المعادي | ٢٨ نوڤمبر ٢٠٢٢
_ اهو اصطبحنا
كنت ماشية في الطريق الصبح قبل ما الاقي ريس أسود بيكسر عليها كذا مرة
ضربتله كلاكس كذا مرة وانا بزعق
_ انت يا ڤان دييزل!
دوست بنزين لقيته زود السرعة اكتر
_ اااااه .. دا تحدي .. تمام
دوست بنزين اسرع وسرعة العربية زادت لحد ما وصلنا انا وهو في نفس اللحظة لنفس النقطة قدام عمارتنا.
نزلت من العربية وروحت ناحيته.
_ انت مجنون يا جدع انت ؟!!؟
شال الخوذة وابتسم
اما انا وقفت لحظات مكاني
عقلي اتشل عن التفكير وعيني فجأة جابت كذا موقف من زمان
صور متضاربة وسريعة لمواقف بين اتنين في ابتدائي
اعدادي
ثانوي
لحد النقطة دي.!
_ ازيك يا نوران
_ كان لازم اعرف ان حركات العيال دي بتاعتك
_ لسه لسانك طويل زي ما هو.
_ وانت لسه استعراضي زي ما انت
دخلت العمارة لقيته داخل ورايا ولقيت ناس بينقلوا العفش
_ ايه الي بيحصل يا جمال
_ دا الساكن الجديد الي واخد الشقة الي قصادكوا
جيه من ورايا وهمسلي بابتسامة ساذجة
_ أنا ايوه.
بصيتله بغيظ وطلعت جيبت الورق الي نسيته ونزلت ركبت عربيتي مرة تانية ورجعت للمدرسة
_ مس نوران
_ اتفضل
_ في ولي أمر لطالبة عاوزك
_ اه .. اوي اوي
قفلت باب الـ class ووقفت مستنياه
_ ايه دا يخربيت الصدفة سبحان الله مش مترتبة خالص!
_ انت !!!
_ صدف .. بقولك صدففف
بصيت للبنت وبصيتله
_ انت بتراقبني
_ اهدى يا رأفت يا هجان .. اراقب مين .. انا كاريزمتي وجمداني ميسمحوليش أراقب حُرمة
_ حُرمة !
_ اه انتي جامدة وعنيكي حلوة و...
_ اطلع برا بدل ما انده الامن
قرب خطوة
_ تؤ مش هتقدري
ربعت ايدي وركزت معاه
_ لا و ثقة !
_ أنا جاي أقدم لبنت ابن عم بابا شوفي هتطرديني ازاي.
_ بنت ابن عم بابا اه
نزلت لمستوى البنت بجسمي وابتسمتلها
_ اسمك ايه يا حلوة
هو رد _ چودي
والبنت ردت _ جمالات
والاتنين في نفس اللحظة
_ هههه دمها خفيف .. چودي اسمها چودي
_ قولتلي تقربلك ايه ؟
_ بنت ابن خالتي
_ مش بنت ابن عم بابا يعني
_ شكليات.
ناديت على مدرس زميل ليا وطلبت منه يوديه عند المدير
وابتسمتله ابتسامة صفرا ودخلت الclass
راقبته من الشباك وهو بهدوء بيسحب البنت وبيتخانق معاها.
