_ انتي كويسة ؟!!!
_ خلعتلي كتفي يا اخي!!!!
_ انا اسف مكنتش اقصد
_ هو ايه الي مكنتش تقصد .. ابقى فَتح
_ خلاص قولتلك آسف
_ اصرفها منين اما تخلعلي كتفي مش فاهمة
_ يوووه! يستي انا محقوقلك اني اتأسفت خلاص؟! عديني بقا
_ انت الي سادد السكة
_ الشارع كدا .. كدا .. انتي الي سادة سكتي
_ والله؟! ودا مين الي قال ان الشارع كدا معلش
_ انا
_ ايوه تطلع مين يعني انت !
كنت واقف بشيط وهي مربعة اديها وواقفة تبصلي ببرود شديد، لمحنا واحد بينزل من عربيته وبيقرب مننا
_ شكلكوا انتوا الجوز متعرفوش المكان الي هتروحوه منين
بصينا احنا الاتنين لبعض وقربت منه
_ لا هي مش تبعي
_ يسلام! هو انت تطول اصلاً
_ يستي حد وجهلك كلام دلوقتي ؟!
_ مبكلمكش انت على فكرة
لقيتها قربِت من الشاب الي كان واقف وسطنا
_ معلش دِلني على مكان الكلية عشان انا من محافظة تانية والتنسيق حدفني هنا
بصتلها وانا بعوج شفايفي
_ على فكرة انا الي كنت هسأله الاول
بَصلي وهو بيبتسم _ انت كمان عايز تعرف مكان الكلية الي تنسيقك حدفك ليها
_ ايوه
_ معلش حصلخير
_ حد كلمك دلوقتي ؟
_ حد كلمك أنت ؟!
_ طب خليكي في حالك يا عسل
_ ايه عسل دي انا بلعب معاك ؟!!
كنا هنتخانق مرة تانية لولا انه اتدخل
_ بصوا احنا نحسم الجدل دا وتقولوا انتوا الاتنين في نفس واحد كل واحد كليته ايه وانا هوصف الطريق لكل واحد، اتفقنا ؟
بصينا لبعض وخدنا نفس وقولنا في نفس الثانية
_ اسنان
قعدت في البنش وانا مش مصدق انها قاعدة قصادي الناحية التانية، كنت قاعد مخنوق مش عارف ليه ونفس الاحساس كان عندها
في يومك الاول في الكلية وخصوصاً لو في غير محافظتك بتبقى حاسس بالغربة، لا صاحب الثانوية جمبك ولا رخامة زمايلك الي مبطيقهمش حواليك
احساس انك انسان جديد، مختلف تماماً عن بتاع ثانوي، راجل عاقل شايل مسؤولية نفسه وحياته وفي منطقة تانية غير منطقته وصحاب تانيين غير صحابه الي كل ليلة بيلعب معاهم كورة !
رغم انه احساس متعب بس بداية لا بأس بها لإنسان جديد بحلم اجدد
_ مبيعرفش يشرح الدكتور دا
_ اسكت دا لسه راجع من طيارة كافورنيا حالاً
_ هي مش كانت ألمانيا
_ هو كل اسبوع تلاقيه بيدرس في حته شكل
_ اما دكتور نابغة بصحيح
ضحكنا انا وهو قبل ما يلتفتلي وهو لسه مبتسم، مد ايده بتحية لطيفة
_ انا شريف
_ وانا يونس
وشريف كان اول صحاب الكلية وعمود شلتنا حالياً، شاب اسمر من صعيد مصر، دمه خفيف وقاعدته حلوة رغم طبعه الحامي وأسلوبه الجاد
