_ تتجوزيني!
_ إيه يا عمر ؟ إنت اتجننت !
_ فين الجنان ؟
_ إنت إزاي تقول حاجة زي كدا أصلًا ؟!
_ إيه يا دراما كوين انتِ! هو أنا قولتلك يلا عالصحراوي!
_ ياريت تحترم نفسك وتحترم سني
_ سنك! .. سنك إيه لامؤخذة ؟!
_ يا حبيبي انت قد ولادي!
_ عايدة ! فوقي .. انتي قدي يا ماما
_ أيواااااا .. ماما .. يا عمر أنا أكبر منك بـ أربع شهور يا حبيبي
_ في ستات بتتجوز وهي أكبر من جوازتها بسنين يا عايدة يا أوڤر
_ لا حول ولا قوة إلا بالله .. يا ابني أنا لو كنت إتجوزت كنت خلفتك !
فتحت كيس الشيبسي وبدأت آكل فيه بعدم إهتمام
_ فكك من الحوار دا وروح شوفلك عيلة تنفعك
_ عيلة تنفعني !!!
قعد عالكرسي قدامي
_ تمام .. وماما بقا ناوية تتجوز واحد أكبر منها بـ قد إيه ؟
_ يعني مش أقل من عشرين سنة كدا
_ دا نظام شوجر دادي بقا
_ حد يطول ! .. وأهو يموت ونورثه
_ والحب يا عايدة!
_ كلام فاضي يا عمر
" كل الناس شيفينا حبايب إلا عنيكِ "
_ بطل تشغل الأغنية يا عمر دا مش هيغير رأيّ في حاجة
_ انا مشغلها عشان بحبها على فكرة !
_ والله! ومبتحبش تسمعها إلا وأنا موجودة !
_ آه
_ طيب .. أنا سيبهالك خالص
وقومت من جمبه
_ وشايف كيس الشيبسي دا ! والله ما أنت دايقه كمان
خدت الشيبسي واتحركت بعيد عنه، هو ليه مش قادر يفهم إني مش عاوزة أخسره!
ليه مُصر يبقى بينّا حاجة تهد كل حاجة حلوة بينّا !!
أنا زمان قريت جملة للكاتب " إحسان عبد القدوس " مضمونها إن الحب أما بيدخل أي علاقة إما بيهدها أو بيعلي من مراتبها !
طب أنا إزاي هراهن على عمر ؟ إزاي هراهن على صديق طفولتي !
يا إما ننجح و نبقى زوجين سعيدين بحياة رتيبة
يا إما نفشل وأخسره للأبد !
أنا اخترت زمان إني أحافظ عليه وأدافع عن علاقة الصداقة إللي جمعتنا سنين حتى لو كان على حساب قلبه .. وقلبي!
_ بخ!
_ بخ يا تافه!!!
_ بتعملي ايه ؟!
_ باكل فشار
_ إنه دا ! وريني كدا !
شال العلبة إللي كنت حطاها على المكتب قدامي، وكان هو قاعد على المكتب وبياكل بتلقائية
_ متعرفيش إيه إللي حصل إمبارح في مكتب الأستاذ يونس !
_ مش هتبطل أبدًا نميمة، يا ابني حرام عليك هتدخل جهنم
_ والله! طب أنا غلطان، أروح أحكي لـ خالد بقا ندخل جهنم سوا
_ إتقِ الله وإحكيلي إيه إللي حصل
بدأ يحكي بحماسة وأنا عيني بتسرح في كل التفاصيل إللي في وشه ، وهو بيتكلم بسعادة وبيضحك بين كل كلمة وكلمة وهو بيرجع شعره لورا وبيرمش بعينيه العسلي وبيرجع ياخد نفسه ووشه إللي بيحمر وبيتنحنح أما يلاحظ إن نظرتي طولت.
_ طب إجري بقا روح على مكتبك كفاية كدا
إنحنى وهو بيبتسم
_ مش عاوزة تقوليلي حاجة قبل ما أمشي ؟
_ حاجة زي إيه ؟!
_ حاجة زي إن شكلي زي القمر النهار ده مثلًا وإنك مش قادرة تستحملي جاذبيتي
