امرأة متنكرة في عالم الرجال 🤠مكتملة🤠

الجزء 73 🤠

امراة متنكرة في عالم الرجال 💪

الجزء 73

بقلم: حنان زهراوي/ اريا ستارك

سمير باقي واقف مقابل إيمان لي عاونات ياسين حتى وقف تحرك سمير لحمام ديال أنفيرمري وجبد منها كراطة ورجع عند ياسين لي هز فيه عينيه باقي مخنزر.

سمير ماطة ليه الكراطة: ماباغي تعكز على تاحد هاك هادي عكز عليها

ياسين خنزر فلكراطة وفسمير وعروقو بانو بالأعصاب عارفو كيضحك عليه: من نيتك!

إيمان حابسة ضحكة: فحقيقة فكرة مزيانة شد جهت كراطة تحت دراعك ولعود فلأرض وتصدق..

ياسين هز كراطة للحها ضربات مع لأرض:معنديش لوقت لتفاهاتكم

تحرك بغا يمشي عادي حس بالألام تقل من خطواتو من حركتو بشوية كيتمشى حيت الضربة جات فجنبو فينما كيحرك رجلو كيعطيه الألام

سمير شاف فإيمان: كان باغي يخرج من هنا كاعي ساعة فشلات ليه لخطة

إيمان حابسة ضحكة: كيتمشى بحال بطريق

ياسين: راني كنسمعكم

سمير: أري ليا دوا ديالو نعطيوه ليه

إيمان: لعميد قالك خرج معاه خاصك تخرج تكون حداه راه مكايبغيش لي مكسمعش لكلامو

ياسين سمع إيمان وفعلا تافق معاها حيت عارف لعميد كيفاش كيفكر وحافضو ولا ملقاش سمير معاه بزوجهم غايوليو فمشكل معاه: سمير تحرك

تحركات سارة وهي غادة موراه ومع كيتمشى بشوية فينما يجي شي حد موراهم تقوليهم سيرو من طريق لوخرا كاين لي كيعاير عاد كيمشي وكاين لي كيحاول يتزاحم مع ياسين ساعة مكخليش ليهم فرصة،
قربو يوصلو قدام لباب حتى بان ليهم شي حد جاي كيجري وكيشير ليهم..
ياسين: بففف هادشي لي بقا ليا
ماسين جاي كينهج: واش بصح غاتخرج سيمانة؟؟

سمير: اه جا لعميد عطاه الإدن شخصيا

ماسين: تانا بغيت نخرج علاش زعمة هو

تسمع صوت من موراهم: غايخرج حيت محتاجينو وخوه فخطر

ياسين شاف فخوه لكبير ببرود واخا سمعو اش قال وجهو مبانش عليه حتى إحساس
ماسين تصدم من كلامو: مالو أش وقع ليه؟؟

حميد خو ياسين لكبير: راك عارفو ديما كان مريض وعندو لقصور الكلوي وقع ليه حادت بسيط ولكن غايضطرو يحيدو ليه كلوتو وملقيناش تطابق مع تاحد فينا بقا لينا أمل واحد فياسين.

سارة عينيها باقين محلولين على قدهم عرفات شكون لي واقف قدامها هو نفسو داك راجل لي جا مع باه باش يخطبها لخوه لاخر فداك ليوم لمشؤوم لي هربات فيه دورات وجهها باش مايحاولش يشوفها مقدراتش تشوف فيه ماسين لاحضها رجعات بلور ودورات وجهها ولكن خلاها على خاطرها..

ماسين: ولكن ياسين مضروب باقي مبراش ليه جرح خاصو الراحة مايمكنش ديرو عملية

ياسين شاف فماسين لأول مرة بان بحال فعلا كيعني ليه ياسين شي حاجة وبقا فيه..

ماسين ملي عاق براسو رجع شاف فحميد: هو انا مكرهتكمش تفصلوه كاااع ولكن نخاف على خوك غاياخد طرف منو دابا يعاديه...

ياسين بتاسم باستهزاء ودار عند سمير: سمير عطيني داك دوا

سارة حدرات راسها شافت فدوا وهزات راسها ضارت ببطئ تشوفو فين كاين باش تماطيه ليه وتفادى خوه لكبير، ملي هزات عينيها لقات حميد كيشوف فيها وحجبانو مقرونين بحال كيركز فيها ضدرات وجهها دغيا لجيهة لوخرا وعطات دوا لياسين وهربات كتجري..

حميد شكوكو تأكدو ملي جات عينو عليها عرفها من عينيها وداك شعر لقصير مغطى والو حيت عندهم تصويرتها لي كلهم حاطين فجيبهم وكيقلبو عليها بأمر من باهم ...

حميد نعت فسمير: هداااك هاديييك

ياسين جر خوه: تحرك ياله نمشيو

ماسين بقا كيشوف فحميد وكيرجع يشوف فسارة لي كتجري عرف قضية فيها شي حاجة..

ماسين مشا حدا طوموبيلتهم فين ركبو: سلم ليا على عمتي وخالتي وقوليهم انا كندعي معاه ان شاء الله يوقف بالسلامة

ياسين: ممكن نتحركو من هاد لهضرة ديال والو

حميد تنهد وشاف فخوه كيبان ليه متبدل والو فيه ولكن ملي لاحظ عينيه تبعات فين سارة هربات كتجري بتاسم وديمارا طوموبيل