بًـََـــلَوٌةّْ حًـَـيَاَ‌تٌـــيَ 🌸 صــعـاب المَـــنَالَّ

02

  كملت الكور وانا مش مركزا طول غير الخلعة مفشلتني عييت ماننسا بصح والو ، خرجت مع سناء  نمشي فطريق ونشوف ورايا خفت تعاود تصرالي قاتلي سناء وشبيكي علاه منقبيل ونتي مش في حوالك حكيتلها بقات تشوف فيا حتان تكلطات بضحك وقاتلي كون غي شفتك كيفاه كنتي تجري وتبكي خليت عنها  وليت نمشي بزربة المهم نلحق لدار ، لحقت لدار طلعت نجري دخلت ماما مكانتش فدار راحت تخدم الدار فارغة ، رحت طول بدلت قشي لبست بيجامتي ورحت طول لبلاصتي تخبيت تحت زورتي حتى جات ماما على 17:00 ، دارت لعشا تعشينا وجدت قشي لي نلبسو و ساكودو تاعي حطيت فيه لكتب ولكراريس لي نقرا بيهم غدوة  ودخلت لبلاصتي  وماما ملي روحت وهي تشوف فيا بشك وحست بلي بيا حاجة بصح محبتش تسقسي تحبني ديما انا لي نحكيلها وحدي تحب ديما تعطيني راحتي ، بايتة الليل اكل نتقلب والمنظر هذاك يتعاود فراسي رقدت على هذاك المنظر بايتة نحلم ونتخايل  بالكلاب يجرو ورايا و حكموني وعضوني وانا نتعافر معاهم ونعيط ، نضت مخلوعة وعرقانة والنفس راح يتقطع وقفت حليت التاقة ضربتني نسمة باااردة تنهدت تنهيدة طوييييلة رجعت النفس وبقيت نتنفس شهيق زفير وحاطة يديا على رقبتي ونستغفر بقيت زماان على نفس الحالة كان الحال بارد بزاف وانا عرقانة بصح مع حالتي محسيتش للبرد المهم نتنفس وتتنحالي الضيقة ، جيت راح نصكر التاقة وندخل طلعت  راسي نشوف في بالكو الجيران لي فوقنا (الباطيمة تاعنا جاية شكل L يسما من التاقة تاعنا نشوف لبالكو تاع لجيران) نشوف في خيال طول وعرض ميبانش مليح تالمو الضلمة غير ضو خفيف تاع برا ميبانش وجهو شفت غير جمرة خفيفة تاع دخان مت بالخلعة صكرت التاقة ورجعت نجري لبلاصتي افف هاذا نهار تاع خلايع بقيت نتقلب حتى داتني عيني ورقدت ، فطنت صباح على 07:00 ماجيت نتحرك بسيف صبح جسمي مكسر ودوخة وفشلة وراسي يوجع غسلت روحي ولبست قشي مزية وجدتو قبل مانرقد لبست وانا ندز فروحي مش حابة نروح نقرا طول بصح لازم سيرتو كي عندي الباك هاذ العام ، كملت لبست لايمت شعري هكذاك عشوائي وحكمتو لفوق لبست الفاست وهزيت الساكودو وخرجت من شمبرتي نتمايل مش قادرة حتى نمشي، شافتني ماما قاتلي منال وشبيك مريضة ؟_ايه صبحت عيانة وفاشلة_متروحيش تقراي راكي مريضة ابنتي _لالا نروح ماما مدام سنة عندي باك مش حابة نفوت حتى نهار _معليش ارواحي نعطيك تفطري واشربي دوا ونوصلك ، رحت معاها للكوزينة حطتلي لفطور بصح مقدرتش ولات تحتملي هزيت كاس لحليب شربت شوي المهم منشربش الدوا على لفراغ ، كملت راحت ماما لبست وخرجت انا وياها ركبت معاها فطوموبيل طريق كامل وانا حاطة راسي على زجاج ونتفرج فالجو برا مطر خفييفة ، وصلتني قاتلي يابنتي لاعود ترجعي لدار راه وجهك اصفر _اها ماما راني مليحة هيا روحي تخدمي منعطلكش _ايه معليش بنتي تهلاي فروحك وكشما كاين عيطيلنا نجو ليك _صحة يالحنينة بسلامة ، هبطت ندز فروحي وهي راحت تخدم(ماما تخدم صاش فام Sage femme) ، دخلت نقرا بديت الساعة اللولا ماجيت نكملها بطلوع الروح كي لحقت 10:00 صاي مقدرتش خرجت عيطت لخاوتي وبابا وماما قتلهم مريضة مقدرتش طلعتلي سخانة وقراجمي لي نعيطلو يقلي نخدم  (عندي ثلاثة خاوتي كثرمني مراد يخدم فالخارج  ومهدي يخدم مع بابا أنجنيور في تعليم السياقة عندو auto-Ecole  ومصعب كثرمني بعامين يقرا فالجامعة  وختي ملاك مزوجة وعندها زوج ولاد يقولولنا عائلة الميم هههه تالمو كامل اسماءنا  يبدو بالميم مام ماما وبابا يبدو بالميم مريم ومحمد) وليت عيطت لمصعب قالي اخرجي  اقعدي فكاش بلاصة نكمل لقراية برك ونجي لعندك، هزيت حوايجي وخرجت قعدت في بيتزيريا لي مقابلة الليسي ديما نروح ليها مع صحباتي نتغداو ثما دخلت لقيتها فارغة قعدت على كرسي وحطيت راسي على طابلة راسي يوجع وعينيا نحس السخانة تخرج منهم راكم تعرفو حالة لاقريب ، مع حطيت راسي رقدت مافقتش لروحي حتى قداه فات الوقت وانا راقدة حتى حسيت بيد سخونة تمشي على خدي وتبعدلي فشعري على وجهي حليت عينيا بشوية نلقاه هذاك تاع لبارح بصح ملامحو هاادية مش كيما لبارح لالا ليوم يبان شباب يهبل بصح نضراتو نفسها قاسية وملامحو رجولية وعندو ضربة في حاجبو زايدة فيه النص حتى وقفتو تزرع الهيبة ، بقيت نشوف فيه ماقدرتش نتحرك ولا ندير اي ردة فعل ، قالي لاه راقدة هنا ولا بايتة سهرانة؟ مقدرتش نهدر حط يدو على جبيني وقالي نوضي نديك لطبيب راها طالعتلك السخانة سي نورمال تمرضي خارجة فليل عرقانة وعريانة اكيد يضربك هوا ،فقت مع روحي وقفت قتلو وشراك تهدر نتا وديجا شكون نتا باش تجي تهدر معايا هكذا وش دخلك  ،ثم ثم تبدلت نضرتو باين تقلق قالي اهدري بعقلك متعيطيش ڨاع راهم يسمعو فيك، حبست ودرت نشوف نلقا لي في صالة هذيك كامل يشوفو فيا مفهمتش لاه يشوفو فينا هاك صونا تلفوني هزيتو لقيت مصعب يعيط ريبونديت عليه قالي راني برا اخرجي ، خرجت نجري لعندو ماركزت على والو ..