”فين لياليك عمال بناديك مشتاق لعنيك وواحشني لُقاك
بالي مشغول بهواك على طول والليل بيطول وانا مش وياك“
_ كل يوم يفوت كل يوم يعدي بصحى فيه وبموت يجي مليون مرة لوحدي
بعت الرسالة والي كانت رد على الاستوري بتاعت الفيس وطلعت.
كان ورايا حلقات مسلسل الطاووس المصري والي خلصته في أربع أيام لاني انسانة فاضية.
مكنتش فاضية اوي الحقيقة كنت في ١٠٠ موال بين التقديم في الكليات ومرمطة السفر والتعب
بس الحمدلله حلمي اتحقق من كام يوم.
_ دي تكملة الأغنية ؟
_ ايوا
_ مين الي بيغنيها!
_ هي بصوت رامي جمال بس هي أصلاً أغنية فضل شاكل
_ اه .. فهمت
دا كان بداية الحوار بيني وبينه
_ انا الفيديو عجبني لكن الاغنية والمغني معرفهمش
_ هي لطيفة فعلاً
_ على فكرة انا بردو متابع استوريهاتك
_ بجد ؟
_ ايوا .. كنتي منزلة اغنية جوايا هتعيش تقريبا بتاعت...
_ رامي صبري
_ ايوا
وبدأنا نتكلم وفي وسط كلامنا قولتله يا بشمهندس
_ بلاش بشمهندس .. قوليلي عزيز
_ انت تعرف اني بحب الاسم دا أوي ؟
_ فعلاً؟!
_ الاسم دا يبقى اسم بطل رواية قريتها زمان في طفولتي وكنت بحبها اوي .. اسمها فلتغفري .. والجزء الاول بتاعها كان أحببتك أكثر مما ينبغي.
_ امممم .. مش غاوي قراية دراما الحقيقة بحب الرعب أكتر
_ واضح
بعت ايموجي بيضحك وطلعت انا من الشات
بدأت اتابع المسلسل وتاني يوم كنت خارجة مع صحابي وفي وسط الخروجة سمعت صوت مسدج الماسنجر
ابتسمت اما شوفت صورته من برا وقفلت الفون لقيت جهاد صاحبتي بتضربني في كتفي.
_ امممم .. خير ان شاء الله
_ خير يا جهاد مالك؟
_ اصلك بتبتسمي للفون يعني مش من عادتك انتي الوحيدة فينا
_ عادي شوفت ميم ضحكني
_ والميم كان جايلك اشعار شوفتيه من برا ؟!
أسماء أختها ابتسمت وحاولت تغير مسار الموضوع اما جهاد فكانت عنيها عليا طول القاعدة.
روحت البيت وانا بجري أرد عليه
مش عارفة الحقيقة كان ايه سبب السعادة المفرطة دي لكني كنت وقتها في قمة سعادتي.
_ كنت برا معرفتش ارد عليك
_ ميهمكيش
ضحكت اما لقيته فاتح ورد بسرعة ، معرفتش اقول ايه لقيته بيقولي
_ بقولك ايه .. هاتي الواتس بتاعك
_ ايه الماسنجر بيعلق ؟
_ دخلة قديمة اوي واكيد انتي فقساها
اديته الرقم، اه اديتهوله وبنفس راضية كمان
_ بتوع ٠١٠ دول ناس سالكة
_ ما انت كمان ٠١٠
_ عشان كدا سالك
_ مفيش مهندس سالك يا عزيز
_ ماشي .. وجه نظر
فضلنا نتكلم يومها كتير جداً وموضوع يفتح في موضوع والوقت لقيته بيسرقني
رنت جهاد وقتها اكتر من مرة وكنت انا بكنسل
