_ ايه؟
_ ايه!
_ ايه أنت! الجو الي هناك دا مش واكل معاك خالص !
_ جو! .. جو ايه!
_ انت ايه يا أخي جبلة!
_ بس .. هي النتيجة
_ مالها !
_النتيجة ظهرت !
_ نتيجة! .. انت متخرج بقالك أربع سنين .. فوق يا موهوم يا ابن الموهومة
_ ايوه ايوه ايوه
_ استوريهات الفيس مش مقلقاك .. ريلز الانستا مش محركاك ؟
_ انا راجل قارئ
_ يعني ايه
_ يعني مش بتاع سوشيال والحركات دي
_ لا حول ولا قوة الا بالله
_ الراجل القارئ بتخاف منه النساء
_ بس يالا
_ حاضر
_ بيقولك مرة صندوق...
_ ايوه حوار يزعل فعلاً
_ ايوه هه ؟
_ هه ايه ؟
_ ها يعني .. وبعدين .. الي بعده .. فين الخطوة الي بعد كدا !!!
_ أنا فعلاً لازم أعمل خطوة
_ الله أكبر
_ لازم أعمل حاجة في وسط الغلاء دا كله
_ الحمدلله
_ لازم أحاول أتصرف
_ لا اله الا الله
_ لازم ا..
_ لا اخلص .. اخلص .. مش داخلة الاسلام جديد أنا دلوقتي
_ مالك !
_ مالك أنت ! هات الي بعده
_ انا هشتغل مأذون
_ حسبي الله ونعم الوكيل فيك
_ فيا !
_ وفي أمك
_ الله ! الله ! في ايه يا ليلى
_ غور من وشي
_ ايه المعاملة دي يا ليلى
_ غور!
مشيت ودخلت الاسانسير
_ طب انا عايز أطلع!
_ معلش الاسانسير عطلان!
_ طب خدي ودي البرتقان دا لأمي
_ هات
شدت الكيس وضغطت على الزرار وطلعت
أنا وليلى جيران بقالنا ٢٣ سنة
أكبر منها بأربع سنين، الاربعة الي خلوني شايف انها طفلة متطفلة لا تنتمى لعالم الكبار .. ايوه ايوه شبهي كدا اه.
_ بقولك ايه
_ اخلص
_ انا عندي ليكي صفقة
_ اممم
_ خدي طبق خبيزة وهاتي طبق محشي
_ وانا هكسب ايه من الصفقة
_ ايه دا ! هو انتي لازم تكسبي !
_ أصلاً !!!!! هو انت كانوا بيعلموك ايه في الكلية
_ خسارة! .. اكيد كنت غايب في المحاضرة دي
_ وانت عرفت منين ان عندنا محشي!
_ ما انا شمشمت قبل ما ادخل .. يا خالتااااااااي
_ اششششش ... امشي امشي .. معندناش
_ لا انا عارف ان في كرنب وورق عنب جوا .. يا خالتااااااي
_وطي صوتك فضحتنا في العمارة
سندت بكتفي على الباب
رفعت حاجبي وانا بحاول انزل عيني لعنيها.
كان الفرق بيني وبينها اكتر من عشرة سنتي.
_ خايفة علي أحبالي الصوتية!
_ لا روح جعر في حته تانية .. احنا واخدين بنادول كلنا
_ اجعر!!! .. دا انا صوتي رقراق وزقزاق
_ احمينا يا رب
_ مش ممكن .. انا ياسمين عز مأكدالي
_ طب امشي يالا بطلناها شغلانة الشحاتة دي.
_ اه صحيح يا ليلى .. انتي مش دكتورة صيدلانية !
_ خير يا رب
_ معندكيش حاجة تسكن القلب !
_ والله يا عزيز لو قولت...
_ اصله من ساعة ما عرفك وهو مش راضي يوقف دق
_ يع .. يع بجد .. ايه القرف دا
مدت اديها بطبق الخُبيزة
وبعدتني عن الباب وقفلته في وشي
_ الله! .. قدري اني طول النهار عمال اعمل بروفهات للقطة دي!
_ ......
_ طب مش هتاخدي طبق الخبيزة!
_ .....
_ يا بت مليان ڤيتامينات يا بت
_ ......
_ كدا ؟؟!!!!
_ .....
_ يا خلتاااااااااااااااي
فتحت الباب
حطت صوباعين محشي ورق عنب في بوقي
مدغت وبصيتلها _ فين الباقي
_ مفيش
_ خدي صوباعين ورق العنب بتوعك احنا مبنشحتش
_ ولا .. ولا ... امشي يالا
_ تمام .. بس ابقي افتكريها
قفلت الباب وفتحته تاني
_ وبمناسبة الاحبال الصوتية .. خلي امك تلم الي عالحبل .. غسيلكوا بينقط على غسيلنا.
_ الي عنده غسيل يلمه يا حبيبتشي
_ انت احول يالا .. انتوا الي ساكنين فوق!
_ ايه دا أصلاً!!!
قفلت الباب في وشي مرة تانية
عدلت لياقة التيشيرت
اتنحنحت وطلعت.
انهردا ليلة راس السنة، اختارت انهردا بذات لأن عيد ميلاد ليلى بكرا
ولأني هحتفل ببداية سنة جديدة وانتهاء سنة كلها كانت شغل وتعب وسهر عشان أقدر اقف على باب بيتها و...
_ جرا ايه .. انت جاي تاكل جاتو يعني ولا ايه!
_ ايوه طبعاً افرضي اترفضت .. مش ابقي خدت حقي ! .. خدي بالك .. الكرتونة انا هاخدها معايا وانا ماشي
_ استر يا رب !
فضلت قاعد هادي لحظات وباصص في الارض
_ طب انت جاي في السكة ولا المحور زحمة ولا انت ايه نظامك
فضلت ساكت
_ لا اخلص .. احنا بنام بدري وابويا عنده شغل الصبح
_ يا عمي .. أنا ..
_ هه
_ أنا ...
_ هااااااا
_ أنا جاي اطلب ايدك من بنتك الكريمة
_ ايه دا ؟!
_ جاي اطلبني من ايدك ؟!!
_ في ايه ؟!
_ بتتقال ازاي
ميلت على ودنه وبابا قاعد في حاله زهول
_ ااه اه .. جاي اطلب ايد بنتك .. لولي
= لولي!!!!
_ ليلى .. احم .. ليلى يا حج
قعدنا نتكلم في الحوار ونجيبه شمال ويمين لحد ما اتنهد في الاخر
= طيب .. ادينا وقت نفكر
_ لا وقت ايه ! .. في صندوق و حوارات والدنيا لبش يا حج .. انجزنا كدا في السريع الله يعمر بيتك
= انجزكوا ازاي يا ابني دا جواز
_ دا هو يدوب نيش وطقم اركوبيركس
= ما شاء الله يا ليلى دمه خفيف .. هتتعاملي مع السكر دا كله ازاي!
_ يلا يا عمي كلم مأذون يجي يخلص
= يخلص!
يا عمي بسرعة مفيش وقت للتفسير
= يا ابني...
الباب خبط وفتحتله والدتها.
_ سبحان الله .. مأذون كان بيتمشي في العمارة عندنا!
= ايه دا ! مين دا !
_ دا إشارة .. إشارة يا حج
قعد الراجل وسطنا وعيني ارتفعت وغمزت لليلى
كانت واقفة مبسوطة و عنيها بتدمع
نظراتها ثابتة على كفي الي في كف والدها
وابتسامتها الي ممزوجة بدموعها بتوسع مع كل كلمة
بتقربنا لحلمي وحلمها من سنين!
_ الحمدلله فلتنا منيها
ضحكت وحضنتها.
سندت راسها على كتفي وقالت بسعادة
_ الحمدلله أخيراً اجوزنا
_ الحمدلله أخيراً هاكل محشي ورق عنب بدل الخبيزة يوم السبت
_ ايه ؟!!!
_ ايه!
*********************
#نانسي_أشرف 🕊️
