لو الواحد يعرف نتيجة كل إختيار، لو يعرف مثلاً القرار الي خده في اللحظة دي نتايجه بعدين هتبقى ايه
مكناش لا انا و لا أنتي هنبقى في الموقف دا
_ لو سمحت يا شيخنا خلصنا
_ يا بنتي قرار الانفصـ.....
_ انا موافقة و هو موافق
_ وابنكوا؟
_ حاجة ترجعلنا .. احنا سوينا كل حاجة
كنت قاعد قصادها مش قادر احرك جسمي، باصصلها بس مش قادر أتكلم او ادي ريأكشن، عضلات وشي متجمدة .. عيني ثابتة عليها مبتتحركش ببص لملامحها وكأنها أخر مرة
عنيها البنية و ملامحها العادية .. روميساء مراتي عمرها ما كانت ست مبهرة في الجمال .. بس طول عمرها مبهرة بروحها .. ضحكتها هزارها .. سرحت في اول يوم جمع بينا
_ يلاهوي هقوله ازاي حاسب يسطا !!! .. افرض انه مش عايز يحاسب ؟ افرض هو مستعجل و مش عايز يقف .. انا هنزل معاه وخلاص و ابقي امشي محطتين مش مشكلة
كنت قاعد في الكرسي الي قصادها في الاتوبيس وغصب عني لقتني رامي ودني، بصيتلها بطرف عيني
_ عاوزة تنزلي فين ؟
_ وانت مالك ؟
_ انا غلطان خليكي انزلي معاه وامشي بلاد الله عشان تروحي
_ وانت مالك انت انا طلبت منك حاجة
_ يستي خلاااص انا اسف
_ مش هتبطلوا ابداً حركاتكوا دي
_ احنا مين .. وحركاتنا ايه
_ عايز تعرف انا نازلة فين عشان تطلع تسرق الـ375 جنيه بتوعي يا أخي اتقي الله
_ يستي 375 ايه الي هاخدهم قولي اسم الشارع الي هتنزلي فيه عشان ...
_ عشان ايه
_ عشان انا ابن كلب حيوان أصلاً .. حاسب هنا يسطاااا
نزلت وحسيت ان في حد ماشي ورايا، التفت لقيتها
غصب عني مقدرتش اداري ضحكتي و وقفت في نص الشارع
_ نزلتي ليه ؟
_ مهو .. مهو لو نزلت معاه همشي محطات كتير .. اما هنا ممكن اوصل أسرع
_ الشارع بتاعك اسمه ايه
_ جمال عبد الناصر
_ ياااه بعيد اوي
اومأت براسها ونزلتها زي الأطفال، ابتسمت وقربت منها
الشارع ضلمة .. ممكن امشي معاكي لحد اول عمود نور
بصتلي وسكتت فمشيت خطوة بعيد عنها عشان اطمنها
_ أهو .. شارعنا هناك أهو
وقفنا على أول المبنى بصتله ورجعت أبصلها
_ أنتي مش من هنا ؟
_ آه
ومشيت خطوتين ناحية السكن بتاعها
_ ودي معلومة تانية عشان اما تيجي تخطفني
قربت من البوابة و حطيت ايدي عالسور الي كان حاجز ما بينا
_ طب قوليلي اسمك عشان اما اجي أخطفك ابقى عارف أنا بخطف مين
التفتت _ روميساء
وراقبتها لحد ما طلعت و عيني طلعت على اليافطة مرة تانية
" سكن الطالبات "
من بعد اليوم دا و انا ملازم الشارع، وتحديداً المبنى الي هي ساكنة فيه
روميساء في الفرقة التانية تربية رياضية فبتطلع كل يوم بالترينج بتاعها و ازازة لبن كبيرة في ايديها و أول وش كانت بتشوفه كل يوم كان أنا
