_ اتقل
_ ايوه
_ الست بتحب الراجل التقيل
_ تمام
_ بس متتقلش جامد بردو مطفشهاش
_ اه
_ خليك واد لماح كدا
_ ماشي حاضر
_ دمك لازم يبقى خفيف
_ الحمدلله أنا...
_ وأنت دمك دم صراصير معرفش هتطيقك ازاي أنا
_ ممكن نبقي محضر خير ؟
_ لابس ايه وريني كدا .. سويت شيرت أسود و بنطلون أسود
_ لا شيك
_ لا سنة سودا، ادخل البس بنطلون أوف وايت أو بيچ
_ حاضر
_ شممني كدا ريحة البيرفيوم
قربت منها وانا بعدل شعري في المراية
_ حلو يواد، صحيح لبس البوصة تبقى عروسة
_ جاية من تحت الجاموسة طاظة
قربت من المراية
_ حاسس أني متوتر
_ قال الواد رايح يقابل إيما استون
_ مش عارف ليه مقلق كدا
_ اشحال مكنتش كلها سبعة سانتي تلاتة منهم كعب
_ احلق دقني ولا اسيبها
_ بذمتك دي اشكال تدخل عيلتنا
_ ما انتي كنتي مخطوبة لمروان المعقد ومحدش كلمك
_ دا على اساس انك مطفشتهوش يعني
_ لا اله الا الله ! يبنتي مش دا كان طلبك
_ بس بقا دا انت لولا عمي موصيني عليك قبل ما يموت كنت رميتك في الشارع من سنين
_ عمك وصاكي عليا!! وانتي عندك كام سنة يا عيلة يا بنت امبارح انتي
_ عيلة في عينك، أنا عندي ٢٣ سنة
_ حلو وانا ٣٠ يعني لو كنت اجوزت كنت خلفتك
قربت من الباب وقعد على الكرسي البس الشوز بتاعتي لقيتها بتقرب وبتحط الشال حوالين رقبتي
_ عشان متجيش تجبلنا البرد كلنا
_ حنينة .. لا حركتي مشاعري يا بت
_ دا انت عيل غتت
بعدت عني ولبست الشوز بصيت لنفسي آخر مرة في المراية أتأكد من شكلي ونزلت ركبت عربيتي
وانا في الطريق سمعت الأغنية الي كانت علياء بنت عمي مشغلاها الصبح وهي بتغسل المواعين
" بتمر ساعات بعد لُقانا والروح لوجودك عطشانة توحشني عنيك "
علياء بنت عمي الوحيدة، آخر ريحة من عيلة أبويا الله يرحمه، بعد ما عمي مات ومرات عمي قبله بسنتين كانت علياء اتنقلت عندنا بحكم انها وحدانية وملهاش حد غيرنا ودا طبعاً تحت أمر الحاج الله يرحمه من يومها وأنا مبقتش وحيد علياء اختي الصغيرة ومصدر الإزعاج في بيتنا الهادي.
" وبلاقي الدنيا بقت فاضية مع أن الناس رايحة وجاية وأنا بحلم بيك "
وصلت لوجهتي وقابلت سهيلة، سهيلة تبقي حب سنتين، عرفتها في آخر سنين في الكلية بالمناسبة أنا خريج هندسة واتعرفنا على بعض لأننا كنا في نفس القسم وبعدها اشتغلنا في نفس الشركة لحد ما وصلنا للنقطة دي.
_ كل سنة وأنتي طيبة يا حبيبتي
قولتها وأنا بقرب الهدية الي كنت شاريهلها، اتفاجأت بيها وهي بتحضني بكل تلقائيها قدام كل صحابها
ولسه هفوق من الصدمة لقيتها بتسلم على مجموعة تانية من الشباب قالت انهم صحابها من ثانوي!
قعدت معاهم رغم اني كنت قاعد على اعصابي طول الحفلة ومش قادر أتنفس
