_ دا ايه اليوم الي مش بينله ملامح دا
كنت ببص لنفسي في المراية قبل ما اسمع صوت تخبيط على ازاز العربية.
_ مساء الخير يا آنسة عايدة.
_ دا ايه اليوم العظمة دا! بسم الله الله أكبر ايه دا!
فتحت الشباك واتأملت لبسه الكاچوال .. وقفته والورق الي في ايده.
_ خير ؟
_ أنا يونس المهدي المدرب بتاع السواقة
_ فين الكابتن عمر ؟
_ تعبان
_ كابتن يوسف ؟
_ عيان
_ كابتن ياسين جعان ؟
_ ايه دا اللهم صلي على النبي دمك خفيف!
فتح باب العربية ودخل وبصلي بثقة.
_ يا ريت سواقتك تبقى خفيفة زي دمك بقا
_ بص هبهرك.
_ طب اربطي حزام الآمان
_ مش عارفة
_ مش عارفة ايه!
_ اقفله
_ اه !
قرب مني مرة واحدة وقفل الحزام في سرعة ورجع مكانه
_ انتي مالك مقربة الكرسي كدا ليه
_ انا قصيرة رجلي مش طايلة البتاعة دي
_ البتاعة دي!!!!!
_ ايوه دي
_ الفرامل!
_ ايوه الفرامل هي دي.
_ اممم ابتدينا في الانبهار.
_ ها بقا الكلام على ايه
_ دوري العربية خلينا نتحرك
_ ايوه
بصيت دقيقتين في المكان بعشوائية وهو كان بيقرأ حاجة في الورق.
_ طب بص، دورها انت وانا هقوم بالباقي
_ انتي عايزة تفهميني انك مش عارفة ازاي تدوري العربية ؟؟
_ لا عارفة
_ طب اتفضلي
_ تعرف حاجة عن المشاركة الاجتماعية ؟
_ شغلي العربية !
_ فين البنزين
_ بنزين ايه !
_ هو انت مش قولت ...
_ دوري الكونتاكت يا آنسة!
_ ايوااااا الكونتاكت
_ انتي مش عارفة ايه هو الكونتاكت مش كدا ؟
_ ايوا
_ يا ولي الصابرين
مد ايده وحرك المفتاح وهو بيبصلي بثبات
_ يلا الخطوة الي بعدها
_....
كان رجع يبص في الورق لكن بصلي بعد غيابي عن الرد
_ شدي الفتيس
_ العصاية دي!
_ ايوه
_ في حروف عليها
_ لا والله .. بتهزري!
_ اهو بجد
ضغط على اسنانه_ على الـ D
_ ااااااه D for drive يعني
_ بسم الله ما شاء الله نبيهة
_ قولتلك اني هبهرك
خدت نفس عميق وفعلاً العربية دارت
_ يلا دوسي بنزين
دوست عليها وانا خايفة تكون الفرامل بس العربية اتحركت
_ احنا السلحفه أسرع مننا، زودي سرعتك شوية
دوست برجلي فاندفعنا انا وهو لقدام
_ بنزين .. بنزيييين مش فرامل
_ مَ هم الي حطين الاتنين جمب بعض
_ طب يلا امشي
_ بنزين مش كدا
_ اه كدا
قالها بسخرية وهو بينفخ وبيرمي الورق على التابلوه.
_ ايه دا الله! أنا بسوق
_ بتسوقي ايه! احنا واقفين بقالنا دقيقتين
_ مشيت مسافة قبل الدقيقتين دول على فكرة
_ نص متر .. مشيتي نص متر .. اتحركي بالعربية لآخر الشارع
_ لا كتير كدا انهردا نكمل بكرا
_ تعالى هنا .. بقولك اتحركي بالعربية
