طريق الاسكندرية الصحراوي | ١٦ فبراير ٢٠٢٣
_ يلاهوي على سنيني السودا
قولتها وانا واقفة بتفرج على كوتش العربية
_ اروح فين يا ربي وأجي منين!
فضلت ابصله وشوية اعيط وشوية اتنطت في مكاني
_ اعمل ايه ! .. اكلم مين
بصيت في الفون لقيته نو سيجنل،
فضلت اروح واجي في مكاني
_ يا ربي! .. دا اهم انترڤيو .. دا بعديه استلام الشغل ..
قعدت على الرصيف وانا فاقدة الأمل
حتى العربيات مش بتعدي كتير على الطريق في التوقيت دا
بلعت ريقي وحطيت وشي في الأرض
فضلت أفكر في أعمل ايه وهتصرف ازاي
لحد ما لقيت ايد بتتمد من العربية وبتيدني فلوس
لحظات على مستوعبت الموقف، وقفت في مكاني
_ خد هنا !!! .. انت فاكرني شحاتة!!!
سكت لحظة
_ وعشرة جنية!!! اجيب بيها تشيكلس يعني ولا ايه !
لكنه كان مشي شوية عليت صوتي وانا بقول
_ على فكرة انت راجل جلدة معفن
لكني وقفت في مكاني في رعب
_ م .. مالك يا كابتن !!!!!
كان رجع بعربيته،
قلع النضارة وبصلي من تحتها بغرور
_ قولتي ايه ؟!!
_ هه! .. قولت الله يوسع عليك و يعطيك زي ما قلبك كدا على الغلابة الي زيينا يبني!
_ يبني!!! انت عندك كام سنة يا عيل يا سئيل !
بص لعربيتي وابتسم بسخرية
_ غلابة راكبيين مرسيدس الموديل !
_ واما البعيد عينه جابت العربية بتتشملل وتديني عشرة جنية ليه
_ غلطان .. كان المفروض خمساتشر
_ اخخيه على تقل الدم والرخامة
نزل من العربية وقرب
بصيت على الكوتش
هو يبص وانا أبصله وهو بيبص
_ طب ايه ؟
_ ايه ؟
_ ايه انت!!!
_ في مشكلة فعلاً
_ لا وحياة ربنا متقولش!!!
رجع يبص مرة تانية وميتكلمش
_ هي الصورة ثبتت ولا مفيش اشارة
_ طيب .. العربية واضح انها عاوزة يتغيرلها كوتش
_ بسم النبي حارسك وصاينك وضامنك يا طعم يا نايتي
_ نعم!
_ ما انا عارفة انه متنيل محتاج يتغير
_ معاكي استيبن
_ لأ
_ بتعرفي تغيري
_ لأ
_ هو انتوا ازاي يسيبوكوا تسوقوا في السن دا ؟
_ نعم!!!! على فكرة بقا...
كنت بكلمه وهو مديني ضهره ورايح على عربيته وانا ماشية وراه زي العبيطة.
_ وبعدين ايه دا !!! اما اكلمك تبصلي في عيني وتكلمني
_ بس يا ماما
_ اتكلم معايا عِدل انا مش من الزبالة الي انت تعرفهم
_ ايه دا!!! ايه داااا ايه تقمص الشخصية الفظيع دا !
