_ البنت دي مبتعرفش تمثل نزلوها من عالمسرح
نزلت أجري وراه رغم الإحراج الي كنت فيه أما هو التفتلي وهو بيشرب القهوة بتاعته بنرجسية معتادة
_ ثواني يا بوس لو سمحت
_ اممم
_ أنا بس متوترة من امبارح اصل بابا ...
_ ايه هتحكي قصة حياتك يعني ولا ايه ؟
_ لا خالص انا بس ...
_ مبسش انتي مبتعرفيش تمثلي
مسكت ايده قبل ما يتحرك، بصلي بزهول
_ أنا محتاجة ألعب الدور دا
_ وانا اديتك فرصة
_ انا مكنتش في المود
_ وانا المفروض اني استنا المود بتاعك يتظبط عشان تعرفي تعملي الدور كويس ؟!!!
_ يا بوس أنا ....
_ اشششش أنتي مكانك مش هنا .. اتفضلي اما تبقى تعرفي تلعبي الدور و تحترمي مواعيدك نبقي نفكر
بصيت في الأرض وانا بتمنى انها تتشق و تبلعني قبل ما يتدخل محمود المساعد بتاعه
_ أستاذ خليل سارة البديل بتاعها بتعتذر عن الدور
_ ايه ! .. دا ازاي دا ! هو لعب عيال ؟ .. اتصلوا بيها دي كمان
_ بنتصل ومحدش بيرد
_ يعني ايه ؟
بص ناحيتي في زهول
_ مبقاش قدامنا غيرها ؟! .. بقا أمر واقع !
محمود بصلي وابتسم وكأنه بيطمني اما هو قلب عنيه الرمادية وقرب ناحيتي
_ اسمعي .. دي اخر مرة .. فاهمة ؟ انا مستعد اغير المسرحية كلها او اطلع اعتذر عليها .. خدي بالك .. دي اخر مرة
كان بيجز على سنانه وسابني ومشي، محمود قرب مني
_ انت عملت ايه ؟
_ ابداً .. دفعتلها فلوس ما انتي عارفة بتموت فيها ازاي
_ شوفت بيكلم ازاي .. انا مش عارفة هطيقه كدا لامتا
_ معلش يا رضوى ما انتى بردو لازم تفتحي مخك معاه
بصيت ليه وهو واقف مع بقية الممثلين
_ كل دا و اسمه خليل .. اومال لو كان اسمه لؤي كان عمل فينا ايه
_ ستاند بااااي
وقفت عالمسرح مرة تانية، خدت نفس عميق وأنا بحاول استعيد نشاطي حركت جسمي لحظة وغمضت عيني
_ لا مش وقته يا فنانة .. اخلصي عاوزين نبدأ
يخربيت اهلك وانت فصيل
بدأت البروڤا وجات لقطة الرقصة، معرفتش اتحرك مع الشاب الي المفروض برقص معاه رقصة معينة بحركات مترتبة، حركاتي طلعت عشوائية رغم ان الولد حاول بقدر المستطاع انه يتحرك على حركاتي البطيئة
_ كااااات
قالها بنبرة عالية، كنت عارفة انه هيعلق، قلع الجاكيت ورماه و في لحظة لقيته واقف ورايا بالظبط
_ ايه الي مش مفهوم في ام الرقصة .. انتي عارفة دي المرة الكام الي تقعي فيها ! الناس كلها خلصت مشاهدها الا انتي !
