خرجت نجري لعند مصعب لقيتو واقف برا ويستنا فيا قالي وشبيك _راني مريضة في حالة _اا حسبتك خفتي من هاذوك علابالي تخافي منهم ومتحبيهمش _شكون هوما هاذو_دوري راسك ضك تعرفي ، شفت من ورايا لقيت زوج طوموبيلات نوار تاع البياري كامل راكبين غير وحدة جيهة الشيفور فارغة بقيت نشوف حتى خرج هاذاك يمشي بشوي بصح وقفتو ومشيتو يفشلو ههه عاقد حواجبو ووجهو سيف ميقصوش (اجدك يخوووف) ، رحت نجري ركبت فطوموبيل وقلت لمصعب هيا اطلع وصلني لدار جا يضحك طلع وقالي يالخوافة لاه تخافي منهم قتلو هاذو برك مش عباد كيفنا والله يخوفو ، وصلنا وين نسكنو زاد عليا الحال دايخة وفاشلة وقراجمي يحرقو ويوجعو الريق ماقدرتش نبلعو وجسمي مكسر تكساار هبطت من طوموبيل حاكمة في مصعب لاخاطر دخت مقدرتش نمشي وحدي مشينا باه ندخلو للباطيمة تلاقا مصعب بجارنا قعد يحكي معاه وليت نجبد فيه ونقلو هيا حسيت قلبي راح يخرج وقوات عليا الدوخة قلت لمصعب بصوت خافت ازرب راح نطيح .. ماجبت خبر حتى طحت بقيت نسمع فمصعب ينوض فيا ومنها مازدت فقت على والو ماعرفت حتى شكون هزني حتى فطنت وانا في سبيطار السيروم في يدي ولماسك تاع الاكسجين في فمي (انا من لول مريضة عندي ضيق التنفس ) دورت راسي لقيت تاع دارنا كامل ثم جا لعندي بابا قالي بنتي خوفتيني عليك وزادت جات ماما قاتلي منال يخي قتلك متروحيش ملي نضتي صباح حالتك معجبتنيش ونتي غلضتي راسك ورحتي شوفي وش صرا فيك ، ناض مصعب ومهدي يقولولها مبيها والو راها غير تتعزز كي عوايدها ويضحكو عليا نسيت مرضي ووليت نضحك معاهم قعدو يضحكو معايا ويعلقو وانا غير نضحك حتى طبطب الباب وتحل لقيتو نفس الراجل تاع لبياري واقف فالباب راح ليه بابا وخاوتي يهدرو مع بعضاهم كشغل يعرفو بعضاهم من زماان سيرتو مهدي يضحك معاه ويشايخ سمعتو يقلو خويا فيصل يكثر خيرك والله مصعب في هاذ المواقف مانتكلوش عليه _بلامزية هذا واجبي ورانا كنا عشرة المهم تهلو فيها وراح خرج ، بقيت حالة فمي في هدرتو وشمن عشرة انا اول مرة شفتو نهار جراو ورايا لكلاب وهذوين عرفت بلي هو لي هزني وجابني لسبيطار ، قلت لماما هذا شكون _متعرفيهش هاذو كانو جيرانا بكري اييه كون تشوفي كفاه كان بكري سبحان الله كان عبد وضك ولا عبد آخر ، سكت وقعدت نستنا في سيروم يكمل ونرجعو لدار ، بعد ربع ساعة كمل جات ماما نحاتولي وعاونتني نضت لبستلي الفاست وجا مهدي دارني تحت جناحو حطيت يدي على ضهرو ويدي لخرى حاكماتو من تريكو جيهة صدرو مزالتلي الفشلة كون نطلقو نطيح نمشيو غير بشوي حتى لحقنا للباب تاع برا لقيتو نفس الراجل واقف قدام الطوموبيل تاع صباح مع زوج رجال شاف فينا ودار ل يلي معاه يعيط عليهم هيااا ازربوو نقعدوو عام هناااا ، تخلعنا بقينا غير نشوفو في بعضانا لحقو طوموبيلات اخرين كيما تاعو هبطو رجال لابسين كلش نوار حتى وجوهم مغطيين يبانو غير عينيهم هازين سلا.ح واقفين كي لحيوط دقيقة سركلو الحالة وهو يعيط عليهم وهوما روسهم في لرض، الفشلة حكمتني النفس راح يتقطعلي مت يايما وش نخاف منهم قتلهم هيا نزربو نهربوو خلاص راح نموت ناضو يضحكو عليا ومهدي قالي ضك نعيطلهم نقلهم ارواحو اديوها منحتاجوهاش هوما يضحكو وانا الخلعة فشلتني حتى شفتو جاي لجيهتنا وبلاما نوصفلكم مشيتو ونضراتو ، لحق لعندنا شاف فيا وقالي وش بنتي ريحتي؟ بقيت نشوف فيه ونشوف في تاع دارنا قالو مهدي هذوين كانت لاباس عليها حتى شافتكم راه قلبها راح يحبس وزدنا قلنالها نعيطولهم يديوك هههه راها راح تموت ،شاف فيا وتبسم قالهم مالا ازربو اديوها لا ندور فرايي ونديها معايا ، كنت فاشلة ودايخة فدقيقة كلش راح ورحت نجري لطوموبيل شفت ورايا لقيتهم يضحكو عليا وهو يشوف فيا ومركز فيا ،طلعت لطوموبيل جاو ماما وبابا طلعو وخاوتي كل واحد راح فجيها ، روحت لدار دخلتني ماما تكسلت فبلاصتي راسي راح يطرطق حابة غير نرقد مع حطيت راسي دخلت ماما جابتلي سوب قاتلي نوضي منال كولي باه تشربي دوا _ مش عاطيني قلبي ماما خلي للمباعد_ لالا بنتي نوضي لاشتا زوج مغارف ، نضت حتمتلي شوي وشربت دوا ورجعت رقدت مانضتش حتى لصلاة المغرب وقفت رحت لدوش توضيت وصليت ورحت لماما لقيتها فالكوزينة طيب فالعشا قعدت فالكرسي مقابلتها وهي طيب قاتلي وش ريحتي شوي؟_شوية ، دخل مهدي ومصعب هازين صواشي عطاوهملي قتلهم وش هاذا قالولي ليك كي عدتي مريضة ضحكت وفتحتهم لقيتهم جابولي شواكل وشيبس وحلويات من كل الانواع ههه ديما هك قد مانكبر يبقاو يشوفوني صغيرا (نحكيلكم على علاقتي بيهم انا الصغيرا فيهم مدللة و عنيدة وديما لي نطلبها تحضر عندي خاوتي زوج مهدي ومصعب مدللني لآخر درجة سيرتو مصعب ديما يزعق عليا ويحب يقلقني اما مهدي اكثر واحد حنين عليا وديما متهلي فيا وماما وبابا مديتهم الخدمة بصح مهتمين بينا وخويا لكبير مراد لي فالخارج هو الواعر فيهم ملي يجي وهو فعقابي علاجال الحيجاب يضال يقلي ديريه واستري روحك وديما فارض عليهم ويقلهم متخلوهاش تخرج وحدها وليت نخرج غير فطوموبيل غير للقراية ساعات نروح مع صحبتي الوحيدة لاخاطر من خوفو وليت منخالطش لبنات وكان ديما يسقسي عليا من بعيد وكي يكون هنا يحب نعاودلو بتفصيل على نهاري كفاه فات اما ختي مزوجة وتسكن في ولاية بعيد متجيش ديما قلييل )..
أنت تقرأ
بًـََـــلَوٌةّْ حًـَـيَاَتٌـــيَ 🌸 صــعـاب المَـــنَالَّ
Romanceالنــِساءّ الجَــميـلاَتّ تقـف لهُنَّ القـلوب انـّبِهَارًا لكـن الحظّ لا يقـف لهُنَّ احّـتِراَماً
