نضت توكلت على ربي لبست عبايتي وخرجت لقيت ملاك تستنا_ هاه خيتي وجدتي روحك؟ درتلها براسي ايه مش قادرة حتى نهدر _اصبري قبل ماتروحي افطري قبل_ لالا مش عاطيني قلبي، راحت جابتلي كاس جو اشربيها خيرمن تبقاي هكذاك لايهبطلك السكر،حكمتها عليها وشربتها غير حتمتها مش عاطيني قلبي طول ورحت هزيت حوايجي وخرجت لقيت مهدي يستنا_صباح لخير لعروس غير تبسمت معاه _هيا نروحو ركبت معاه وجاو معايا لبنات طريق كامل ومهدي يحاول يهدر معايا وينقص عليا الضغط مي انا باقية فحالتي كي لبارح كي ليوم ماتبدل والو نفسيتي تحت الصفر فحياتي ماتوقعت انو عرسي يفوت هك ولا خممت اني نتزوج فهاذ الضروف ، وصلني للكوفاز نفسها تاع لبارح دخلت لعندها لقيتها تستنا نحيت خيماري وعباتي وقعدت قابلت لمراية نشوف فوجهي ولا يخلع بليساغن تالمو لبكا لي بكيتو من لبارح لليوم فحياتي مابكيتو،جات تبدا تخدملي قوتلها مديرلي والو شويا كحل ونوض ياسر عليهم ضحكت وقاتلي والله عندك لحق نتي بلا مكياج تهبلي بصح لازم ديري لاخاطر عرسك في لاصال ويحضر لقريب وبعيد وزيد لازم المكياج راكي تتصدري ثان باه يخرجو فطوات عرسك شابين قتلها دبري راسك غمضت عينيا وخليتها تمكيي قريب ساعة كملت فتحت عينيا بقيت غير نشوف في روحي دارتلي كلش غوز كلار ولشفار ( انا من لول عندي شفاري كاثفيين وطوال) مع لمكياج زادت رسمتلي عينيا وبينتهم ودارتلي غوز كلار في شواربي تبدلت طول بهاذ المكياج كلش سامبل وباهي مباعد بدات مع شعري دارتولي كامل بابليز وطلعاتو من لقدام دارتو بومبي ودارتلي تاج الملكي ومع هو طويل جا يهبل (انا شعري فحياتي ماقصيتو ) كملتلي جبدت الطرحة ركبتهالي كي كملتلي بقيت نشوف فالمراية قريب قلت شكون هاذي ههه يعني صراحة خرجت نهبل(منيش نزوخ بصح ولله عجبتني روحي) وزاد لي معايا كامل عجبتهم قالولي خرجتي بوبيا مشاءلله عليك جبدو لبنات لاغوب جاو عاونوني لبستها (جاية في صدر على شكل قلب ومعمرا بلبيار ولؤلؤ الابيض وبلا سباتي جايا هكاك عريانة وجاية ڨونفلي بزاف ) خيرتهالي بنت عمي (كي كانو يخرجو يجهزولي راحت خيرتها ) كملت وقعدت هزيت تلفون نعيط لمهدي يجي لقيت فيصل بعثلي ميساج فتحتو قالي "عمري على زوج نلحقو وجدي روحك ليلة تباتي في حضني" لميساج تاعو طاح عليا كي الموس على قلبي ايمااا نسيت كامل هذا سوجي من قوة غشي ليه عنبالي ميزيدش يتوشيني وليت نڥيبري من لخلعة وتوتر ولقلقة قلبي راح يحبس بصح قولت غير هذي لي متصراش نحرقو هو بدار وميزيدش يعمل فيا كيما قبل نموت و منخليهش يمسني ، عيطت لمهدي قالي منطولش ونجي هزيت البرنوس درتو على كتافي وقعدت نستنا فيه تفكرت ماما قلت نعطيلها مدام راني هنا بلاك تهز عليا (لهيه فدار لحس ولغنا مكاش كفاه نهدر معاها) بقيت نعيطلها مهزتش عاودت عيطت لمصعب والو مكانش لي رفد عليا(مزالو برك رافضين زواجي) بقيت نكالمي فروحي محبيتش نعاود نبكي لاخاطر اذا بديت منحبسش؛ شوي شوي عيطلي مهدي قالي اذا واجدة هيا قتلو ايه دقيقة برك ، جاو لبنات سقمولي البرنوس وغطاولي مليح صدري وكتافي و حكمو معايا لاغوب ملور وخرجنا بقاو يزغرتو عليا فتحلي مهدي الباب نشوف فيه عينيه مغرغرين بدموع غير محبش يبين قدامي ، ملي طلعنا وهو يضحك فيا دارلي لغنا لبنات يصفقو وهو معاهم وانا غير نشوف (مسكين من لبارح وهو يحاول معايا وانا مادرت حتى ردة فعل الله غالب كي ميكونش القلب فارح ماعندها منين تخرج الضحكة)، وصلنا لدار عاونوني هبطت مع دخلت لقيتهم اكل يستناو فيا بداو يزغرتو وختي تصور فيا وتبعث لماما وخاوتي باش يشوفوني، جاو كامل تصورو معايا وانا دمعتي مانشفت من لول خرجت لعروس صعيبة وزادتني حالتي دخل بابا تصور معايا وفي عينيه الدموع ثم ثم خرج خاف تغلبو دمعتو زاد دخل مهدي تصورنا مباعد حكمني من يدي يشطح فيا درت شوي معاه وقعدت مع الستراس والخلعة ساعة نبكي ساعة نسكت حتى لحقو نسمع في ذيك لفوضى نتاع كلاكسون و لبرود وفيمي الجان ولقرقابو في ذيك دقيقة صح تمنيت لموت ولا نهرب ولا تصرا اي حاجة ويحبس هاذ العرس ..
أنت تقرأ
بًـََـــلَوٌةّْ حًـَـيَاَتٌـــيَ 🌸 صــعـاب المَـــنَالَّ
عاطفيةالنــِساءّ الجَــميـلاَتّ تقـف لهُنَّ القـلوب انـّبِهَارًا لكـن الحظّ لا يقـف لهُنَّ احّـتِراَماً
