_ هسميه حازم
_ ........
_ ايه يلا مالك متنح كدا ليه ؟
_ غريبة! فاكرة أول مرة اتقابلنا فيها يا بسمة ؟
**********************
_ بص بقا أنت هتذاكر كويس السنادي عشان انا عايز انجح
_ طب متذاكر أنت يا ابراهيم ولا لو ذاكرت هيقولوا الحقوا ابراهيم الي ذاكر أهو
_ أنا قولت كلمة واحدة
_ خد هنا رايح فين
_ شايف البنت الي واقفة هناك دي
_ ايوه
_ انا رايح ارخم عالي قاعدة بقا وسع متبقاش غتت
_ مساء الخير
_ الساعة تسعة ونص الصبح !
_ جود مورنينج عوبد
_ عايز ايه يا ابراهيم
_ واو .. وكمان عارفة اسمي !
_ يييييه مش هنخلص
_ رواية ايه الي بتقريها
_ رواية ايه ؟ دا الكتاب بتاع المادة الي هنمتحن عليها بكرا
_ وحياة أبوكِ ؟! اومال ماله السنادي متغير ليه كدا
_ لا حول و لا قوة الا بالله
_ ممكن اقعد معاكِ
_ لأ
_ ميرسي والله، انا بقالي عشر دقايق واقف اما ضهري طأطأ
_ ضهرك ماله ؟
_ طأطأ
_ امممم .. عايز ايه يا ابراهيم
_ سنودتش جبنة بالطماطم دا
_ .......
_ اممممم الواحد زهق مالفراخ كل يوم حلو التجديد
_ انت بتعمل ايه
_ باكل !
_ لا يا شيخ ! دا الفطار بتاعي
_ انا جعان
_ متقوم تاكل في اي داهية
_ بعد الشر عليا و تعيشي ازاي من غيري
_ يسيدي متتنيل تروح تطلب أكل زي كل مرة
_ على فكرة انا عارف انك بتحبيني
_ .......
_ وبتموتي فيا بس بتستهبلي .. ماشي ماشي
_ لا وواثق أوي و بترجع بضهرك كدا قال يعني أمر واقع
_ قوميه
_ هو ايه دا ؟
_ الأمر
_ ياااني على خفة الدم
_ عسل يا هيما عسل عسل
_ قوم يا ابراهيم خليني أكمل مذاكرة
_ مجتيش عيد ميلادي ليه ؟
_ انا حرة
_ مكنتيش جايبة هدية هاه .. انا عارف الحركات النتنة دي
_انا نتنة قوم من جمبي
_ اما اخلص العصير الي انتِ جيباه .. دا برتقان دا ؟
_ يا ربي
_ كنتي خايفة احسن ميكونش في عيدميلاد بقا و تحصل مصيبة يستعر منها المجتمع والقانون و الناس ؟!
_ لا انت و لا عشرة غيرك يقدروا يعملوا فيا حاجة
_ احبك وانت استرونج وومن .. هاتيلي حته مخلل بقا
_ امسك
_ لا انا عايز الزتونة الي تحت
_ هاتها لنفسك !
_ لا مينفعش احط ايدي في المخلل بتاعك
_ لا يا واد بتفهم في الأصول .. امسك !
_ ..........
_ هي اسمها ايه
_ هي ايه ؟
_ الرواية ا .. المادة الي هنمتحن فيها بكرا
_ معرفش
_ دي منزلوها جديد دي ولا ايه
_ انت ايه الي جابك انهردا انت مش المفروض قاعد في البيت
_ اه منا قولت وحشتكوا جيت اسلم عليكوا
_ جيت تسلم ولا جاي تثبت الدحيحة عشان يغششوك
_ ايه دا لا اخس عليكِ انا !!! انا اعمل كدا
_ اومال انت بتعمل ايه دلوقت
_ باكل
_ يا شلل أمي
_ على فكرة أنا طول السنة بجري
_ بتجري فين
_ في النادي .. اصلي داخل على بطولة
_ بطولة ايه وجري ايه .. دا انت بتطلع السلم تنهج
_ سلم عنيف
_ افضل حوّر كدا ولف ودور ياكش نخلص انهردا
_ انتِ عارفة ان الي ساعد كلب دخل الجنة
_ ايوه كدا خش في الحوار على طول
_ منا قولت اخلص فطاري الاول وبعدين نكلم بقا
_ فطارك اه
_ بصي غششيني وانا هجبلك ماك
_ مبكلش من برا
_ انا بردو مبكلش من برا بحسه مش فريش كدا
_ اه عشان كدا بايت في مطاعم الروست وماك
_ مهو انا بحاول اقنع ان الناس ان الأكل من برا مش صحي
_ ربنا يكتر من أمثالك
_ أمين
_ او ياخدك
_ ماشي
_ ها ؟
_ هجبلك روايات أحمد خالد توفيق
_ عندي
_ حسن الجندي
_ عندي
_ محمد طارق
_ عندي
_ اشتريلك معرض الكتاب طيب ولا اعمل ايه
_ ذاكر
_ اه السنة الجاية حاضر
_ لا السنادي، انهردا .. محدش هيساعدك لا انا ولا حد منهم
_ في حد يعمل في حد بيحبه كدا
_ مين بيحب مين
_ انتِ بتحبيني
_ يا شيخ !
_ اه والله انتِ مش واخدة بالك
_ لا
_ طب خدي
_ اخد ايه
_ بالك
_ جلطة .. خفة دمك و سكرك الزايد هيجبلي جلطة
_ معلش والله غششيني بس وانا هذاكر السنة الجاية جامد اوي
_ لأ
_ لو سقطت هعيد السنة
_ أحسن
_ مين هيقعد يرخم عليكِ في البنش الأخير
_ ......
_ مين هيجي ياكل الفطار بتاعك كل يوم لحد ما بقيتي عود بخور كدا ؟
_ .....
_ مين هيشغل اغاني شعبي مالي بتخنقك طول السكة واحنا مروحين في المواصلات ؟
_ ......
_ مين هيعلي صوته جمبك وهو بيغني وانتِ بتكلمي في التليفون لحد ما تخبطيه بالكتاب في وشه تكسريله النضارة امو ٣٤٠ جنيه ؟!
_ انت عبيط ؟ عندك خال أهبل ؟
_ لا بس عندي ابن اختي هجان
_ دا طفل
_ دا مغتصب أطفال
_ ريح نفسك يا ابراهيم لا انا ولا حد هيغششك يا رب تكون فهمت
_ فهمت طبعاً، انتِ فكراني غبي و لا ايه
_ لا ازاي بسم النبي حارسك بتفهمها وهي طايرة
_ هي ايه دي
_ ياااني
_ طب على فكرة بقا عصير البرتقان كان تاص سكر
_ ماشي
_ و الجبنة مش حلوة ابقي هاتي اسطنبولي ..بحبها
_ قوم امشي
_ انا عايز الـ ٣٤٠ بتوع النضارة بتاعتي
_ ها ؟
_ قايم قايم
