_ يربي!!!!
نزلت من العربية وجريت ناحيته
_ انت كويس
_ ااااه
_ انا اسفة والله انت الي ظهرت قدامي فجأة
_ اممممم
_ معلش والله مكنتش اقصد ادهسك بالعربية
_ ااااااه
_ انا اصلي لسه واخدة الرخصة انهردا و كنت رايحة اوريها لماما بس عمتو طلبت مني أ ...
_ ااااااه
_ على فكرة عيب تقاطع كلام لايدي شبهي
_ بمووووت .. بموووت يا مؤمنة
_ يلاهوي! .. هروح في داهية
قعدت جمبه على الرصيف وحطيت ايدي على راسي
_ هموت .. وهدخل السجن وهبقي سوابق و.. و.. و .. هيقصوا شعري زلابطة!
_ .....
_ وهيقصوا ضوافري .. لا .. دا كابوس!
لقيته نام على جمبه وحط صوابعه على راسه
_ طب ما ايه رأيك نروح المستشفى .. يمكن .. يمكن..
_ لا خلاص
_ خلاص انا ميت حاليا !
_ ايوا
_ اممم .. ليه يا ربي بس دا احنا بنستفتح
_ بتستفتح!
_ هه! .. انا قولت بنستفتح! اه انا اقصد ..
سكت لحظة وبصلي
_ انتي هتناقشيني! .. دا انا هوديكي في داهية ..
وقف وركب العربية
_ اتفضلي وديني عالمستشفى
_ هه
_ يلا
_ حاضر حاضر
ركبت العربية وطلعت عالطريق وكان ضلمة جداً
قبل ما احس بيه طلع من ايده سلاح أبيض وحطه على رقبتي
_ ايه دا ! ايه يا أستاذ دا !
_ دي ! .. دي قصافة
_ يراجل خضتني
ورجعت اسوق عادي وهو لسه حاطت السلاح على رقبتي
_ البت دي مجنونة ولا ايه
مسك بايد دريكسون العربية
_ وقفي العربية انتي مخطوفة
_ اييييه!!!!
سبت الدريكسيون خالص فهو الي اتوتر ومسك بايديه الدريكسيون
_ فرامل .. دوسي فرامل يخربيت ابوكي هنتقلب
دوست فرامل فالعربية وقفت
نزل من العربية
_ اطلعي
_ طب متشدني وتوقعني عالأرض!
_ لا والله لسه متوضي
_ اه اوكي
نزلت ووقفت قصاده
_ انتي مخطوفة .. ايه الكلام ؟
_ زي الفل
_ حلو اوي .. اهم حاجة التفاهم بين اي اتنين
_ شكلك بنت ناس .. عربية وايفون .. وايربودز
_ والله ما حيلتي الا خمسين جنيه هجيب بيهم طبق كشري
_ بخمسين جنيه طبق كشري! اه يا أغنيا يا الي شافطين البلد
_ كان لازم اشك فيك .. ما انت حلو وامور و....
_ ايه!
_ ......
_ ايه يا ستي ايه البصة دي!
_ معقول!
_ ايه!
_ لا مش معقول!
_ ايه يا محمد يا فؤاد !
_ اكيد انت زعيم المافيا الي هتخطفني وهتعذبني وفي الحلقة العشرين هتعلن حبي
_ ايه دا ؟
_ وهنجيب يوسف وسهيل!
_ اه دي مجنونة
_ فين باقية المافيا بتوعك .. لا .. لااااا
_ وطي صوتكككك
_ متقولش انهم اتقلبوا ضدك
مسكت ايده
_ حتى لو العالم كله ضدك انا جمبك
_ لا اله الا الله ! .. يخربيت الواتباد الي بوظ سمعتنا
_ قولي بصراحة انت حاسس انك وحيد رغم كل الي حواليك؟
_ لا انا بلعب اسكواش خميس وجمعة عادي
_ انا عارفة انك بتظهر القسوة وانت من جواك ويفر لامبادا بالفراولة
_ اه
_ بقولك ايه وعهد الله بعزم مولاي تهون الشدائد
_ طيب يا شجر الدر معاكي رقم حد نطلع منك بأي مصلحة
_ صدقني انا عارفة ان ابوك كان قاسي عليك
_ لا حول ولا قوة الا بالله ماله بس حمادة
_ حمادة مين
_ ابويا
_ الي كان بيطفي في فخادك السجاير!!!!
_ يا بنتي .. يا بنتي روح السيماريست الي جواكي افحمتني
_ بجد لازم نقلل البارتات .. قولي بحبك دلوقتي وهنسا ماضينا الأليم
_ ماضي مين انا عارفك من ساعة
_ ساعة اه .. بس حسستني اني اعرفك من اول الرواية
_ الرواية !
_ امممم .. اسمك ايه
_ أ...
_ أكيد أدم
_ لأ
_ أسر
_ لأ
_ أوس
_ لأ
_ زين ؟
_ بعد اذن السجل المدني .. اسمي أحمد عادي
_ ايه دا ! مش ممكن ! .. فين الاسم السنمائي
_ يوووه
ركبت العربية
_ اركبي عشان اروحك
_ لأ
_ تمام
_ ايه دا لأ .. اتفضل انزل من العربية واحملني بين زراعيك كالفراشة حالا
_ لا مليش مزاج
_كدا تحرق الاحداث!
_ يا ستي انا اسف .. انا اسف والله .. اول واخر مرة .. بصي انا هتوب
قربت منه وابتسمت لعنيه
_ انا كنت عارفة ان داخلك رجل اصله طيب
_ ايه دا ؟
كنت بمدله شفايفي
_ بوسة النهاية !
_ بقولك متوضي
_ طب يلا نطلع على المأذون
_ لا هتلاقيه قافل .. محدش بيجوز دلوقتي
_ لا انا عارفة واحد معرفة
_ يا رب انا كنت بسرق ميبقاش الابتلاء بالشكل دا
_ يلا عشان منتأخرش
_ يا رب أ...
_ يلا !!!
_ طيب جاي!
*****************
_نانسي أشرف
وبكدا أقدر أقول اننا كملنا 100 اسكريبت في البارت دا من حواديت نان
اتبسطت جداً في رحلتي معاكوا واتمنى كل الي جاي يعجبكوا ♥️
تابعوني على الفيس هتلاقوا حواديت تانية كتير وترقبوا جزء تاني نكمل بيه رحلتنا ♥️♥️♥️
