السنتر | ١٣ فبراير ٢٠٢٣
_ اسمك مش موجود في المجموعة دي
_ ايوه عارفة
_ ....
_ ....
_ ايوه يعني وبعدين ؟
_ انا جاية احضر مع صحابي
_ لا معلش الـ seats كلها محجوزة في المجموعة دي
_ سيتس! متقول المقاعد او الكراسي هو انتوا ليه اوفر كدا
_ احنا مين !
_ الاسيستانس
_ اه هو احنا كدا
_ بقولك ايه! انا داخلة
شديتها من الكابتشو بتاعها وطلعتها قدامي
_ مفيش دخول يعني مفيش دخول
_ والله؟
_ اه والله
_ احلف
_ انتي عبيطة ؟ ما انا لسه حالف
_ على فكرة بقا انت بارد
_ وانتي رخمة وسئيلة
_ ايه دا !!! انت بتشمني وانا في ثانوية عامة !
_ ايه يعني ثانوية عامة مش فاهم
_ واما نفسيتي تبوظ وشعري يقع واحلامي تتحط على صخرة السيتس
_ امممم
_ اما أروح أقعد افتح واتس وفيس وانستا واجلد نفسي اخر ساعة قبل النوم
_ اه وهتعملي ايه بعدها بقا
_ هنام طبعاً
_ امم توقعت
_ وأما سناني تقع ووشي يكرمش و..
_ اييييه .. ايه الأفورة في الأداء دي!
_ يعني يا ربي هيبقى الواد المترين دا ودرس الاتزان عليا كتير كتير والله
_ انتي لوحدك الي في ثانوية مَ كل دول في...
بصيت على كل الي في المجموعة وملامح الارهاق والتعب والضغط باين عليهم
ورجعتلها
_ مش عاوزين ندخل في تفاصيل طبعاً
_ بقولك ايه ؟
غمزتلي وقربت من المكتب
_ امسك
_ ايه دا !!!
_ امسك بسسسسسس
بصيت لكف اديها
_ دول عشة جنيه
_ عشة جنيه مرة واحدة
_ دا العربون وبعد الحصة هديك زيهم
_ كرم حضرتك احرج امي الحقيقة
_ يلا بقا يحبيب أخوك دخلني المستر هيخش
_ يلا يا بت اجري منها .. يلا يا بت هي ناقصة عته عالمسا
_ ماشي .. وربنا ماشي
_ يلا يا بت
مشيت خطوتين وانا رجعت ابص في الورق
لقيتها رجعت وبصتلي
_ ايه دا مفكرتش تاني ليه ؟
_ دا ايه دا ؟
_ غريبة!
_ هو ايه الغريب
_ مصعبتش عليك ليه ومتأثرتش
_ معلش .. الحركات القرعة دي هارشها.
_ انتوا معندكوش قلب .. تقريبا شايلينه وحاطين بداله كشف الحضور
_ يلا يا بت يا امو دم تقيل من هنا هي ناقصة!
مشيت ورجعت تبصلي مرة اخيرة
_ remember me .. ماشي ؟ ... remember me
حدفتها بالقلم عشان تمشي والمرادي مشيت فعلاً
في المجموعة التانية حاجة جوايا كانت عاوزة تشوفها
عيني بدأت تجري على كل البنات بس ملقتهاش
حماسي الي كنت جاي بيه اختفى فجأة
لكنه رجع اول ما شوفتها داخلة من البوابة وبتقف قدامي
وشها كان أحمر وشكلها متبهدل
_ معلش اصل أبويا اتخانق مع أخويا وماما عملت سمك وانا مبحبش السمك فخالتي رنت على ماما وقالتها ان جوز عمتي مسافر قطر و....
_ ايييييييه! بنّام بدري
_ عديها وحياة أبوك
