_ ابنك بيقول على بنتي يا رشاد يا بسمة هانم
_ لا .. سي اموسيبل .. ابني مستحيل يقول حاجة زي دي
_ بس انا قولت يا مامي
فاكر بصتهم الاتنين ليا، و ابتسامتي ليهم هم الاتنين و نظرة المديرة و وقفتي الواثقة ولا كأني عامل مصيبة
بس فاكر بردو بصتها وهي واقفة جمب مامتها مبتسمة بتحدي وثقة متفوقة عليا و متحدية ثباتي !
_ التيم محتاج ولد و بنت .. أحمد و جهاد .. مصطفى و منار .. منيب و أيتن
_ ايه ؟ لا يا مس لا
_ هو ايه الي لأ يا منيب ؟!
_ مش عايز ابقى مع رشاد
_ مين ؟
_ يا مس انقليني من التيم دا
_ مفيش نقل يا منيب و اتفضل امسك الكورة بتاعتك و اقف جمب زميلتك
ترينج ازرق وشعر مربوط على هيئة ديل حصان زي ما البنات بيقولوا عليه، عنين جامدة بلون بني و جسم لا ينم عن الأنوثة بصلة
في العمر الي كنا فيه انا وهي كان عنر بدأت فيه البنات تاخد منحنيات تانية غير الي اتعودنا عليها زمان و احنا اطفال .. اه طبعاً اطفال
انا انهردا عندي خمستاشر سنة انا بقيت راجل لكن اما كان عندي اربعتاشر ونص كنت لسه عيل
_ انت مش بتديني الكورة ليه ؟ انا في التيم بتاعك مش فريدة !!
_ وانا مبحبكيش انتي بحب فريدة
_ مش بالحب يا نايتي احنا تيم و لازم تديني الكورة !
_ لا بالحب يا رشاد انا اصلا بخاف أقرب منك لتضربيني
_ نايتي أوي
_ رشاد أوي
بعدت عنها وانا عارف نهاية حوارنا ايه، هي هتقول عليا نايتي وانا هضحك و اقف وسط الولاد بعد المدرسة و اقولها يا رشاد وهي خارجة و احقق الكومديا و فريدة تضحك
روتين معتاد بقا تقريباً شبه يومي، هي اتعودت و مبقتش تجيب مامتها و انا عملت أب جريد لنفسي و بقيت أقولها في الشارع بعد المدرسة و قدام الناس كلها !
_ دا مكاني
مردتش وفضلت حاطة السماعة في ودنها
_ بقولك دا مكاني
شالت السماعة ببطئ شديد و رفعت عنيها ليا
_ شاري الباس بإسمك مش كدا
_ كدا
حطيت ايدي عالكرسي الي متعود اقعد عليها اما هي ابتسمت وبصت لايدي ورجعت تبصلي
_ طب روح اقعد بعيد يا حمادة عشان منزعلش سوا
_ هتعملي ايه يا رشاد هتديني بالبقسماط في عيني ؟
_ اتحداني يا نايتي و شوف مين فينا الي هيسقسق لتاني البقسماط
_ انا مش متحرك و مش هقعد غير هنا
_ وانا مش هقوم
في اللحظة الي خدتني فيها الجلالة و مسكت شنطتها عشان احدفها بعيد لقيتها مسكت ايدي ولفتها في ثانية، صرخت من الوجع الي سرى في جسمي مرة واحدة و بصتلها بزهول والمشهد كالتالي
انا واقف وهي واقفة ورايا ماسكة ايدي ورفاني وانا مديها ضهري وجسمي مقابل كل العيون الي في الباس حوالينا
