ငါက သူရဲကောင်းဖြစ်ချင်ရုံပါ
V5 Chapter 39 - အစီအစဥ်သစ်
နောက်တစ်နေ့မနက်ရောက်တော့ နယ်စားကြီးနဲ့အတူမက်ဒါနာတို့ ပုရွက်ဆိတ်တွင်းဆီကို သွားတယ်။ မက်ဒါနာနဲ့အတူ ဒီပ၊ ဖရာလီတာနဲ့ ဖရက်လည်းပါတယ်။
သူတို့ပုရွက်ဆိတ်တွင်းကိုရောက်တော့ အရင်တစ်ခါလိုပဲ ငွေရောင်ပုရွက်ဆိတ်စစ်သူကြီးက သူတို့တွေကိုတစ်ယောက်ချင်း စိတ်ဖတ်စစ်ဆေးတယ်။ ပြီးလို့စိတ်ချရတဲ့သူတွေမှန်း ဆုံးဖြတ်ပြီးခါမှ ဝင်ခွင့်ပြုလိုက်တယ်။
"ဒုတိယအကြိမ် ဝင်ခွင့်ရတာဆိုပေမဲ့ အခုထိအံ့အားသင့်မိနေတုန်းပဲ။" မက်ဒါနာက ဂူအတွင်းပိုင်းကိုကြည့်ရင်း ပြောလိုက်ပါတယ်။
သလင်းကျောက်တွေက ပုရွက်ဆိတ်တွေနေတဲ့ဂူနံရံတွေထဲမှာ ဖွဲ့တည်နေပြီး အရောင်မျိုးစုံနဲ့ ထွန်းလင်းတောက်ပလို့နေတယ်။ နယ်စားကြီးပြောသလိုပဲ ဒီသလင်းကျောက်တွေရဲ့အရောင်က ပုံမှန်ထက်အများကြီး တောက်ပနေတာပါ။
"ပုရွက်ဆိတ်တွေ ဘယ်ရောက်နေတာလဲ။" ဖရာလီတာပြောလိုက်တော့မှ မက်ဒါနာလည်း ပုံမှန်မဟုတ်မှန်း သတိထားမိတယ်။ ပုရွက်ဆိတ်စစ်သူကြီးနောက် သူတို့လိုက်လာခဲ့ပေမဲ့ အခုထိလှုပ်ရှားသွားလာနေတဲ့ ပုရွက်ဆိတ်တွေကို မတွေ့ရသေးဘူး။
အရင်တစ်ခါလာတုန်းကဆိုရင် ဂူတွင်းစမ်းချောင်းထဲက ငါးတွေဖမ်းစားနေတဲ့ ပုရွက်ဆိတ်တွေ၊ ဂူပြင်က သီးနှံတွေခူးဆွတ်သယ်ဆောင်လာတဲ့ ပုရွက်ဆိတ်တွေနဲ့ ပြည့်နှက်နေခဲ့တာပါ။
ခုတော့ ဂူကြီးတစ်ခုလုံးက ခြောက်ကပ်လို့နေတယ်။ သူတို့တဖြည်းဖြည်းနဲ့အလောင်းစည်သူရဲ့ဖောင်စကြာနားရောက်လာပြီ။ အရင်တစ်ခါလာတုန်းက မြန်မာဘုရင်ယူဖို့လုပ်ခဲ့တဲ့ ရှေးဟောင်းပစ္စည်းပေါ့။
"ငါတို့ရောက်ပြီ၊ ပုရွက်ဆိတ်တွေကို အနှောင့်အယှက်မဖြစ်စေနဲ့ဦး။ သူတို့ဝမ်းနည်းနေကြတယ်။" နယ်စားကြီးက တစ်နေရာမှာရပ်လိုက်တယ်။
လိုဏ်ဂူလမ်းတွေကိုဖြတ်လာပြီးနောက် မက်ဒါနာတို့လှမ်းကြည့်လိုက်တော့ သဘာဝအတိုင်းဖြစ်နေတဲ့ ဂူကျယ်ကြီးတစ်ခုကို မြင်လိုက်ရတယ်။ ဂူအမိုးက အပေါက်ကဝင်လာတဲ့နေရောင်ဟာ အလယ်မှာရှိတဲ့ သလင်းကျောက်ကြီးပေါ်ကို ဖြာကျနေတဲ့အတွက် ဂူတစ်ခုလုံးကို ရွှေရောင်အလင်းတွေ ဖြာထွက်နေပါတယ်။ မက်ဒါနာမှတ်မိသလောက် ညဖက်ဆိုရင်တော့ လရောင်က သလင်းကျောက်ပေါ်ကိုဖြာကျနေတာပါ။
YOU ARE READING
I just Wanna be Hero, not Heroine (Season 2)
Science FictionSeason 2 ဖြစ်လို့ Season 1 ဖတ်ထားပြီးမှ ဖတ်လို့ရပါမယ်။ S1ရဲ့အဆုံးသတ်မှာ မက်ဒါနာဒဏ်ရာအပြင်းအထန်ရပြီး ကိုမာဝင်သွားတာနဲ့ အဆုံးသတ်ထားခဲ့ပါတယ်။ မက်ဒါနာရဲ့အချိန်တွေက ရပ်တန့်သွားပေမဲ့ လောကကြီးကတော့ ဆက်သွားနေဆဲပါ။ မြူတန့်သိပ္ပံပျက်စီးသွားပေမဲ့ ဗီလိန်အဖွဲ့...
