ركبني وهو يرمرم تحت لسانو وياكل في روحو ونا قلبي خارج منو جا ليا دارلي سنتورا وديمارا طار بيها قلبي حسيتو حبس ونفس ضاقت كي عاد يسوق بزربة، وليت نعيط عليه ونخبط فذراعو تاع خلاص مقدرتش هو والو صنم حتى شافني كيفاه نرعش وضاقت نفسي بدا ينقص سرعة وڤارة في بلاصة نتاع شجر قالي ضرك نتي وش تحوسي فهمني لاه راسك يابس وش تحوسي حابة نمحيك من لوجود باه يهنا خاطري ونريح بالي قتلو خليني نروح راه قلبي رح يخرج من خلعة ودارنا مرفدوش عليا قالي راهم في محكمة وخوك حكموه 3 شهر وغرامة ماليةهدا لي قدرت نديرولك _انا؟؟ _ايه نتي يخي مصعب خوك وغير باه هدو لعوينات ميبكوش ولا كون راه حكمو عليه 10 سنين حبس ، بقا يشوف في عينا زماان وقالي يامنال هني خاطري وبالي ديري حجاب استري روحك لحاجة لي راهي شافعتلك انو مكيش تخرجي بزاف. ولا خرجتي تخرجي بطوموبيل هني خاطري وتحجبي وحطي راسك في لقرايا ونا نكون معاك ديما قتلو خليني منحتجكش في حياتي بعدني _شوفي نسعافك هدا لوقت مي مع ليام تشوفي وشكون فيصل _وشكون هدا منشوفو ميشوفني ونتا مكش من جور لي نحوس عليه _اهاه ملا وشمن جور ابنتي تحوسي_ منحوس على والو اخطني برك تكفيني قرايتي برك _ ها شوفي هدا وشنو ورالي تلفونو رقم نتاع مراد قلي اسمعي وش نقلو باش تعرفي معامن راكي تمشي ( اربي قلبي راح يحبس معاه) بقيت غير نشوف فيه مضنيتش بلي يهدر منو بصح،حتى لقيتو عيطلو ودارو انترفون رفد عليه خويا قالو اهلا الحبة وين راك قالو راني في بلاصة عقلك ميتخلهااش راني مع ... وسكت ونا بقيت ندورلو براسي لالا وحكمتلو يدو تاع متهدرش دار لكتم (mute) قالي شوفي منال نهدر معاك ولي نقولها طبقيها انا منيش راح نضرك لي حبيت عليها ديرهالي صينووو نفضحك ونديرلك لعيوب سبعة ومتخرجيش منها الا على جثتك (ايي ربي قلبي راح يخرج على نيفي هاذا صح بلوة وش يحوس من عندي ولالي كوشمار تاع الصح)، قتلو اوكي لي حبيتها نديرها المهم متقولش لخويا والله يقتلني (تاع دارنا على قد ماهم متفتحين بصح فهاذ الموضيع ميفهموش كون يسمعو بيا ركبت مع واحد والله يشربو من دمي سيرتو مراد وهاذا فيصل يبان معندو علاه يخاف كلش عندو نورمال) ، رجع الصوت وقالو راني مع ####(اسم واحد كلوشار منضالش نذكر في اسمو نشفا عليه ملي كنت صغيرا كان داير الباطل كان واعر وهو لوحيد لي شفيتلو لاخطر كان او نفاص لينا يسكن عليها منسيتوش مباعد دخل لحبس معدوش وقت ملي خرج من ثم) ضحك مراد قالو انا صااي راني تبت من دعاوي شر وراني راح نستبيت وندير مرا وولاود وياك نتا ثان تبت وش دير ثماك _ ياو راني نرجع في لحنين لماضي برك ( ادروڤ ولغبرة وشراب ولاو حنين الماضي ههه ) يهدر معاه ويشوف فيا عينيه كلاوني يحفظ في وجهي ، خويا قالو فيصل ولله مننسا الهدة هذي ووقفت معانا في المصيبة تاع مصعب لي تقولي عليها راني هنا _ مبقاش نطلبك في حاجة سبسيال ليا (قصدو عليا ونا لخبر )قلو معليش اهلا سهلا تستاهل مكثر كوبا عليه ، قالي شفتي هدا ابسط مثال (يخوف فيا وتاع الصح زرع فيا الخوف ملداخل وليت نرجف )، قتلو وصلني لدار ولا خليني نهبط نروح وحدي ، شاف فيا زماان بلاما يهدر مباعد شعل الطوموبيل وديمارا طريق كامل وانا حاكمة قلبي ودموعي متحجرين غير حاكمة في روحي وهو ساكت ومرة على مرة يخطف نضرة ، وصلني قريب لدار هبطت بقا من ورايا يشوف فيا حتى لحقت وباه راح ، طلعت لدار لقيتهم روحو ماما في حالة قاتلي خوك حكمو عليه 3 اشهر حبس بصح الحمدلله هك ولا كثر قتلو الحمدلله ورحت طول لشمبرتي ماحبيت نهدر مع حتى واحد خوفي من البلوة لي طاحت على راسي مخلانيش نركز مع والو مزية كملت مع الباك سينو الحيرة تاع مصعب مع الخوف تاع هاذ الموصيبة راه الباك راح ..
فات شهر ولحق النهار لي يخرجو فيه نتائج الباك الستراس داير فيا حالة تلايمنا كامل ماما بابا خاوتي يخص غير مصعب كي تفكرتو دمعة طاحت تمنيتو يكون معايا في هاذ النهار ، قرب الوقت قالو بلي نتائج يخرجو على 16:00 حاكمة صباعي ونزير عليهم من الستراس خفت منجيبش المعدل لي كنت حاباتو ومنحققش حلمي بسبة المشاكل لي صرات شفت في ماما عينيها مغرغرين بدموع خايفة كثرمني غير محبتش تهدر وتكورج فيا ، كي لحق الوقت قلت لمهدي شوفلي نتا هز تلفون كتب رقم التسجيل بقيت نشوف فيه حتى شاف فيا وتبسم عطالي تلفون وقالي مبروك عليك حكمت عليه تلفون ركزت طول مع المعدل لقيتو 16٫74 وليت نعيط ونفرح ونصوطي وماما تزغرت فرحة الباك وحدها خاوتي وبابا يتحضنو فيا ويباركولي فرحولي بزاف هو صح تمنيت معدل كثر وكنت قادرة نجيب كثر مي الحمدلله المهم مهبطتش بزاف ..
أنت تقرأ
بًـََـــلَوٌةّْ حًـَـيَاَتٌـــيَ 🌸 صــعـاب المَـــنَالَّ
Romanceالنــِساءّ الجَــميـلاَتّ تقـف لهُنَّ القـلوب انـّبِهَارًا لكـن الحظّ لا يقـف لهُنَّ احّـتِراَماً
