ငါက သူရဲကောင်းဖြစ်ချင်ရုံပါ
V5 Chapter 24 - နောက်ဆက်တွဲများ
စက်ရုံပျက်စီးသွားတဲ့သတင်းက မက်ဒါနာနားထဲကို ကန့်လန့်ကြီးဝင်လာတယ်။
မြေပုံတစ်ခုပါသွားတာသိပေမဲ့ ရန်သူက ချက်ချင်းလှုပ်ရှားလာလိမ့်မယ်လို့တော့ သူတို့မခန့်မှန်းနိုင်ကြပါဘူး။ စစ်ကူတွေရောက်သွားချိန်မှာ အစောင့်တစ်စိတ်တစ်ခုနဲ့ အလုပ်သမားတစ်ရာဟာ ပြာပုံဖြစ်သွားတဲ့ စက်ရုံထဲမှာပဲ အသက်ပျောက်သွားပြီလို့ အတည်ပြုလိုက်နိုင်တယ်။
အဲဒီထဲမှာ မက်ဒါနာကိုယ်တိုင် လေ့ကျင့်ပေးခဲ့တဲ့ ဝန်ထမ်းအယောက်နှစ်ဆယ်လည်းပါပါတယ်။ ဒီသတင်းကို ကြားကြားချင်းမှာပဲ မက်ဒါနာက စက်ရုံကို မရအရလိုက်ပို့ပေးဖို့ တောင်းဆိုခဲ့တယ်။
နိုင်ငံက မငြိမ်မသက်ဖြစ်နေပေမဲ့ မက်ဒါနာက စိတ်အားထက်သန်နေတာကြောင့် မေမေသီတာနဲ့ဒီပတို့ပါလိုက်ပို့ပေးတယ်။ သူတို့နဲ့အတူ ကိုယ်ရံတော်အဖွဲ့ပါ ပါလာသေးတယ်။
အခုတော့ မက်ဒါနာဟာ မြေတွင်းချိုင့်ကြီးဖြစ်နေတဲ့စက်ရုံတည်နေရာဟောင်းရှေ့မှာ ရပ်နေတယ်။ ဆုဗာနာရဲ့အဓိကအကျဆုံး ချပ်ဝတ်ထုတ်လုပ်ရေးစက်ရုံဆိုတဲ့ သက်သေဆိုလို့ စက်ရုံရဲ့ခြံစည်းရိုးတိုင်တချို့သာ ကျန်ရစ်ခဲ့တယ်။
နေမွန်းလွဲချိန်နေရောင်ချည်က မက်ဒါနာရဲ့ပါးပြင်နုနုပေါ် ဖြာကျနေတယ်။ မက်ဒါနာက ဝှီးချဲလက်ရမ်းကို တင်းတင်းဆုပ်ကိုင်ထားပြီး နှုတ်ခမ်းကိုဖိကိုက်ထားမိတယ်။
"ငါ့ရဲ့ကြိုးစားမှုတွေအကုန်လုံးက အခုလိုပဲ လွယ်လွယ်လေးနဲ့ ပြာမှုန့်ဖြစ်သွားပြီပေါ့။"
ဒီစက်ရုံတည်ဖို့က မက်ဒါနာအတွက် တကယ်ပဲမလွယ်ကူခဲ့ဘူး။ အေမီကို ကယ်တင်နိုင်ဖို့အတွက် တိုင်းပြည်နဲ့ အပေးအယူတစ်ခုလုပ်ဖို့ သူကြိုးစားတည်ဆောက်ခဲ့တာ။ အခုတော့ သနားစရာမြေမှုန်လေးတွေအဖြစ် တစ်စစီကြေမွသွားခဲ့ပါပြီ။
"သတင်းပို့ပါတယ်၊ တရားခံက ဘလေဇာရီအက်တာဗုံးကို အသုံးပြုသွားတယ်လို့ ယူဆရပါတယ်။ စက်ရုံထဲက နာနိုCNC တွေအပါအဝင် ကျွမ်းကျင်ဝန်ထမ်းအားလုံး ပါသွားပါပြီ။" စစ်သည်တစ်ယောက်က ဒီပဆီရောက်လာပြီး အစီအရင်ခံပါတယ်။
YOU ARE READING
I just Wanna be Hero, not Heroine (Season 2)
Science FictionSeason 2 ဖြစ်လို့ Season 1 ဖတ်ထားပြီးမှ ဖတ်လို့ရပါမယ်။ S1ရဲ့အဆုံးသတ်မှာ မက်ဒါနာဒဏ်ရာအပြင်းအထန်ရပြီး ကိုမာဝင်သွားတာနဲ့ အဆုံးသတ်ထားခဲ့ပါတယ်။ မက်ဒါနာရဲ့အချိန်တွေက ရပ်တန့်သွားပေမဲ့ လောကကြီးကတော့ ဆက်သွားနေဆဲပါ။ မြူတန့်သိပ္ပံပျက်စီးသွားပေမဲ့ ဗီလိန်အဖွဲ့...
