_ ااااه يخربيت سنينك!
_ أنا آسف .. آسف والله أنتي كويسة؟!
_ كويسة ايه؟ انت خلعتلي كتفي!
_ وريني كدا
_ اوريك ايه؟!
بعدت ايدي وهي بتنط من مكانها بعيد
_ انت اجننت يا ابني ولا ايه؟!
_ لا والله انا...
_ انت متحرش؟ وعهد الله متحرش
_ انا مش ...
_ انا قولت بعنيك الحلوة دي انت مش مظبوط
_ يستي أنا..
_ قولي دا مرض ولازم نلحقه عشان متملوش البلد اكتر ماهي مليانة
_ لا مش متحرش انتي فاهمة غلط
_ والله عال بقيتوا بتلبسوا حلو و بترجعوا شعركوا لورا، غريبة مهنة التحرش مين فاهمها
_ يستي انا مش....
_ بتقبض كام؟ فلوس كتيرة يعني؟ قولي اجي اشتغل معاك
_ انا مش .. ايه دا ايه في ايه؟
بصتلي من تحت لفوق وهي بتمشي بعيد عني وشايلة اللاب بتاعها
_ خد بالك انا براقبك وهراقبك
قعدت تشاور بصوابعها على عنيها اما انا راقبتها وهي بتبعد بهدوء وانا حاطت ايدي في جيبي وبضحك
_ مساء الخير يا شباب زي ما قلولتكوا انهردا عندنا ضيف في المحاضرة
_ شوفتي امبارح المسلسل خلص على ايه
_ امممم مكنتش نهاية الي هي بس ... هارسود!!!!
_ في ايه يا روضة ؟
ابتسمت وانا واقف من بعيد وهي بتلتفت ببطئ ناحيتي، والابتسامة اتقلبت لضحكة وهي واقفة متنحة جمب صاحبتها
_ روضة!!! انتي تعرفي القمر دا ؟!
_ دا!! .. دا!!!
_ الدكتور يونس رشوان زميلكم في علاج وبيدي كورسات في كيفية الدفاع عن النفس ضد..
ابتسمت بثقة وانا بقرب خطوة وبعدل المايك الي كنت لابسه
_ المتحرشين .. ضد المتحرشين
رجعت الخطوة لورا وانا بتحرك على الاستيدج وبسيب عنيها المزهولة
_ ومش بس المتحرشين اي حد بيحاول يهاجمكوا او يتعرضلكوا بأي شكل
ابتسمت مرة تانية وانا برجع ابصلها
_ حتى لو خبط فيكوا بالغلط في الشارع
قعدت مكانها وبدأت أنا استرسل في كلامي
_ بسسست .. انتي تعرفيه
_ هه؟
_ هه ايه يا روضة؟! مالك يبنتي مبلمة من ساعة ما دخل القاعة ليه ؟
_ مفيش يا نور مفيش
_ دلوقتي هوريكوا شوية حركات سريعة تعملوها لو حصل اي نوع من انواع التعرض بأي شكل
رفعت راسي ناحيتهم مرة تانية
_ بس عاوزة متطوعة
بدأوا كلهم يهمسوا ويعدلوا في قعدتها والي بتشاور والي بتحاول تلفت النظر، ابتسمت وانا بتخطاهم كلهم ليها وهي بتحاول تداري نفسها
_ الانسة الي قاعدة في البنش التالت
_ يا رب مش انا يا رب مش انا .. قومي يا ليلى بينادي عليكي ؟
_ انا يا دكتور؟!
_ لأ .. الي جمبك
