أحمق في بيتي

|٣|

جذبت سمر المقعد الخشبي و جلست عليه بشكل عكسي و هي تعانق خلفية المقعد قائلة بصوت مسموع:عندك 6شاي سكر برا ي حودة.
رد النادل:أمرك يا ست البنات.
لتقول عائشة لعبدالرحمن:اتفضل اشجيني.
بادر عبدالرحمن:بصوا ي جماعه.. انا لقيت شقة إيجارها مش غالي اوي ف بيت قديم و الحلو انه مش بعيد عن الجامعة.. المهم البيت دا فاضي كل اللي فيه ناس شاريينه للمصيف بس و عايشين ف محافظات تانية و برا مصر يعني مش بيجوا غير كل فين و فين..أظن هتبقي مناسبة جدا من ناحية الهدوء عشان نعرف نذاكر بردو وكدا.
سألته فريدة:طب و الشقة دي قد ايه؟
رد عبدالرحمن:اوضتين كبار و صالة و مطبخ و حمامين و بلكونتين و مساحتها كمان كبيرة.. بقولكم الشقة دي لقطة..احنا هيبقي لينا اوضة بحمام و انتو اوضة بحمام..و بالنسبالك ي عائشة لو مضايقة و كدا عشان انتي محجبة ف اوعدك ان محدش هيخرج من الأوضة غير بمواعيد و وقت ما تعوزي تطلعي هتحطي الطرحة علي راسك بس مش أكتر.. و كدا كدا احنا اخوات و لا ايه؟
حركت رأسها بالإيجاب و هي متحيرة قبل أن يقول يحيي:هو انت بتتكلم بثقة كدا ليه اكنك ضامن ان البواب هيرضي يأجرلك الشقة.
لم يجيبه عبدالرحمن بل أخرج من جيبه كمية كبيرة من النقود الورقية و لوح بها أمامه ليردف يحيي:اه اذا كان كدا ماشي.
ليقول عبدالرحمن:انا لما اتكلمت مع البواب عرفت انه بيحب الفلوس اوي و كمان صاحب الشقة عايز يأجرها و يستفيد منها بأي شكل.
قالت عائشة بوجه قلق متحير:طب و لو اهلنا عرفوا؟
ردت سمر:و ايه اللي هيعرفهم يابنتي؟.. و بعدين احنا مش هنعمل حاجة غلط.. احنا واجهتنا مشكلة و حليناها بالطريقة الانسب.. وبعدين هم لو واثقين فيكي مش هيدبحوكي زي ما بتقولي.
اخفضت رأسها و هي تفكر متحيرة ليقول عبدالرحمن:مين موافق علي كلامي؟
رفع جميعهم أيديهم عدا عمار و عائشة اللذان تبادلا النظرات بتردد.. بادر يحيي لصديقه:ما تنجز بقا ي شيخ عمار.
رد عمار:والله انا مازلت مستحرم الموضوع.. بس سامحني يارب ما باليد حيلة.. موافق يچماعة.
نظروا جميعهم لعائشة التي كانت مترددة كثيراً و لكنها نطقت:أمري لله.. موافقة.
ارتشفت فريدة من كوب الشاي و هي تهمس: اشهد ان لا إله الا الله و أن محمداً رسول الله.
نظرت بضيق عينيها لتجد يحيي ينظر لها بنفاذ صبر بينما عمار تسائل:طب الشقة هتبقي بإسم مين فينا؟
ردت فريدة بمنتهي الهدوء:بأسم الصليب.
ضحكت صديقتيها بينما يحيي انفعل:لا بقا دا انتي عايزة تتربي.
اوقفته سمر بنظرتها الحادة و هي تدافع عن صديقتها:اخشع ياض لأفلقك.
تراجع يحيي و تمسك في ذراع عبدالرحمن و هو يقول بتوسل:يسطا انت هتعيشني مع العصابة دي!
بينما عبدالرحمن قال بنفاذ صبر:يجدعان انتو كلتوا دماغ امي وربنا.. خلونا نتكلم بجدية ولو لمرة.
ألتزم الجميع الصمت و لكنهم لم يتوقفوا عن تبادل نظرات الأستحقار في حين قال عمار بلهجته الصعيدية:بس في مشكلة جبيرة جوي.
تسائل يحيي:ايه هي ي شيخنا؟
رد عمار:هناكل و نشرب منين و احنا هنصرف اللي جدامنا و اللي ورانا ف الإيچار؟
وضعت فريدة يدها علي ذقنها و هي تقول بلهجته:تصدج صحيح!
ليبادر عبدالرحمن:خلاص انا عندي فكرة.. فلوس الإيجار و الماية و الكهربا هتبقي عليا.. انا معايا متقلقوش.. انما الأكل و الشرب هيبقي مسؤوليتكم انتو..لو كل واحد فيكم حط 500 جنيه هناكل و نشرب و نوفر و كله تمام و هنحاول نيجي علي نفسنا شوية.. يعني نجيب الضروريات بس.
ردت سمر:هي فكرة حلوه.. بس انت جاي علي نفسك اوي.. و هنجيب ال500 دول منين كل شهر؟
قالت فريدة:هنحاول نخنصر من مصاريف الكتب علي مصروف الشهر و لما ننزل اجازات نبقي نقلبهم ف اي قرشين و كدا كدا الترم الجاي بدل ما ندفع الفلوس بتاعت المدينة للكلية هنحطها ف ايجار الشقة يعني هنعدي الترم دا كدا كحرته و خلاص.. و هتعدي يعني ان شاء الله.
ساد الصمت و هم يفكرون ليقول عبدالرحمن:و انا رقبتي سدادة من جنية لألف بس مشفش صحابي متبهدلين كدا.
ضربته فريدة في ذراعه:خلاص بقا يعم دا انت ابن بلد و جينتل جدا.
ضحك بخفة قبل أن يتسائل:ها قولتوا ايه؟