_ لو محدش علمك في أمريكا أدب احترام الجار احنا ممكن نقوم معاك بالواجب
بطول ١٦٨ سم ونظرة نارية وغضب اتعودت أشوفه في وشها كل ما بنتقابل صدفة في الأسانسير أو في السوبر ماركت الي قدام العمارة
_ الساعة كام معاك ؟
فضلت واقف على الباب ببصلها و كأني مستني أنها تخلص الموشح بتاعها
_ بقولك الساعة كام
_ تلاتة الا ربع
_ الفجر .. بتلعب دارمز الساعة تلاتة الا ربع الفجر
_ وفيها ايه
_ لا أبداً مفيهاش حاجة
مسكت العصيان الي في ايدي بتاعت الدرامز و كسرتها بكل قوتها وانا واقف في مكاني مزهول
_ احنا ورانا شغل الصبح مش قاعدين عاطلين زي سيادتك
_ How dare you ! انتي ازاي تكسري الـ sticks كدا
_ يحبيبي !!!! اتخنقت اني كسرتها، واحنا العايشين في صداع من ساعة ما سيادتك ما شرفت العمارة
_ انا أعمل الي انا عايزة انا حر
_ انت حر دا هناك .. وانت عايش لوحدك .. او في وسط المجتمع المنحل الي انت جاي منه لكن هنا لأ .. هنا في ناس كبيرة وتعبانة و ناس وراها شغل .. الي بتعمله دا بتأذيهم بيه
_ دا بيقى يمنعني اني اعمل الحاجة الي بحبها
_ الحاجة الي بتحبها ليها اماكنها احنا هنا بيحكمنا نظام مش زيكوا كلكوا سايحين على بعض
رمت الباقي من العصيان على الأرض
_ لو جبت غيرهم .. هاجيلك اكسرهم
ومشيت
تاني يوم الصبح اتقابلنا قدام مدخل العمارة، كانت بتجيب الفطار ومطلعاه لأهلها، ساكنة في الدور الي تحتي و عايشة مع والدتها ووالدها و اخوها سافر من ست شهور
_ good morning
بصتلي من فوق لتحت من غير ما تكلم في نفس اللحظة الي وصل فيها الأسانسير، فتحته ووقفت اشورلها تركب قبلي ودخلت من غير اي تعبير
_ Am sorry, صدقيني أنا مكنتش اقصد أضايقكوا بالشكل دا
_ تضايقنا ؟! لا يا جدع .. دا احنا يدوبك بقالنا سنة الا شهرين مش عارفين ننام من حفلة الروك الي بتعملها بعد اتناشر
_ أنا على فكرة مكنتش أعرف ان .. ان دا بيضايقكوا
بصتلي بزهول ولاول مرة بإهتمام
_ انت عبيط؟ .. انت بجد عبيط ومصدق الي بتقوله ؟
_ لا بصراحة .. بس انا بعتذر
_ هم قالولك ان الاعتذار بيصلح كل حاجة ؟
_ لا بس اتعلمت ان الاعتذار قوة مش عند أي حد
بصتلي من غير ما تضيف كلمة و سابتني وطلعت، من بعدها وانا بطلت ألعب درامز و قررت أسمع ميوزك من السماعات بتاعتي، مبقتش بشغل أغاني بصوت عالي عشان انا مش حر عشان انا عايش وسط ناس على حسب كلامها
في يوم كنت بكلم مع عم عادل بواب العمارة بتاعتنا قلل ما المحها رايحة الشغل
_ ازيك يا عم عادل
_ ازيك يا أستاذة رانيا
بصتلي _ ازيك
_ بخير .. وانتي ؟
_ تمام
