_ لأ مش عاجبني
_ لا بقا كدا كتير
قمت من مكاني وقفلت اللاب
_ دا سابع ديزاين ميعجبكيش
_ انا حرة !
_ يا ستي اعتقي أبويا انا .. بقالي معاكي خمس ساعات بتختاري ديزاين العيادة!
_ اعملك ايه ديزايناتك فلاحي!
_ فلـ... ايه! .. انتي منين .. منين بالبادي كارينا دا منيييين؟!
_ بادي كارينا! .. دا شميز يا فلاح! .. انا قولت الي زيك ميعملش ديزاينات عيادة زي بتاعتي
_ لا وبترجع لورا البت
_ اه
_ ثقة يا بت .. ثقة وكلامك دا اقنع امي
_ غصب عن دقنك الي مش كاملة وبعدين ايه بت دي ! جاك بتة
_ بتتريقي على دقني! ماشي
قامت قدامي وواجهتني اما انا بصيتلها بتحدي.
_ انا مش هشتغل بالطريقة دي
_ وانا عايزة بني مطرقع او لبني مسخسخ
_ يا عوض .. يا عوض الحقني!
دخل عوض وحاول يفضي الخناقة بيني وبينها
= يا جماعة استهدوا بالله .. حصل ايه بس يا دكتورة ؟
_ الراجل دا ..
بصيلتها بغضب مكتوم
_ الراجل دا ! .. الراجل دا .. كدا عادي ؟
_ اه عايز ايه !
_ انا مهندس ديكور يا انسانة يا بشرية يا عادية
شديت عوض عليا _ الهانم عايزة بني مطرقع ولبني مشرشر
_ مسخسخ على فكرة
_ متدخليناش في تفاصيل!
_ هو انت مش مهتمك انك تهتم بالتفاصيل !
_ ما انتي جاهلة هقولك ايه ؟ ... انا مالي انا بالبني المطرقع ولا اللبني المشخلع وبعدين ايه الي جاب اللونين دول اصلا في عيادة! .. انتي واخدة كليتك من الزرايب ولا ايه!
_ يعني ايه زرايب!
_ هتعملي فيها من زايد الي جاية من تحت سلم الشرابية
_ ومالهم الشرابية ؟
_ متدخليناش في تفاصيل
_ انا قولت الي عندي .. انا عايزة عيادتي فول اوبشنز
_ ايوه يا عوض حطلها بني في لبني في عنابي وخلي المدخل أحمر
_ ايوا احتفالا بالأهلي
عضيت على سناني فابتسمت بمكر
_ شكلك زملكاوي حقود
عوض شدني على جمب وهمس
= جرا ايه يا وئام ما تمشي دنيتك يا جدع
_ امشي دنيتي ايه دي بت لوكال مش فاهمة حاجة
= وئاااام! .. مشي الدنيا الحالة ناشفة
روحتلها
_ اللبني المسخسخ دا عامل ازاي
_ ما انت لو كنت مهتم بالتفاصيل كنت فهمت
_ يا ستي انا خطيبك! .. خلصي امي
_ لا .. الاهتمام دا بينبع من النفس
عضيت على شفايفي بغيظ وبصيت لعوض الي غمزلي اعديها.
_ ممكن لو سمحتي تقوليلي بيتجاب ازاي اللبني المسخسخ دا!!! دا لو مفيهاش اسائه ادب لمعاليكي!
_ زي لون الشميز دا كدا
_ دا ؟؟؟ .. الي واجع عين أمي من الصبح دا ؟
_ ايوا
_ داااا!
_ راحة لعين المريض
_ اه عشان يطلع من عيادة اسنان على عيون على طول مش كدا ؟
_ ايوا .. واهو على اول الشارع
_ امممم
_ احنا مؤسسة بتخدم بعضها
_ اممممم
_ عاوزة اصفر هنا في الكورنر
_ مش عاوزه برسيمي في الطرقة ؟
_ فكرة بردو عشان البهجة
_ انتي مش عاوزة مهندس ديكور انتي تيجي انتي وعم ابراهيم بتاع الشاي تضربولكوا جردلين اللون على الحيطة وخلصي الدنيا ... عيب انا مهندس ديكور محترم
_ الحق عليا اني جيبتك انت اصلا من وقت ما كنا في الجامعة وانت فاشل
_ فاشل !!!! انا خدت كليتي في سبع سنين بس عشان ادعم صحابي الي في طب
_ يعني مش عشان فاشل ؟
_ تؤ تؤ ادعم صحابي الي في طب
بصيتلها من تحت لفوق
_ انا عايزة احمر في مدخل العيادة
_ لا متقوليش .. احتفالا بالأهلي!!
_ اسمالله عليك
قفلت الكتالوج الي قدامي
_ بقولك ايه ؟ .. انا العقلية الفنية الي فيكي دي تلزمني
_ عايز ايه يعني ؟
_ احنا نجوز
_ ايه!
_ اصبري بس مش وقت عنطزة هي
قعدت جمبي وسمعتني
_ انتي هتعملي ازمة قومية باختيارك للألوان
_ دي بهجة .. الوان صيفية
_ دا عك .. دا قرف .. دا زفت
_ مش ممكن انا مدرس الرسم مأكدلي
_ اشششششش .. انا الوانك الصيفية دي هضحي انا يا ستي واخدها في بيتنا كلام مقنع ولا مش مقنع
_ لا مش مقتنعة
_ عنك ما اقتنعتي ... عوض
عوض قرب بعد ما كان بيراقب الوضع من بعيد بزهول
_ الدكتورة قررت خلاص ..
_ لا مقررتش حاجة
_ خلاص يا حياتي .. مش ممكن مصرة على قرارها
_ لا مش مصرة انا مقولتش حاجة
_ عوض .. اللبني المسخسخ دا خليه لأوضة الأولاد
_ طب والعيادة !
_ هخلصها انا على زوقي
وغمزتلها
_ وانا بخلص الصالة
ابتسمت بدلال
_ انا عاوزة الصالة بَصَلي
_ بَصَلي!
_ امممم .. هي شغلانة سودا أصلها.
_ وفسفوري في الريسيبشن
_ دكتور العيون
_ ماله ؟
_ على اول الشارع هو مش كدا ؟
*******************
_ نانسي أشرف ♥️
