_ ايه
_ ....
_ ايه يحجة بتبصيلي كدا ليه ؟
_ قولي يا مهاب بتتسلى بيا لإمتا ؟
_ بتسلى بيكي !
_ ايوه يعني ناوي تخوني امتا و تبعتلي شات طويل عريض كدا بتقولي فيها انك مش هتكلمني تاني وأن الظروف كانت اقوى منك
_ ......
_ مش اقوى منك ؟
_ ......
_ في ايه يا مهاب مالك بتاكل بوقك كدا ليه ؟
_ ......
_ على فكرة مش معنى أني سمحتلك تكلمني تـ....
_ انتي عبيطة يا نور؟ لا بجد عبيطة ؟
_ اه طبعاً .. تشتم دلوقت زي ما انت عايز .. الله يرحم زمان كنت عامل زي اليويو
_ طب اسكتي يا حبيبتي .. اسكتي يا ماما انتي مش فايقة دلوقت
_ أنا عيد ميلادي امتا ؟
_ خمسة نوڤمبر
_ أول مرة اتكلمنا فيها
_ عشرة أكتوبر
_ أول مرة شربنا فيها بيبسي سوا
_ سبعة نوڤمبر
_ أنت فاكر انك اما تحفظ كل التواريخ كدا أنا هنبهر يعني ؟
_ يا منجي من المهالك يا رب
_ حفظت مواعيد لكام بنت قبلي يا مهاب ؟
_ كتير .. كتير يا نور .. وأنتي عارفة انهم كانوا كتير
_ متكلمش و كأنهم بقوا ماضي عشان انت هتسيبني و تروحلهم
_ ايه يا دكتور هي هتفضل تحت تأثير البتاع دا كتير ! انا كدا هتنقط
_ بصلي وأنت بتكلم
_ ليه
_ عايزة اتعلم ازاي اداري
_ عايزة ايه يا نور ؟!
_ عايزة ايس كريم بالمانجا
_ ماشي اول ما نطلع من هنا هجـ....
_ جيبت لكام واحدة قبلي ايس كريم بالمانجا يا مهاب ؟
_ كتير يا نور .. كتير
_ انت بتزعقلي ؟!
_ لأ
_اومال صوتك عالي ليه
_ واقف في حته مفيهاش اشارة
_ طب ما تتحرك يسطا
_ يا دكتور هتشل !
_ لو سمحت ممكن تبطل تكلم الدكتور و تبصلي
_ اهو .. اهو يا نور
في لحظة الباب اتفتح ودخلت الممرضة وهي شايلة بيبي صغنون ومهاب قام بسرعة وشاله وقربه مني
_ امسكي يختي
_ ايه دا ؟
_ دا الايس كريم بالمانجا بتاعك
_ انت جايبلي ابنك يا مهاب ؟ لحقت تجيبه امتا دا !
_ يا بنتي انتي متخلفة ؟ أنا جوزك .. جوزك يا نور فوقي
_ مش فاكرك ياض
_ وانتي انهردا كنتي بتولدي
_ ايوه بردو مين دا يا مهاب ؟
_ دا ابن الدكتور
_ وانت جايبلي ابن الدكتور اعمل بيه
_ لا كدا كتير .. كتير اوي
_ بس فيه منك يا مهاب
_ اه معلش .. اصلي ابوه بقا
_ يحبيبي شوف ...
_ قمر طالعلي مش كدا
_ شايف قورته عريضة شبهك ازاي
_ انا قورتي عريضة !
_ ايوه دي شبه ميدان عابدين
_ دي قورتي ؟
كنت بحسس على ملامح ابني وببتسم في نفس اللحظة الي كان بيحسس فيها مهاب على قورته
_ مناخيره هتطلع طويلة زي أمك يا مهاب
_ في ايه يا نور .. الواد لسه عنده ساعات .. انتي بتتنمري على مين يا بنتي دا ابنك فوقي
_ طب احلف بالله اننا مجوزين بجد
_ والله العظيم مراتي و...
_ يعني انت مأجبرتنيش على فعل الخطيئة ؟
_ خطيئة ايه يبنتي .. يخربيت اهلك هتودينا في داهية
_ انا اخر حاجة فكراها انك اتقدمتلي في حفلة التخرج
_ ايوه وجيبت بوكية ورد بـ ١٣٠ جنيه
_ مش كنت جبت سندوتشين شاورما احسن
_ مكنتش اعرف الي فيها
_ وروحنا جبنا الدهب من عمو صابر
_ واتخانقنا عشان منزلتكيش تشربي قصب
_ ايه قلة التقدير دي
_ وبعد سنة واحدة اجوزنا
_ ايوه وأمك معجبهاش الستاير
_ أمك ؟!!
_ ايوه امك يا مهاب مالك ؟
_ وغيرنا لون الأوضة بتاعت الأطفال
_ وجيبنا لبس البيبي
_ ايوه وكان غالي وكنت ناوي أبيع الطحال
_ وجبتلي سوشي
_ اه ورمتيه
_ مهو معجبنيش
_ وبتشتريه ليه ؟ اما متعرفيهوش بتشتريه ليييييه ؟ كتر فلوس هي ؟ ولا انا شغال في بنك ؟
_ مهاب ! انت شغال في بنك فعلاً
_ واريڤير
_ طب احلف بالله اننا اجوزنا
_ وحياة ابني
_ ابنك مين ؟
_ يحوستي ياني
************************
#نانسي_أشرف( نان )
