_ من فضلك
شيلت السماعة من ودني وبصيت ناحيتها
_ أروح محطة الرمل منين؟!
بصيت حواليا لحظة، رجعت شعري لورا وانا بحاول استوعب
_ تروحي فين ؟
_ محطة الرمل
_ محطة الرمل!
شاورت حوالينا انا وهي
_ الي هي دي؟!
_ هي دي ايه؟!
_ انتي منين؟!
_ المنوفية
_ المنوفية اه .. ايوه دي محطة الرمل
كنت لسه همشي لقيتها مسكت في الجاكيت
_ انت متأكد ان دي محطة الرمل
_ اه
كنت همشي تاني فمسكتني اكتر
_ بجد يعني الناس مش هتقول عليا هبلة، دي محطة الرمل؟
_ يستي وعهد الله انا إسكندراني ودي محطة الرمل والعمارة الي هناك دي عمارتنا ودا عم سليمان البواب
_ طـ... طب انت مستعجل ليه ؟
_ رايح اجيب الفطار
_ ايه دا رايح تجيب سمك ؟!
_ سمك؟! اشمعنا سمك
غمزت وهي بتضحك وبتقرب مني
_ اسكندراني بقا وكدا
ابتسمت وغمزت وانا بقول
_ يولاااا يا نبيه انت
_ ها هتجيب جمبري ولا سبيط؟
_ اه يعيني دي مجنونة .. طيب خليني ماشي معاكي ..هو في بني أدم طبيعي بياكل سمك الساعة تمانية ونص الصبح ؟
_ مش احنا في اسكندرية !
_ عادي يعني؟
_ اه ما احنا في اسكندرية
_ يا حجة انتي فاهمة الموضوع غلط احنا بني ادم طبيعيين
_ اومال ايه حوار السمك دا
_ لا انا هتشل
مشيت خطوتين لقيتها بتجري ورايا، حسيت بيها فالتفت
_ في ايه؟
_ ايه؟!
قربت خطوة منها
_ انتي تايهة ؟
_ لا
_ اه يبقى نسيوكي في الرحلة الي تبع المدرسة
_ مدرسة ايه انا في الجامعة
_ ايه!!! انتي في الجامعة !!!
حطيت ايدها في وسطها وقلبت شفايفها
_ مالك بتقولها كدا ليه
_ لا ابداً .. ولا حاجة
نزلت اديها وقربت مني
_ خدني معاك
_ اخدك معايا فين
_ أجيب الفطار
_ آنسة أ.....
_ تميمة
_ آنسة تميمة .. انتي عبيطة ؟
_ ا...
_ أخدك معايا فين انا رايح الملاهي؟!
_ ايوه صحيح في ملاهي في اسكندرية قالولي عليها عاوزة اروحها
_ اوماله .. روحي الملاهي حلوة الملاهي
حاولت التفت لقيتها مسكت الجاكيت مرة تانية
_ وديني
_ اوديكي فين؟ .. اوديكي فييين؟
اتنهدت وقربت منها
_ قوليلي بصراحة انا خلفتك ورميتك في المنوفية ؟
_ انت مش عايز توديني يعني ؟
_ لأ
_ تمام متعوزش انا عايزة
