_ يعني أنت عفريت ؟
_ لا طبعاً
_ يا ولي الصابرين يا رب
_ أنا جن
_ اممم
_ اه والله
_ ايه السعادة الي انت فيها دي!
_ بصي هفهمك عشان بتعملوا ميكس رهيب بينا
_ بنعمل ايه ؟!
_ ميكس
_ ميكس اه
سحب التفاحة الي كنت حطاها قدامي وقرب بالكرسي خطوة
_ العفريت دا نوع و احنا نوع تاني خالص
_ يشيخ!
بينت الاهتمام، حطيت ايدي تحت دقني وركزت في عنيه
_ أنا جن
غمز بعنيه وهو بيركن بكوعه على التربيزة
_ مور أتراكتيڤ مش كدا
_ مور ايه؟!!
_ اتراكتيڤ يعني جذاب .. تؤ!!!!! .. انتي شكلك مبتفهميش انجلش وهتتعبيني
_ اه فعلاً
_ هي فييينن!!!؟
_ هي مين
_ رقم مس ميرفت كنت مسجله هنا ... اهو مس ميرفت كورس
_ مسميها مس ميرفت كورس!
_ ايوه عشان الذاكرة يدوبك
_ لا والله!
_ انتوا فاهمين انكوا لوحدكوا عندكوا مس ميرفت ولا ايه لاااا دا احنا جامدين اوي
_ واضح انا آسفة
_ نو بروبليم
_ ايوه مفهمتش ايه الفرق
_ مفيش فرق بس احنا كاريزما عنهم
_ جن لابس الساعة في اليمين
_ ملناش في الشمال
_ وقميص عالموضة!
_ حلو ؟ .. جايبه من الوكالة بـ ٥٠ جنيه
_ يعني أنت من الجن
_ ايوه
_ وقاعد في التربيزة قدامي
_ اه
_ والناس شيفاك زيي ولا هيقولوا عليا مجنونة بتكلم نفسها
شاور بسبابته وكأنه بيقولي اتفرجي، سقف وهو بيقول
_ جرسون
قالها بحركة تمثيلية، ولقيت الجرسون بيقرب ناحية التربيزة بتاعتنا
_ أومروا يا بهوات
ضحك وظهرت نغزة في وشه
_ أؤمري يا هانم
بصيت ناحية الجرسون
_ لا متشكرة انا هكتفي بالاسبريسو الي طلبته
_ وحضرتك ؟ اسبريسو بردو؟
ابتسم للجرسون بطفولة وهو بيقول بحماسة
_ لا انا عاوز فراولة بلبن
رفعت حاجبي بزهول وبصيت حواليا على العيون الي ركزت معانا بسبب صوته العالي
الجرسون كتب طلبه في الورقة ورجع هو يعدل لياقة القميص الأسود الي كان لابسه
_ فراولة بلبن ؟!!
_ متعرفيش يا عايدة قد ايه الفراولة مفيدة
حسس على ضهره مكان الكِلية ورجع يبصلي
_ بس بتجبلي أملاح للأسف فباكل سبعة طن بس
_ بس !
_ اه .. اصل احنا معدتنا غير معدتكوا
_ أصلاً
العصير نزلنا وراقبته وهو بيشرب
_ ايه ؟ بتشاوري على شنبي ليه ؟ في حاجة ؟
سحبت منديل وحدفته على وشه
_ في اختراع اسمه مناديل موصلكوش ؟
_ لا بنشوفه في الحمامات
_ اه دا الكومباوند الي انت عايش فيه ؟
_ لا مش تبعنا احنا دا تبع صحابنا الشياطين
_ ودول نوع تالت مش كدا !
