_ عارف يا زياد الفرق بيني وبينك ايه ؟
رفع عينه ناحيتي لحظة وكان لسه بيكتب في الفون
_ أني اه عمري ما حبيتك .. بس عمري ما خونتك
قضب حاجبه ثانية وبصلي ولسه الفون مفتوح قدامه
_ عارفة ان الطريقة بتاعت خطوبتنا مكنتش على هواك
فضل مركز في عيني
_ عارفة أنك كنت عايز واحدة تانية
حركت راسي بعيد
_ أنا كمان كان عندي احلام تانية .. أحلام انت مكنتش فيها
قلعت الدبلة من ايدي وحطيتها على الترابيزة قدامه وهو متهزش.
_ لكن انا عمري ما فتحت شات واحد وانا قاعدة معاك على نفس الترابيزة!
قفل الفون ورفعت انا في لحظتها التاب الي في ايدي والي كنت ربطاه بالواتس بتاعه
ظهر الشات الي كان بيكلم فيه
سيبته بيتأمل الشات لحظات ومشيت
*****************
_ زياد .. يا زياد !
التفت للصوت الي جمبي،
شيرين أختي.
_ انت متأكد انك عايز تروح معايا ؟
_ ايوا .. ايه المشكلة يعني.
طلعت بالعربية على الطريق وبالي مشغول بذكرى عمرها تلات سنين.
لحد ما وصلنا للمكان،
“ Aseel Store "
نزلت من العربية وانا بقرأ اسمها وبصيت لشيرين الي شالت الهدايا الي اشتريتها ليها مهم صحاب من بعد خطوبتنا الي اتفشكلت.
_ لو سمحتي .. أسيل فين ؟
• المانچر واقفة هناك
وشاورتلنا على عليها،
بصيتلها من بعيد ومقربتش، او مقدرتش اقرب
كانت مبتسمة بسعادة عمري ما شوفتها في عنيها وقت ما كانت معايا
شعرها مفرود عكس ديل الحصان الي كانت ربطاه على طول وعنيها بتلمع ، شيرين كانت قربت منها وهي بترحيب خدتها في حضنها كل دا وانا واقف مكاني مش بتحرك.
لحد ما رفعت عنيها وبصتلي
” عيناك إبحار
وعودة غائب
عيناك توبة عابد “
_ ازيك يا زياد
كانت في لحظة المسافة بينا قلت
ابتسمتلها
_ مبسوط انك حققتي أحلامك
_ اتمنى انت كمان تكون حققتها
قالتها وادتني ضهرها وبدأت تتكلم مع باقي الناس الي حواليها
كانت بتحلم يكون لها براند شنط وسليبرز لاديز باسمها.
وانا بقالي تلات سنين بحلم بيها هي.
*******************
= وبعدين يا زياد؟
_ اعمل ايه وارجعها يا عمر ؟ .. ايه في الدنيا يغفر الخيانة ؟
= مفيش حاجة
_ شكراً ساعدتني جداً الحقيقة.
قعدت جمبه وبصيت للفراغ
_ بس انا مخونتهاش .. انا عملت الفيلم دا عشان تبعد عني من نفسها
= وبعدت .. عايز ايه بقا ؟
_ عايزها
= مش لعبة تشبط فيها يا زياد .. دي بني ادمة
_ مكنتش عارف اني هتأثر بيها .. انا تعبت وكرهت نفسي بسبب اني اتعلقت بيها
= جربت تطلع نفسك من نطاقها
