قاتلتي ومعشوقتي

33- مـسـاومـة

صلي على خير الأنام 🤎

توقفت بالسيارة على الجرف بشكل مفزع حتى بات بين الحافة والسيارة مترًا واحدًا فقط

خرجت سكر من السيارة وهي تضحك بصخب على بلال الذي كان يسبها علنًا بسبب قيادتها المتهورة هذه، يقسم أن السيارة كادت أن تنقلب عدة مرات وهم على الطريق

جلست على مقدمة السيارة وهي لا تزال تضحك ومن بين ضحكاتها كانت تقول بينما تضع الشالموه داخل الكوب الورقي الماكث بين يديها :

-طب تعالي اقعد وكفاية شتيمة ده انت بتصلي يا بلال

اخرج الآخر رأسه من النافذة صارخًا بحنق :

-الله يخربيت بلال علي اليوم اللي شافك فيه على اليوم اللي حبك فيه يا سكر، ارجعي شوية بالعربية هنتقلب لتحت ولا انتي عايزانا نتقلب عادي

غمزت له سكر هاتفة بمشاغبة :

-لو معاك فأنا مستعدة نتقلب عادي يا أشقر انت يا فرنسي

اتسعت أعين بلال بذهول وهو يستمع الي هذه الكلمات التي تخرج من فم سكر... سكر التي كانت تصاب بجلطة إن مر يومًا دون أن تستفزه :

-بت انتي شاربة حشيش ولا ايه

ابعدت الشالموه عن فمها مبتسمة بإتساع :

-لا والله ده آيس كوفي

جلس بلال الي جانبها على مقدمة السيارة مع حفظ المسافة وحينما نظر الي الأسفل شعر بالرهبة من الارتفاع المخيف :

-يا لهوي لو وقعنا هنبقي ملح حرفيًا

نظر إليها بإشمئزاز وهو يستمع الي الصوت الذي تصدره وهي تشرب وما إن لاحظت هذا ابعدت الكوب هاتفة بتعجب :

-ايه ما هو الآيس كوفي طعمه حلو

-طب متعمليش صوت ثم انتي جايبة واحد بس ولا اي

-ااا هو انت كنت عايز مكنتش اعرف يا بلبل

هتفت بها بابتسامة عريضة فتمتم الآخر بحنق :

-مش عارف بصراحة انا بحب فيكي ايه

-علشان انا قلبك وعمرك وروحك وكيانك مش محتاجة

ضحك بخفوت ثم نظر إلى سفح الجبل بالأسفل هاتفًا بجدية :

-انتي كنتي بتتكلمي بجد لما قولتي مستعدة نتقلب عادي لو انتي معايا، كان بجد ولا مجرد تثبيت

ابتسمت الأخرى لتضع الآيس كوفي جانبًا ثم هتفت بصدق :

-بعيدًا عن كل استفزازنا لبعض وحرقنا لدم بعض وماضينا العرة ده انا مقدرش اكمل يوم على بعضه من غير ما اتكلم معاك يا بلال ومن غير ما ابصلك، ولو جيه في يوم حصلك حاجة هتاخد روحي معاك وتمشي وهفضل انا على الأرض دي جسم ماشي من غير روح، علشان الحياة من غير الخناق والكلام معاك زي الأكل من غير اي توابل ولا ملح حتى