_ ايه دا !
الاكل في بقه
السندوتش كان في ايده ورفع عينه بهدوء ناحيتي
_ انت مش شايف اني حاجزة المكان بالشنطة
كان بيمدغ بسرعة عشان يعرف يكلم
_ مش فاهمة الحقيقة ايه قلة الزوق دي
شاورلي استنى لكن انا مهتمتش
_ حاولوا يبقى عندكوا زوق شوية!
بلع الأكل أخيراً
_ مبدئياً بصي حواليكي في المكان هتلاقيه كله مشغول
بصيت حواليا لقيت فعلاً المكان كله محجوز
_ دا رقم واحد طبعاً، رقم اتنين
شاور بإيده على اللاب توب الي حاطه على الكرسي الي جمبه والي كان فعلاً موجود قبل ما اجي!
_ أنا روحت جيبت الأكل وسيبت اللاب بتاعي هنا جيت لقيتك حاطة الشنطة بتاعتك ورايحة تجيبي أكلك.
قعدت قدامه وبصيت في رقمي الي كان لسه بدري عليه.
حطيت ايدي على بطني، بدأت احس اني جعانة أكتر
لقيته حط قدامي ساندوتش من بتوعه
بصيتله وشاورت
_ ايه دا ؟
_ بيج ماك تيستي
_ بس انا مطلبتش
_ مش لازم .. انتي شكلك جعانة وتقريباً رقمك لسه بعيد
بصيت على الورقة الي معايا وبصيت على كل الناس الي في الـ food court، العديد كبير وتقريباً الأكل فعلاً هيتأخر.
_ لأ مش عاوزة
_ متأكدة ؟
سكت لحظات لقيته بيهز كتفه
_ ماشي
شديت العلبة الي كان فيها الساندوتش
_ ولا أقولك ممكن آكله .. واديك فلوسه
ابتسم وبدأ ياكل من غير ما يتكلم وبدأت أنا كمان آكل
_ تحبي أحطلك كاتشب زي أنتيكا
_ انت هتصاحبني ! .. بجد !
_ منطلوش .. بس يعني شكل أعصابك مشدودة قولت أكلم معاكي
_ طيب خليك في أكلك
سكت لحظة لقيتني بتأفف وببصله،
كانت ملامحه لطيفة .. مريحة للعين .. ابتسامته هادية رغم اني كنت زي ما قال مشدودة
اتنهدت وغمضت عيني ولقيتني بقوله
_ أنا أسفة جداً .. انت ملكش ذنب
ابتسم
_ لو حابة تتكلمي لحد ما أكلك يوصل أنا ممكن أسمعك
فركت جبهتي وبصيت للفراغ قدامنا
_ بقدم على شغل هنا في الشركة بتاعت المقاولات والcv بتاعي مش أقوى حاجة
فضل ساكت بيسمع
اتنهدت مرة تانية
_ غير اني بسمع كتير انهم متعنتين زيادة عن اللزوم وبيرفضوا لأقل حاجة
