فطنت الصباح على صوت لمطر وقفت طليت من التاقة لمطر مشاء الله دايرة حالة رجعت طول لبلاصتي تغطيت بزورتي وغطيت راسي وكملت رقدتي اصلا الشتا هو الوقت المناسب للنوم ههه ، حتى سمعت صوت نبع الحنان من لكوزينة يا منااال مناااال نوضي _خليني ماما منوضش راه البرد وديجا يخي ليوم السبت مكاش قراية_منال قتلك نوضي يخي عندك كور ليوم _خلي برك منروحش والله المطر خيط من سما ، جات لعندي هازة بليغة فيدها شوفي منال تنوضي ولا نوضك بطريقتي ، وليت نضت سلمت عليها قتلها خلاص ماما هاني نضت تبسمت وراحت( يعني انا نحب نقرا ونجي الأولى بصح على قد ماني مجتهدة قد مانحب نوم ههه ) وليت جبدت قشي بودي صوف احمر وسروال جين ازرق مع ڨوداص كحلة طلقت شعري ودرت بوني اكحل وفاست كوير وخرجت لحقت للباب عيطتلي ماما رحت لعندها عطاتني باطة جو ودراهم قاتلي افطري بيهم متروحيش هكاك بستها من راسها وخرجت (انا المازوزية تاع دارنا معزيني بزاف سيرتو خاوتي لي ممبعد نحكيلكم عليهم ومام ماما مالقري تعيط عليا بصح ديما لمصلحتي) ، خرجت من الدار المطر بدات تخف شوي هزيت برابلوي ومشيت رايحة لصحبتي سنااء نروحو مع بعض، اصلا وين نسكنو في قلب لبلاد كلش قريب انا ساكنة في باطيمات وكي نمشي شوي نلقا سطاد واونفاص ليه لابوليس ومن وراه لابريڨاد وتجي بلاصة كلها شجر وخالية شوي كي نمشي من ثم نلقا الباطمات لخرين لي تسكن فيهم صحبتي سنااء، مشيت وانا نخمم في قرايتي والباك لاخاطر نقرا ونثابر وننجح بأعلى معدل باه نلحق لحلمي لي هو الطب وكنت نقرا على هاذ الأساس باه نخرج طبيبة ونفرح والديا وخاصتاً ماما ، كملت نمشي حتى لحقت وين السطاد لبلاصة خالية مشيت بالزربة باه نزرب نلحق حتى سمعت كلاب ينبحو شفت ورايا لقيتهم زوج كلاب ينبحو وجايين من ورايا الدم نشفلي حليت عينيا فيهم وبلعت ريقي حسيت روحي نشليت من الخلعة ماقدرتش نجري بصح كي قربو ليا خفت ووليت نجري ونعيط ونبكي حتى تخبطت فعبد بصح كان كي الحيط حكمت فيه ونبكي ونرعش خطفت نضرة فيه كان طوييل لابس كلش اكحل ملامحو حادة من الخلعة تولهت غير لعينيه نضراتو يخوفو بقيت نشوف من ورايا لكلاب لحقو وليت نعيط ونبكي حكمني من ذرعيا قالي بشوي عليك مكان والو ،عاودت شفت فيه وهاذ المرة ركزت مالقري الخوف شلني ،قلت فقلبي هاذا راجل ولا واش عينيه حومر ونضراتو يخوفو اسمر وشواربو زورق وناشفين، لحقو لكلاب جيت نهرب حكمني وليت نعيط ونشوف فالحالة مكان حتى واحد الدنيا خالية الجو مغيم ومضلم المطر تصب وحد الجو يدير الرهبة مع لي راه قدامي ولكلاب لي ينبحو من ورايا ، عيط عيطة وحدة لكلاب سكتو وحبسو شفت فيهم حكمو بلاصة وهبطو روسهم (علابيها من قبيل واقفين قدامي وماعضونيش غير ينبحو مالا هاذا مولاهم) درت نشوف فيه قرب لعندي وقالي "أهم مواجهة يجب ان نخوضها هي مواجهة انفسنا" متهربيش من واقع حياتك حاربيها ومتمديش ضهرك لعدوك وواجهيه بكل قوتك ، بقيت نشوف فيه وهو يهدر اصلا كانت مزالت الخلعة وجسمي اكل يرجف قالي وين رايحة صباح ربي جاوبتو بصوت يرجف_ نقرى وكنت رايحة لصحبتي باه نروحو كيف كيف ، طلقني من ذرعيا وقالي روحي راني نشوف فيك مشيت وخليتو من ورايا كي بعدت شوي درت نشوف في بالي راح بصح لقيتو واقف ويشوف فيا قلت الحمد لله كون مشي هو وش يصرا فيا كراهم لكلاب كلاولي لحمي ،كملت طريقي لعند سناء صحبتي لقيتها تستنا فيا قاتلي لاه طولتي مارديتش وكملت نمشي كانت الخلعة مزالت فيا (لي جربها يعرف كي يجري من وراك كلب حشاكم تبقاي نهار كامل قلبك يخبط والخوف يشل فيك) ، دخلت نقرا وغير ساكتة ونتفكر فالمنضر تاع لكلاب وزادني هذاك الراجل ونضراتو وهدرتو وصوتو الخشين والله يدير الرهبة ونفس تحبس مجرد ما نخمم فيه....
أنت تقرأ
بًـََـــلَوٌةّْ حًـَـيَاَتٌـــيَ 🌸 صــعـاب المَـــنَالَّ
Romanceالنــِساءّ الجَــميـلاَتّ تقـف لهُنَّ القـلوب انـّبِهَارًا لكـن الحظّ لا يقـف لهُنَّ احّـتِراَماً
