الأرض | ١٥ فبراير ٢٠٢٣
_ هتيجي فيكي
بهدوء رفعت عيني ناحيته
كان واقف على أرض منسوبها أعلى مني، ماسك طوب صغير وواضح انه بيرميهم في البحر
لقيته نط ووقف جمبي.
_ أصل الحته دي بتاعتي
متكلمتش وسيبته ومشيت.
فضلت أتفرج على الزرع والأماكن الخضرا الكتيرة الي على امتداد واسع قدامي.
أنا من الناس الي عمرهم ما شافوا اللون الاخضر بكساء بالمنظر دا
حياتي كلها كانت بعيدة عن البلد الي اتولد ابويا فيها وسابها يجي من تلاتة وعشرين سنة عشان بنته ترجعلها بالاكراه مش بالرضا
_ دي كمان الحته بتاعتي
رفعت عيني تاني لنفس صاحب الصوت
لقيته بيبتسم بطفولة مفرطة، سيبته ومردتش
فضلت اتمشى وانا بفكر
اي نوع من العلاج النفسي الي يخليني اسيب مكان اتربيت وعيشت جواه عشان اجي مكان محدش يعرفني فيه ولا شافني فيه قبل كدا الا لو..
_ اسكوزمي الحته دي بقا بذات ..
_ بتاعتك مش كدا ؟
من فترة اتشخصت بمرض نفسي غريب
بيقولوا انه نادر
وهو فقدان الذاكرة المؤقت الناتج عن صدمة عصبية بيتعرض ليها المريض وخصوصاً في سن الشباب.
تخيل تعيش تفاصيل مع ناس .. تخلق ذكريات مع غيرهم .. تعيش حياة كاملة .. وفي لمح البصر .. كل شئ يتمحي .. وكأن مكنش فيه حد هنا .. كأنك كنت في ثقب أسود شفط هويتك ورجعت ايد ورا وايد قدام
ودا حصل بالتناوب مع وفاة بابا الي كان باقيلي في دنيتي
_ اااااه
صرخت بيها بعد ما حسيت ان في طوبه صغيرة اتخبطت في راسي
رفعت عيني لقيته الواد اياه
اتشعلق في جزع الشجرة وفجأة لقيته قدامي
_ لا مؤخذة اصلها كانت الوسيلة الوحيدة اني الفت نظرك
_ تقوم فاتح راسي بالطوبة !
_ لا ما انا عامل حسابي انو يبقى خربوش صغنون
بصيت في عنيه،
كانت مزيج بين العسلي والاخضر الغامق وبشرته قمحي.
_ هو انتي اسمك ايه ؟
_ ......
_ طيب انتي ساكنة هنا ؟
_ .....
_ شكلك غريبة عن البلد.
مكنتش برد عليه وهو كان لحوح
بس للحظات حسيته لطيف .. لذيذ .. حبوب
_ تاكلي درة ؟
صرخ بيها بحماسة مفرطة
_ حتى لو وافقتك فين الفرن او النار الي هتسويه بيها
_ يااااه بسيطة
جري بعيد كام خطوة ولقيته جاب قُلح وطلع من جيبه كبريت.
_ تعالي اقعدي
لقيت نفسي قعدت فعلاً
_ خليكي هنا متتحركيش .. احسن الديابة تيجي تاكلك
_ يسلام! طب ما ممكن ياكلوك انت .. افضل مستنياك باقي العمر ؟
