_ قريت الورق يا عمر ؟
_ ورق ايه !
_ الورق الي اتبعتلك
_ ورق! .. اه اه .. الورق .. لا في الحقيقة مقرأتوش
سمعت صوت المعلقة وهي بتخبط في الطبق بتاعها، رفعت عيني ناحية ابتهال مراتي للحظة أما هي فـ كانت عنيها مركزة عليا عشان انطق
_ مقرأتوش ليه لحد دلوقتي ؟
_ يا ابتهال انتي مكبرة الموضوع، تلاقيها توصية ولا حد عاوزله مصلحة ما انتي عارفة
_ والله ؟! والأحلام الي ...
_ تاني !!!!
قولتها وانا بقف، رميت المنديل من ايدي وبصيت في عنيها
_ هنرجع للتخاريف دي تاني !
_ تخاريف ايه!!!
قامت ورايا وانا مديها ضهري
_ بقولك أنا بحلم بحجات غريبة، مواقف مش مفهومة، ناس مش موجودة
جريت ووقفت قدامي
_ يا عمر انا بحلم بنفس الجدار والطوب الي محاوطني كل ليلة
_ يا حبيبتي تلاقي الشغل ضاغطك و...
حاولت احضنها فبعدت عني
_ شغل ايه الي ضاغطني! والشغل دا آثره مجاش الا اما الورق دا ظهر ؟؟
سكت وانا بنفخ بقلة حيلة
_ في حاجة مش طبيعية بتحصل، وصدقني .. الورق دا ليه علاقة
في نفس الليلة دي وتحديداً الساعة واحدة بعد نص الليل كان الكلب بتاعي بينبح بشكل غريب، انا متعود على صوته لكن المرادي رتم نباحه مقلق، فتحت نور الأباچورة جمبي ومشيت ناحية الشباك، كان باصص ناحية شئ ومركز عليه بشكل غريب
_ في ايه ؟!
كان صوت ابتهال الي صحيت على نفس الصوت
_ مش عارف
_ طب انت واقف كدا ليه ! .. انزل شوفه ماله !
نزلت ومشيت ناحيته فضلت انادي عليه، في العادة بيجري عليا اول ما بيسمع صوتي، لكن الي حصل كان غريب،
كان واقف باصص بثبات، ديله مبيتحركش وعينه ثابتة في نقطة محددة الغريب ان النقطة الي هو بيبص ناحيتها كانت كتلة من الظلام، الجنينة عمرها ما خدت الكم دا من الظلمة، ونور القمر ممكن يديها اضاءة تسمح تخليك تشوف الدنيا حواليك
_ ابتهال .. يا ابتهال !!!
كان صوتي عالي لدرجة انها تسمع عادي
_ ابتهال قيدي النور
رفعت عيني ناحيتها ورجعت ابص، شهقت وانا برجع لورا وبراقبه وعينه عليا انا .. عينه الي مكنش فيها لمحة سواد، كلها اتحولت للون الأبيض!
ارتعشت وانا برجع لورا، سرعت خطواتي للبيت جوا قبل ما اخبط في ابتهال الي كانت واقفة بالروب
_ في ايه يا عمر ؟ ايه الي نزلك في الوقت دا !
_ كـ.. كنت في الجنينة
_ جنينة ! دلوقتي ؟!
_ جرا ايه يا ابتهال .. انتي مش سمعتي رو وهو بينبح وبيعمل اصوات غريبة وقولتيلي انزل شوفه
_ انا !
_ اه انتي، كنتي واقفة جمبي قدام شباك اوضة النوم فوق
_ انا صحيت على صوتك انت مش صوت رو !
_ لأ دا...
