_ عمو لو سمحت ممكن تقرالي مدة الصلاحية
_ وريني يا يونس
بصيت لبابا وهو بيقرأ تاريخ الإنتاج وبيبتسم للولد الصغير
_ خد يا حبيبي لسه بدري، وابقي سلملي على بابا
ابتسم الولد الصغير وطلع يجري أما انا قربت من بابا ونزلت معاه كراتين الشيبسي الي كانت في الرف الي مكنش قادر يطوله
_ غريبة! لسه في حد بيقرأ تاريخ الإنتاج
_ أمه عودته على كدا
بابا اداني ضهره وهو بيوزع الكراتين في مكانها
_ عيلة غلبانة، الله يكون في عونها
_ عيلة؟!!
_ اه بتاعت ستة وعشرين سنة كدا
_ وبعدين
_ جوزها جاله المرض اياه .. الله يحفظنا
_ لا حول ولا قوة الا بالله
رص الكراتين أما انا قعدت على الكرسي الي قدامه وهو مد ايده على كوباية الشاي وناولهالي
_ البت متهنتش على حاجة خالص، اتمرمطت في المستشفيات والعمليات والكماوي اما تشوفها متعرفهاش، مش دي عايدة بتاعت زمان لا
_ عايدة ؟!!!!
قولتها بزهول خلى بابا ياخد باله، بصلي من غير فهم وهو معلق كوباية الشاي في الهوا
_ عـ... عايدة
_ ايوه عايدة الريحاني
كان واضح انه وقع في الكلام ومكنش عايز يقولي هي مين
بس انا كدا كدا كنت هعرف يا بابا .. كنت هتخبي عليا لامتا؟!
_ عايدة!!!!!
قلبي للحظات حسيته وقف، حسيت العالم كله من حواليا وقف، فضلت واقف في مكاني للحظات مش مستوعب
عايدة! .. جارتنا في الحي القديم .. وحب حياتي
_ يونس؟!
بصيت لبابا _ هه
_ انت معايا ؟
_ ايوه .. ايوه معاك
لا مكنتش معاه كنت ببص ناحية الشارع الي دخل منه الولد وانا تايهة وقلبي مش على بعضه
قالولي زمان عشان تنسى حد لازم تشغل بالك بكل حاجة، تغتنم أي فرصة تخليك قادر أنك تفكر في حاجة غيره ودا الي عملته اما سافرت دولة من دول الخليج وبدأت بيزنيس محترم وعملت ليه اسم
_ هات بخمسة عيش يا عم رجب
لكن في لحظة اللقا كل حاجة بتتغير، كأنك كنت حاطت فوق فوهة بركان ورقة كارتون تسدها وأول ما عيني جات عليها كل حاجة رجعتلي والبركان انفجر
خبطت فيا وهي شايلة العيش بس مرفعتش عنيها ناحيتي
_ انا اسفة والله
_ ولا يهمك
_ أصل.....
وكلامها اتجمد وهي بتبصلي
احساس غريب أنك تقابل عين كنت بتحلم بيها كل يوم تقريباً، احساس عدم قدرة على استيعاب الموقف ذاته
اذا كان حقيقي ولا انت لسه في وهم الحلم
_ يونس!!!!
قالتها وهي لسه في حالة زهول قبل ما الولد الصغير يجري ناحيتها
