مطار القاهرة الدولي| ١٧ ديسمبر ٢٠٢٢
_ من فضلك .. الـ seat بتاعي مش لقياه
_ مش لقياه ازاي يا فندم
_ مش فاهمة ايه التسيب دا
_ ازاي مش..
_ خلاص مش مشكلة بقا انا هنزل واركب طيارة تانية
_ تركبي طيارة تانية ايه ! هو مكروباص المؤسسة!
بصيت في التيكيت بتاعتها وابتسمت
الابتسامة العملية الي بتشد عضلات وشي طول اليوم.
_ اتفضلي معايا انا هوديكي ليه
كانت لازقة فيا
بتتلفت للناس حواليها
سمعتها وهي بتبلع ريقها كذا مرة
_ اتفضلي دا مكانك
_ لأ
_ لأ ايه!
_ لا انا عاوزة اقعد جمب الشباك
_ يا فندم !
_ مليش دعوة قعدني في حته تانية!
_ بكلمك بجد والله مين اقنعك انه مكروباص !
ربعت اديها وقعدت على مضد
كنت همشي لقيتها مسكت في كفي
_ ايه الي بيحصل!!! في ايه !
_ الطيارة بتتحرك !
_ على الأرض لسه !
_ ايوه
_ لا سوري .. متفقناش انها تمشي عالأرض انا هنزل اخد مكروباص و...
_ يا فندم هتروحي أمستردام بالمكروباص
_ لا بالتوكتوك
_ عسل يا فندم
_ نزلوني بقولك
_ يا فندم يعني الطيارة هتطير من غير ما تاخد لحظات عالأرض!
_ لا انا عاوزة انزل .. عاوزة بابا .. هاتولي ماما .. أنا ...
ركزت في وشي الي كان ثابت على هيئة واحدة
كأنه لوح تلج
_ انت بتضحك على ايه
_ مش عارف
_ طب بطل !
_ صدقيني لو اعرف هعمل كدا
" سيداتي سادتي الرجاء قفل الأحزمة استعداداً للإقلاع"
_ لو سمحتي .. لو سمحتي!
قربت منها مرة تانية
_ هي مش بترد ليه!
_ تلاقيها مشغولة مع راكب تاني .. لو محتاجة حاجة أ..
_ لا انت رخم
_ ميرسي يا فندم
_ انت بتضحك على ايه يا بارد !
_ ببتسم لاشراقة جديدة يا فندم
_ انت بايخ
_ على قلبي زي العسل يا فندم
_ طب روح
_ مش كنتي بتنادي على ...
_ روح مش عاوزة حاجة.
سيبتها لحظة وبصيتلها بطرف عيني
كانت بتحاول تلبس الحزام ومش عارفة.
_ شدي الحزام ودخليه في الحديدة يا فندم
_ لو مبطلتش يا فندم دي هشيل الحديدة وارzعها في نفوخك
حاولت ومفيش فايدة
قربت انا ومديت ايدي سحبت الحزام وربطته
رفعت عيني لعنيها
_ تمام كدا ؟
وشها احمر لحظة وبعدت عنيها وبصت للحزام
_ تمام.
سيبتها وبدأت اشوف شغلي مع باقي الركاب
ورجعت اقف مكاني
بدأت أشرح الممرات الي في الطيارة بأسلوب الإشارة
عيني غصب عنها كانت بتيجي عليها كل لحظة.
وهي بتبصلي بانتباه.
خلصت واتمنيتلهم رحلة سعيدة.
