اي ربي وش راه يقول هاذا قتلو اطلقني متوشينيش ،زاد زيرني من يدي وجبدني عندو قالي ﴿كُن بقربي دائماً خفِفَ مِن ضجيجُ الحياة بِصوتك أخبِرني أنهُ لا شيَء سيء وأنتَ بِالقُربَ مني﴾ بقيت باهتة فيه والافكار تدي فيا وتجيب حسيتو مش طبيعي ومعرفتش هاذا وش يحوس مني حطيت يدي على صدرو وندز فيه ومحبش يطلقني جيت نعيط وخفت من تاع دارنا كون يسمعو وش يقولو بقيت نشوف فيه والخوف متملكني قالي ديري الحيجاب وهنيني راكي عذبتي قلبي وشعرك مديه الريح وانا قلبي مابقا يحمل متعذبينيش ياعيون الريم (نوصفلكم روحي باه تعرفو لاه يقلي عيون الريم انا ديما يشبهوني لهذيك الممثلة التركية إسراء بيلجيتش عينيا نوازات مايلين للأخضر كيفها كبار ومشفرين ومام الملامح نفسهم انا برك عندي لخدود وبيضا شعري مارون وطويل في طولي مليحة برك مام فلاطاي مليحة ماسمينة مارقيقة وكنت سفسليزي وهذا هو سباب مشاكلي) قتلو بعد تعيش تعيش ضك يشوفونا الجيران ويفهمونا بناقص(وهاذي اكبر غلطة درتها هي اني بينتلو خوفي من الناس )، طلقني طلعت نجري مشفتش طول من ورايا نسمع فيه يعيط من ورايا ويقول والله ياو متستريش روحك ندفنك فبلاصتك طلعت نجري مشفتش فيه ياربي هذا منين خرجلي ومنين طاح عليا ووش دخلو فيا اصلا شكون هو حتى يدخل فحياتي والديا وخاوتي ومفرضوش عليا من غير مراد بصح غير يهدر ومقدرليش ، دخلت لدار قلبي راح يخرج ياربي وش البلوة هاذي لي تبليت بيها دخلت لشمبرتي خفت ماما تتوله وتفيق بلي كاينة حاجة ، قعدت على سرير نرد نفنس حتى سمعت تلفوتي يصوني رحت هزيتو لقيتو نميرو جديد محبيتش نهز حطيتو شوي هك دخلي ميساج فتحتو لقيت نفس النميرو باعثلي ﴿نتي حبة حلوة ولحلوى كي متتغطاش يدور بيها الذبان امالا ديري على هدرتي واستري روحك باه واحد مايدور بيك زينك خبيه من العين واذا شين خبيه من لفضايح﴾ اووف اربي هذا وش راه يقول ومنين جاه نميرو تاعي خفت منو هاذا راه يحاول يوصلني بأي طريقة وباين تاع راسو ميخافش من حتى واحد وضك انا لمن نقول ولمن نشكي ووش يحوس من عندي هذا ، قعدن نطلع نهبط مالقيت حتى حل وديجا وحدة فعمري سينورمال ماتعرفش تتعامل مع موقف كيما هاك والخوف راح يكون سيد الموقف وليت نضت رحت لماما لقيتها متكسلة وتتفرج قعدت قدامها قتلها ماما هاذو ناس لي فوقنا وقتاش سكنو_مرحلوش اصلا ديما يروحو يطولو ويرجعو هنا ، انا متولهتش ليهم طول لاخاطر منخرجش بزاف ومن لقراية لدار ومانداسرش حتى واحد من الجيران ومام الباطيمة تاعنا كبيرة بزاف فيها 15ايطاج وكل ايطاج فيه 4 ديار يسما نعرف غير يلي في ايطاجنا ؛فاتو يامات بقيت نعس فروحي من هذاك لعبد (فيصل) ريحت شوي كي مراهش يبان وليت رجعت تركيزي لقرايتي لحقو امتحانات الفصل الثالث وانا نوجد للباك الليل منرقدوش وانا نقرا ونحفظ حطيت كل جهدي باه غير ننجح الباك تاعي بالمعدل لي حابتو ، كنت كل مانوض فليل نقرا تلفوني يبات يصوني يوميا في نفس الوقت نفس نميرو عرغتو طول بلي فيصل بصح محبيتش نهز عليه مزلت برك خايفة منو ونحاول نتجنبو قد مانقدر ، فهذيك الفترة انا كنت مع قرايتي وتاع دارنا يوجدو لعرس خويا مراد ( مقتلكمش كان خاطب بنت خالي ويستناو نفوت الباك برك ويدخل)، في هاذ الفترة كنت منخرجش بزاف غير مع خاوتي ولا بابا مراد كان موصيهم ومحذرهم باه منخرجش وحدي ولقيت بلي صح عندو الحق كون نخرج تصرا فيا ديڨة وشعبنا ميرحمش سيرتو فالمنطقة تاعنا (انا كنت نسكن في ولاية من ولايات الوسط) ، كيما قتلكم منطقتنا ميحبوش لمرا كي تكون سيفيليزي وزيد شابة ومرفهة نلبس غير الحطة وانا مالقري كنت نعقب الباك بصح متبانش عليا ملامحي بريئة وكلش فيا يجذب حتى بابا ديما يقلي كون جيتي سمرا رانا نقولولك الهندية لاخاطر نشبه لماما وديت منها العينين كانو ديما يقولولي عينيك يشبهو لعينين غزال الريم علابيها فيصل ديما يقلي عيون الريم (منيش نشكر فروحي لاخاطر الزين ربي هو يلي يمدو بصح انا بسبة هاذ الزين عانيت بزاف )
أنت تقرأ
بًـََـــلَوٌةّْ حًـَـيَاَتٌـــيَ 🌸 صــعـاب المَـــنَالَّ
Romanceالنــِساءّ الجَــميـلاَتّ تقـف لهُنَّ القـلوب انـّبِهَارًا لكـن الحظّ لا يقـف لهُنَّ احّـتِراَماً
