_ يلا نبتدي
_ ببتدي بضحكة ببتدي ببسمة
فضلت متنح للقاعة وهم بيبصوا ورايا وبيبصولي وكأنهم بينبهوني
_ ايه يشباب مالكوا
فضلوا ساكتين فـ التفت مكان ما هم باصين، طولها لا يتعدى الـ ١٥٩ سم ولابسة نضارة طبية بصالي بغضب مكتوم و ثبات مريب
_ مين القمر ؟
سمعت نحنحة جاية من القاعة من ورا، بصيت على اللبس والهيئة واللاب بتاعها على المكتب ورجعت بصتلها
_ أنتي الـ......
_ انت اسمك ايه
_ كدا على طول .. مش قدام الشباب طيب
_ بقولك اسمك ايه
صوتها علي فجأة فبلعت ريقي
_ زياد
_ زياد ايه
_ زياد السيوفي
_ تمام
كتبت اسمي في الورقة ورجعت
_ اتفضل
_ ميرسي شكراً جداً
_ تعالى تعالى .. انت رايح فين ؟
_ داخل
_ داخل فين
_ انتي مش قولتي اتفضل ؟
_ انتي ؟!!
ابتسمت وأنا بقرب من وشها
_ عوزاني اقولك حضرتك ؟ انتي عارفة اني لو كنت اجوزت كنت خلفتك
عنيها جحظت في زهول وارتفعت الهمهمات في القاعة اما انا ابتسمت وأنا مستني ردها
_ اطلع برا القاعة و متخشليش طول السنة
_ وان دخلتلك ؟
_ هعرف شغلي معاك
نزلت درجة من السلم وهي ثبتت مكانها
_ على فكرة انا أقدم منك هنا
_ بفشلك مش بحاجة تانية
قالتها و لفت ووصلت للمكتب وبأعلى صوت عندها وهي بتشاور للباب
_ اتفضل .. برا
_ برا برا يعني انتي بتطرديني من الجنة ؟
وخرجت
_ ايه يا زياد حد يعمل كدا مع المعيدة البسكوتة دي
_ بقولك ايه يا علي سيبني في حالي أنا شايط دلوقت
_ شايط ! دا انت ولعت القاعة ومشيت يا أخي .. دي فضلت بتاكل في نفسها طول السكشن
_ أنا جعان تعالى نتغدى في اي حته
_ لا يا عم انا رايح اخلص الحاجات الي هي طلبتها مننا احسن اتعلق
_ انت بتهزر يا علي ؟
_ لا مبهزرش .. شكلها شرانية
_ واحنا من امتا بياكل معانا جو الدكاترة و المعيدين دا ؟!
_ من انهردا .. انت أصلك مشوفتهاش دي ....
_ دا انتوا عيال واقعة ... كل دا عشان حلوة شوية ؟
_ يا عم دي قادرة عالتحدي و المواجهة دي
_ يعني مش هتيجي ناكل شاورما سوري ؟
_ لا انا الي هتعمل الشاورما دي لو مسلمتش في الوقت .. سلام
سابني ومشي وأنا روحت المطعم الي جمب الكلية، قعدت وطلبت الأكل، كنت قاعد بسكرول على الفيس في نفس التوقيت الي دخلت فيه ببدلتها السودا الكلاسيك وقعدت في الترايزة الي قدامي
