#بًـََـــلَوٌةّْ_حًـَـيَاَتٌـــيَ
بقلم الملكة للقصص 🌸
الحلقة 81:
سمعت لباب يطبطب رحت فتحتو لقيتهم خيات فيصل جاو مع شافوني قالولي لمريضة لاه نضتي ويضحكو_والله بنت عمكم ضربتلي لبرا عوجتلي جنبي وضحكت معاهم،سلمت عليهم ورحبت بيهم هوما وولادهم جات يما يسلمو على بعضاهم ويتحضنو تفكرت حالتي وبلي ملي زوجت مارحت لدارنا هك وماما راني قريب عامين ماشفتها توحشتها وتحوشت ريحتها وتوحشت حنانتها عليا اااه ياربي واشراه مصبرني عليهااا و ديما نبان كوراج مي فهاذو المواقف نضعف شافتني يما فاقتلي طول جاات حطت يدها على كتافي ومشاتني معاها قاتلي روحي بنتي جي فبلاصتك وريحي روحك(كل مرة تحسسني بطيبة قلبها لي فحياتي ماشفت كيفها)رحت لبلاصتي وقعدت شوي هك ولحقو لبنات قعدنا شياخة وضحك والله قصرتهم ماتتمل ملي قعدنا وانا حاكمة كرشي ونضحك زدت حكيتلهم على هاذي خلود ووش تحكي قالولي مديريش عليها هذيك لمسمومة راها خدمتهم يخربو لبيوت كي تهدر ديري روحك مسمعتيش راكي كون ديري عليهم يدخلو فحياتك كي لوسواس الخناس يفسدو كلش_ايه باينة اصلا كي جات صباح كانت اول مرة نتعارفو وبداتها طول بالهدرة هاذي،لحق وقت لغدا جابتلي يما قتلها خلي برك ضك نجي نتغدا معاكم محبتش قاتلي نجيبلك ونقوم بيك حتى تريحي المهم جيبيلي حفيدي على خير برك ومانطلب والو وليت سكت حطيت ناكل وشربت دوا وتكسلت مع حطيت راسي دخلت فغيبوبة اصلا عندي وقت وانا نحب نرقد (من نشفا لعمري نحب النوم وزادني لحمل) بزاف مانعرف من لوحم ولا كي عدت غير قاعدة؛مافقتش حتى لعشية نضت غسلت وجهي وسخنت لحليب شربت ورحت لصالو لقيت يما ولبنات يشايخو قعدت معاهم وكي العادة القصرة وضحك حتى لليل،دخل فيصل هاز صواشي وحدة مدها لولاد خياتو جابلهم شيبس وحلوى ووو ولخرى عطاهالي قالي هاذي لوليدي(ماعندوش في فالقاموس حاجة اسمها حشمة انا دخلت تحت لرض وهو يقلي جبتهم لوليدي وخياتو وامو قاعدين)قعد قدامي و شاف للعجوز وش درتيلنا للعشا_درت شوربة و مثوم_هيا حطيلي مالا راني ميت بالجوع_ايه ضك نحط لوليدي اصلا مزال ماتعشينا، هوما ناضو وهو قرب لعندي وحط راسو على كرشي_وشراه وليدي راه يتحرك؟بسمالله هذا وين فيصل هبلت لاه شحال عمرو هاذا لي يتحرك ضك راه مزال ماتكونش_اهااه حقا نتي طبيبة وتعرفي قوليلي وقتاه يولي يتحرك _مزال على الاقل نلحق للشهر الرابع ويبدا يتحرك_هانا نستناو مالا ديجا علابالي بني فحل كي باباه كون راه يتحرك ضك غير نتي متفيقيش_والله عييت نفهمك بصح نتا راك مقتانع المهم انا نوض اذا تتعشا هيا تروح_اقعدي راكي مريضة ضك يجيبولك_خلي برك عيب وبديت نحشم منهم _قتلك اقعدي،وليت قعدت وهو ناض راح شوي ورجع هاز مع بلا قالي ليوم نتعشا انا وعمري،حط على لاطابل وبدا يهز ويوكل فيا ومرات ياكل هو ويضحك معايا ويضحك فيا_لازم ياكل السبع نتاعي لازم يخرج معزبر (عضلات)لي يوقف قدامو يهرسو_ياا نتا ضك عندك كلشي بلعنف هذا مزال قااع مزادش ونتا تحوس عليه يخرج هاك وديجا وين علبالك بلاك راه طفلة_لالا راجل اني حاس بلي راجل احساس الاب ميكذبش...
أنت تقرأ
بًـََـــلَوٌةّْ حًـَـيَاَتٌـــيَ 🌸 صــعـاب المَـــنَالَّ
Romanceالنــِساءّ الجَــميـلاَتّ تقـف لهُنَّ القـلوب انـّبِهَارًا لكـن الحظّ لا يقـف لهُنَّ احّـتِراَماً
