_ أمي يا حبيبتي يا....
_ ممعييش فلوس، اتبط
_ الاه!!! وهنزل مع صحابي ازاي دلوقت؟!
_ انت مش لسه قابض مُرتبك! .. اومال رايح فين رايح الشغل .. جاي منين جاي مـ الشغل!
_ يا ماما انا هدفي اكبر من الفلوس
_ اومال هدفك اي يا روح أمك
_ لا هو الفلوس بس الشركة هي الي فقر
_ عوض الصابرين يا رب
_ ما قولتلك افتح مشروع الكتاكيت
_ هو انت عارف تربي نفسك اما تربي كتاكيت!
_ يا ماما بقا
وطيت على ركبتها
_ دا هم ٥٠٠ جنيه، وانا وعد مش...
_ البُوك فاضي
_ والله! اومال اي الفلوس الي مالياه دا! .. يولية عيب دا هينفجر
_ ابداً !!!! .. دي فلوس ناس
_ هو انتي بنك saib يا أمي ؟ هل أنتي بنك مصر يا حجة ؟ الناس معندهومش مراتب يعينوا تحتها الفلوس فبيجولك يعني ؟!
_ انت يالا بتجبلي صداع
قطعت الخيط الي كانت بتخيط بيه العباية بتاعتها، افتكرت عدد المرات الي قولنالها ننزل نشتريلها فيها عباية جديدة لكن دايماً كانت بتطلع بكيس فيه حاجة لينا.
_ شكل ابوك جتك نيلة .. وسع من وشي
_ كدا ؟ .. طب شوفي مين بقا الي هينزلك الزبالة
دخلت أوضتي وقفلت عليا الباب، سرحت شوية في المسلسل الي كنت متابعه وعيني غفلت، صحيت تاني يوم لقيت اللاب محطوت في مكانه، البطانية مفرودة عليا وعلى التربيزة جمبي الـ ٥٠٠ جنيه.
****
_ يووووه!!! هو انا عيل صغير!
_ وعشان انت مش عيل صغير تخشلي البيت الساعة تلاتة الفجر !
_ قولتلك كنت مع صحابي !
_ صحابك دول هيودوك في ستين داهية
_ انتي عوزاني اعمل ايه هه؟!
قربت منها وانا برمي مفاتيح العربية
_ اقعد جمبك اقطف ملوخية ؟ ولا اسمع نشرة الأخبار مش فاهم
_ انت مش شايف نفسك عامل ازاي! .. مش شايف حالك ؟! .. مش صعبان عليك فلوس ابوك الي راحت في تعليمك و توفير حياة نضيفة ليك !
_ يووووه .. هنرجع لنفس النقطة .. دا واجبكوا علينا .. اومال خلفتونا ليه!
_ صوتك بقا بيعلي على أمك يا يونس
كان صوت بابا الي ظهر من العدم
_ هي الي بتوصلني لكدا
بابا كان هيقرب عليا والموضوع هيسخن قبل ما ماما تجري وتحط نفسها بيني وبينه
_ خلاص .. خلاص يا عبدالرحمن .. تلاقيه جاي تعبان من برا
_ ما دلعك فيه دا هو الي وصله للمرحلة دي
ودخل الاوضة وقفل الباب عليه، رفعت عنيها ناحيتي
_ خش جوا
_ ماما أنا ....
_ قولتلك .. خش جوا
دخلت اوضتي وانا بحدف الچاكيت بـ إنفعال، رجعت خصلات شعري لورا ودفنت وشي بين كفوفي، كنت حاسس بيها وهي في الصالة قاعدة برا لسه منامتش، فضلت امشي بعشوائية جوا الاوضة قبل ما اقرر اروح ناحية الباب عشان اعتذرلها قبل ما تنام في نفس اللحظة الي لقيتها بتخبط وبتدخل، وقفنا انا وهي قصاد بعض لدقيقة ساكتين
