك
سندس : توا نبي انروح الليلة نبي انروح 😭
عمر : خيرها هده .... تي شوفي الساعة قدااش توا بتروحي بتخلعيهم
سندس تبكي
عمر : اهو طالع اني باهي .....وطلع نزل لحوش سراج
°
•
°
•
°
☀️⛅
بو رتاج خش جايب خبزة ويسمع في رتاج وامها يتعاركو وعمتك رتاج صوتها يلعلع
بوها : تي خيييركم شن في😠
ناجية : اليوم ناديت الناس بيجو وبنتك حالفة تمشي لحوش اختها تفاااهملي معاها بنركبلي الضغط
رتاج : مانبيشي قلتكم مانبيشي لاش مكلمييينهم من غير ماتقولولي😠...
بوها : سكري فمك ياحيواااانه وقعمزي هني روحك...خلي يجو الناس ونشوفوهم وبعدين كانك ماتبيش نقولولهم مافيش نصيب
رتاج : تي باهي علاش الجية الزايدة هده
بوها : توا اللي صار صار شني بنلزوووهم الناس😠
رتاج خشت للحمام وقربعت الباب
بوها شبح لامها : ريتيها كيف تخبط المسخة قليلت الرباية ناقص غير تمد علينا ايدها😠
امها هزت راسها وعجبت بشورابها بهزوة
~~
🌒
ورضت رتاج عصبا عنها انها ادير مقابلة شرعية مع عبسي...
ومشولها خالتي ليلى وماما وصفاء وعبسي....
طبعا ع قد ما رتاج متعصبة ومش راضية باللي صاير ع قد ما أمها محسستهم انها بالطير بالفرحة
خش عبسي قعمز مع بو رتاج وهدرز معاه شوية
رتاج في دارها مقعمزة ع سريرها وماطلعتش واعصابها ف حكة وكان تلقاني قدامها ممكن تدفني حية 😂
وبعدين ناضت اتكت ع الشكماجة وتشبح للمرايا وتفكر وبعدين قامت حاجب واحد " هه😏 اني علاش مانديرلاش زي مادارلي..." وحطت صوابعها تحت دقنها هكي >>🤔 " حق مفروض نطلع ونلبس ونتأنق ونخلي يشوفني وبعدين نمسح بيه الارض زي مادارلي الحقير .... لكن عارفة روحي اول مانشوفه ننسى شن نقول😢...اففف....لكن لازم نقوي روحي ونوريه ان الدنيا مش واقفة ع حد واني مش فرحانة لان خطبني ونقوله اني رافضاته😏"
وانقت روحها ع الاخر ودارت لمسات ع وجهها وطلعت كل مافيها من انوثه وطلعت سلمت ع النساوين وبعدين بوها ناداها ....دوب ماحطت الوشاح ع شعرها وخشت بكبرياء : السلام عليكم
عبسي يشبحلها ويشبح لجسمها وشعرها وبعدين رد: وعليكم السلام
طبعا اول ماخشت ريحتها احتوت الدار ومشيتها وجلستها كله قعد مركز فيه عبسي وماحولش عيونه من عليها
قعمزت رتاج مقابلاته وبوها طلع وخلاهم
عبسي : كيف الحال
رتاج قامت عيونها وشبحتله : تمام
عبسي : اا اني ...
رتاج قصت ع كلامها : عندي كلمتين نبي نقولهم وياريت تسمعهم كويس 😊
عبسي : تفضلي
رتاج : اني اسانة مانعرفش ندس مشاعري ونكتمها مانقدرش...فاشلة في الشي هدا...اني اللي ف قلبي ع لساني.... وحبيتك❤ فعلا حبيتك ومزال نقولك فيها حتى توا ومش متحشمة الحب مش عيب واي انسان في الدنيا يحب....ومش لايمة روحي لان تجرأت وبعتلك رسالة حتى لو اني دفعت ثمنها غالي وحتى لو سمعت علي خاطرها كلام كسرلي خاطري منك لكن اني مش نادمة وهدا طبعي
عبسي : توا اللي فات خلينا منه احني في الحاضر علاش نجبدو في اللي صار قبل
رتاج : لان عيبي ماننساش حد هانلي كرامتي
عبسي : اه اي اي فهمت...انتي توا جايبتيني لهني بش ترديلهالي وتصديني
رتاج : لا اني مش هكي😊...وجيتكم هده اني ماعنديش علم بيها ولما ردو عليكم اماليا وقالولكم تعالو كله صار بالدرقة عليا واني نحطيت في الامر الواقع....ولعلمك اني من اول ماجو اماليك طلبوني قلت لماما ترد عليكم وتقوللكم ان مافيش نصيب لكن هي لانها عاجبتها عيلتكم ماردتش ع كلامي ودارت اللي ف راسها
عبسي : لكن ليال جت قالتلك قبل مايجو خواتي😏
رتاج : اي حتى ليال قلتلها لا وهي اصرت وقالت لامها وخلاتها يجو
عبسي : كك كيف مافهمتش😶
رتاج : واضحة القصة
عبسي : لعلمك اني جيتي هده كلها من كلام ليال... وقالتي انك شبه موافقة هدا علاش اني جيت مانحسابش الموضوع من بدايته كدبة
رتاج : من عقلك انت بعد الكلام اللي قلتهولي تبيني نوافق....اني لعلمك استغربت شن اللي خلاك تجي تخطبني بعد ما....
عبسي قص ع كلامها : اي غلطة واي انسان يغلط....وناض وقف : قوليلهم هيا اني نستنى فيهم ف السيارة😒
°
•
°
•
°
بو سندس : انت قبل ماتفكر تتجوز المروض سألتها و....
عمر قطع عليه : ياعمي اني ماتحكمش فيا مرا...والشرع محلل اربعة وماتقوليش مفروض ومش مفروض مافي حد يقدر يفرض عليا شي😒
بو سندس : انت تعتبر خنتهااا😠
عمر ضحك بهزوة : علاش اللي يتجوز تاني يعتبر خاين ولا كيف...ياعمي اني قاعد داير حساب للعشرة ومانبيش نخسرو بعض وفي بينا بنت
بوها : اللي درته غلط ياولدي...انت المفروض جيتها وكلمتها ف الموضوع وقلتلها انك بتتجوز وبعدين تجوز....لكن هكي فجأة تجي تقوللها اني تجوزت هدا الكلام مايصيرش منه راهو
عمر مسح وجهه بايديه وتنهد : زي بعضه زي بعضه مافيش فرق 😑
فتحت ام سندس الباب وخشت : مزاااال عندك وجه تقاااابل انت 😡 والله ماريت وقاحة بعد هكي
بوها : تي اسكتتي يامرا خيييرك😠
امها : ماخيرنيش بنتي ماتحلمش تشوفهاااا باهي ماتحلمش بكل وحتى بنتك كان مزال شفتها
عمر ناض وقف : بنتي بنشوفها امتى نبي وماتقوليش كلام انتي مش قده وخلي مكان للعيش والملح اللي بيننا مانبوش نخسرو بعض
بوها : غر قعمز ياعمر قعمز
عمر : لا بنمشي عمي خير مامرتك تقول كلام تاني وتكبر المشكلة😒
امها تلعلع: اما بعد هكي وقاكة ماريتش.... عمر طلع وسكر الباب قبل ماتكمل دوتها
امها : برا الله لاتردك
طلعت سندس : بوووي قووله يطلقني معاش نبيييه اني قووله يطلقني😭
بوها عيط عليها : مش هكي تنحل الاموووور😠عندك بنت شوفي لبنتك
سندس تبكي
°
•
°
•
°
☀️⛅
اتصل محمد بسامي وعزمه ع الغدي لان صاحبه و عريس وجو..... وطبعا رنا بماأن جايتها علا فنادت امها وبوها وخوتها حتى هما وقررو ينادوهم اليوم لان في الليل عمر وسراج مسافرين...مشت فريال مع احمد ومرته مع بعض والباقي كل وحدة جابها راجلها لكن سراج وعمي جو بروحم بسيارة سراج لانهم كانو مهناش ولحقو لحوق
في السيارة 🚗
سراج يسوق وشرين تلفونه وكان محطوط جنب المارشا وكان مسجل ب English شبح عمي مافهمهاش 😁
قام سراج التلفون ورد وقعد ينقص ف الصوت المهم عمي ركز ع حركاته
سراج رد بصوت عالي بش بوه مايحسش: الو
اني بصوتي الطبيعي : اهلا شن الجو
سراج نبرة صوته تغيرت لا اراديا : تمام
اني : مشيتو لرنا
سراج حاول يدوي عادي : في الطريق
اني : بروحك
سراج : لا
اني ضحكت : امممم معناها نسكر ونكلمك بعدين
سراج : اي
اني : به باي
سراج : سلام
اني بصوت هاااادي : نحبك ❤
سراج دار روحه يكح وبعدين تكلم بصوت عالي : ااا اي باهي نتلاقو انشالله
اني ضحكت : ههههه باي
وسكرنا الخط
ع عبدالله شبحله : تو هده بتمشي تخطبها ولا غر تضييع وقت وخلاص 😒
سراج ضحك : تي هدا اياد يابوي ماعندي مانخطب فيه😂😂
ع عبدالله: اياد 😏
سراج : تي بنخطب يابوي بنخطب مش فايته الموضوع
ع عبدالله: وعندك عيلة ولا تبيهم يدورولك
سراج : اا والله تقدر تقول في عيلة ف راسي
ع عبدالله: منو
سراج حك راسه وضحك : والله شن بنقولك...تبي الحق فكرت في......
🌷يتبع🌷
تفاعلكم ضعيف بكل 💔
.
.
#_timOo_❣
