امرأة متنكرة في عالم الرجال 🤠مكتملة🤠

الجزء 95 🤠

امراة متنكرة في عالم الرجال 💪

الحزء 95

بقلم: حنان زهراوي/ اريا ستارك

دوزات وقت طويل وهي غير كتهرب من ياسين وماسين مباغاش تناقش معاهم ولا تجاوب على أسئلتهم معرفاتش واش خو ياسين عرفها وقال شي حاجة، عوتاني كون قال شي حاجة ضروري ياسين يشوهها ولا يدير شي ردة فعل قوية ولحد الآن مدار والو.
وقفات فقنيتة حدا فين محطوطة لماكلة وكتقلب بعينيها حتى جات عينيها على ياسين وماسين كيتحتو، قرنات حجبانها مركزة فملامحهم كيفاش كيهضرو وهوما عمرهم حملو بعضياتهم شافت ماسين كيضحك ومرة مرة تشوف فياسين تاهو حابس الإبتسامة ولكن باينة من عينيه.
سارة بقات كتشوف فيه وطاح فبالها سؤال: هادا شكون جابو وهو مريض.
حميد (خو ياسين): انا لي جبتو
سارة سمعات صوت ودارت ملي شافتو وحلات ليها معرفات مادير حنحنات باش تغلض صوتها وشافت فيه: احم خو ياسين ياك؟ شفتك ملي جيتي ديتيه داك نهار
حميد بتاسم ليها: ماشي هي هاديك أول مرة شفتيني
سارة بانهزام عرفاتو عرفها تنهدات وشافت فيه: قلتيها ليه؟؟
حميد: لا بغيتيني نقولها
سارة قبل مايكمل هضراتو: لالا متقولش ليه....احم واش هو..؟!!
مقدراتش تكمل سؤال وحتى حميد فهمها اشنو بغات تقول شاف فخوه ورجع هز فيها عينيه بابتسامة حزينة.
حميد:اه هو لي كنا خطبناك ليه
سارة دارت بجنابها كتشوف واش شي حد راد ليهم لبال وعاد رجعات كتهضر بشوية:دوي بشوية عفاك مبغيتش شي حد يسمع كلامنا..

حميد حرك راسو بمعنى واخة ورجع شاف فيها من رجليها لحتى جات عينو فعينها.
حميد: مرتاحة هاكة؟
سارة صدمها سؤالو مكانتش متوقعة هاد سؤال عل أقل كانت متوقعة علاش هربتي ولا محشمتيش على هاد لفعلة، متوقعاتوش أنه يسول فيها وفراحتها هاد الإهتمام جديد عليها عمرها حساتو من ناس لي قراب ليها عاد لبراني.
سارة باستغراب: مفهمتش؟؟
حميد بتاسم ليها: مرتاحة فهاد لعيشة؟ حسن من لول؟
سارة بتاسمات بحزن: للأسف اه!! لقيت الراحة لي حياتي كاملة عمرني حسيتها
حميد شاف قدامو فناس لي مجمعة وكلشي كيضحك: مزيان بعدا تضحية ديالك مضاعتش هباء
سارة مفهماتش أش بغا يقول: أشمن تضحية؟
حميد شاف فيها وهز حاجبو: باش تعيش سجين وسط جسم ماشي ديالك ولا بالأحرى تحت هوية ماشي ديالك كل نهار خايف كل نهار كتخبى وفكل ليلة كتسائل حتى لاين غاتبقى هاكة.

#يتبع