جا قعد قدامي قالي وكفاه ضك مارحتي ماخليتيني رحت معاهم نفطر مادرتي فطور حابتنا نصومو 24h قتلو وش يهمني فيك كون رحت لاه تحوس عليا انا لي جات ناكلها ومنيش قادرة ندير والو نحوس غير نرقد وديجا منعرفش نطيب ومقتلكش ازوج بيا بسيف ودير هاذ السيناريو اكل باش نقبل بيك روح كول الرهج ولا اخطي جدي معلاباليش بيك ، شاف فيا ماردش بحتى كلمة وناض بقيت نسمع غير في لخبيط فالكوزينة مانضت ماشفت وشراه يدير تكسلت على الفوتاي وقعدت نتفرج حتى قرب المغرب جا ليا قالي منال نوضي تفطري قتلو منفطرش معاك _مناال اخر مرة نقلك نوضي راني صايم ضك نفطر عليك هيااا نوضي ، محبيتش نوض ودورت راسي عليه جا لعندي حكمني من ذراعي وجرني معاه للكوزينة وقعدني على الكرسي شفت لطابلة تصدمت مأمنتش بلي هو لي طيب هذا اكل قتلو شكون لي طيب؟؟_ ياك ختك جات طيبت وراحت وضحك ، بقيت نشوف لقيتو طيب حريرة وبوراك وطاجين زيتون باللحم وحط طاجين حلو كانت طيباتو يما من قبل يعني مطيب خيرمن الحرة فدار انا ومنعرفش نطيب هك وفي هاذ الوقت لقصير ، شاف فيا لقاني مصدومة قالي ماتتخلعي ماوالو بحكم خدمتي بعيدة تعلمنا نطيبو سيرتو كي نكونو في الصحرا ولخلا لازم نتعلمو كلش خدمة لمرا وخدمة الراجل ، سكت وهزيت المغرفة بديت نذوق والله كلش بنين تقول مرا لي طيبت قالي واش عمري عجباتك الماكلة؟؟_المهم راني ناكل باه منموتش (المهم منشكروش) كملنا لفطور ناض قالي طيبيلي قهوة قتلو منعرفش ولا راح دارها وحدو وهز لفنجان وراح لصالو ، بقيت نتفرج فالحالة لي خلاها وراه لقيتو جبد لماعن اكل ولحالة مرونا ، بديت نلايم فيهم وخبيت واش يتخبا ولخرين حطيتهم يتغسلو مسحت البوطاجي وطابلة وخرجت ، رحت لشمبرتي بدلت قشي وجبت تلفوني عيطت لماما قعدت نحكي معاها ونسقسي على احوالها ؛ فاتو يامات رمضان على نفس الروتين من غير نسا سلافي لي كل مرة يمعنيو عليا باه نوض نعاونهم بصح عجوزتي وقفت معايا وقاتلهم اذا معجبكمش الحال روحو اخطيوني نطيب وحدي ملي هدرت معاهم هكاك تكالماو وحدهم ومازادوش جبدوني اصلا معلاباليش بيهم يهدرو ولا يقعدو انا دايرة لي في راسي وهوما يهدرو ويجي وقت ويسكتو ، بقاو يومين على العيد وكل صباح يطلعو يطيبو القاطو الله يبارك شاطرات دارو قاطو من كل الانواع ، كنت قاعدة فشمبرتي كي العادة هازة المصحف ونقرا دخل فيصل لعندي حطلي دراهم فوق لاطابل قالي مباعد بعد لفطور روحي مع لعجوز اشري قش ووش يخصك للعيد (هوما يخرجو بعد لفطور يشرو تالمو كلش قريب)، قتلو منحتاجش دراهم _منال لاه تحبي تناقشيني فكلش وكل كلمة نقولهالك تقعدي تهبلي فيا خلاص قتلك هاكي دراهم وروحي مع لعجوز، كمل هدرتو وراح خرج وخبط الباب قتلو اخبط راسك معاه عاود فتحو قالي وش قلتي؟؟_والو قالي صحة ندير روحي مسمعتش غلق الباب وراح..
أنت تقرأ
بًـََـــلَوٌةّْ حًـَـيَاَتٌـــيَ 🌸 صــعـاب المَـــنَالَّ
Romanceالنــِساءّ الجَــميـلاَتّ تقـف لهُنَّ القـلوب انـّبِهَارًا لكـن الحظّ لا يقـف لهُنَّ احّـتِراَماً
