unicode
မှောင်မိုက်နေသော အဆောက်အဦးတစ်ခု။ ပတ်၀န်းကျင်တစ်ခုလုံးကလည်းတိတ်ဆိတ်နေသည်။
ထိုစဥ် ထယ်ဟျောင်းဆွဲထားတဲ့လက်ကိုဖြုတ်ချသွားသည့်ဂျက်စတင်။ ထယ်ဟျောင်းအထိတ်တလန့်နဲ့လှမ်းဆွဲလိုက်ပေမယ့် မမှီလိုက်။ ဂျက်စတင်ကလက်ထဲတွင်ဓားတစ်လတ်နှင့်ဂျယ်မင့်ဆီကိုပြေး၀င်သွားတော့တာ ။
"ဂျက်စတင် ရပ်လိုက်! ငါ့စကားကိုနားထောင်"
ဂျယ်မင့်လက်ထဲမှာရှိနေတာက ဓားမဟုတ်ဘဲ သေနတ်တစ်လတ်ဖြစ်သည်။ ဂျက်စတင် ဂျယ်မင့်အနားကိုတောင်ကပ်လို့ရမှာမဟုတ်တာထယ်ဟျောင်းသိသည် ။ သို့ပေမယ့်မျက်ခုံးတွေတွန့်ချိုးလျက် ဒေါသမီးလောင်မြိုက်နေတဲ့ ဂျက်စတင်ကတော့ သူ့အော်သံကိုတစ်ချက်လေးမှလှည့်မကြည့် ။
"ဂျက်စတင်ငါပြောနေတယ်!!"
အသံကုန်ဟစ်နေပေမယ့် ထယ်ဟျောင်းအသံကတိုးနေလွန်းသလိုခံစားရသည်။ ခြေလှမ်းတွေကလည်းနေရာကနေမရွေ့။
"ဒိန်း"
မျက်စိရှေ့မှာလဲကျသွားတဲ့ ဂျက်စတင့် ခန္ဓာကိုယ် ။ ရင်ဖက်နေရာမှာ ကျည်ဆံအပေါက်ရာဖြင့် သွေးတွေစီးကျနေသည်။
"မောင်!"
သိမ့်ခနဲတုန်သွားတဲ့ခန္ဓာကိုယ်နှင့်အတူထယ်ဟျောင်းအိပ်ရာရင်းမှအော်ဟစ်လိုက်သည်။ ထယ်ဟျောင်းရဲ့မျက်လုံးတွေကမှိတ်ထားဆဲ။ အပြင်မှာမိုးတွေရွာနေကာညသန်းခေါင်ကြီး ထယ်ဟျောင်းအိပ်မက်ကနေယောင်နေတာဖြစ်သည်။
"ဘေဘီ .. ဘေဘီ အဆင်ပြေရဲ့လား"
အသက်ရှူတွေမြန်ကာ ချွေးစေးတွေပြန်နေသော ထယ်ဟျောင်းပုံစံကလုံး၀ထိတ်လန့်နေသည့်ဟန် ။ ဂျက်စတင့်တစ်ယောက်စိတ်ပူကာ ထယ်ဟျောင်းကိုအတင်းလှုပ်နှိုးနေသည်။
ရေချိုးခန်းထဲကထွက်လာသည်နှင့် သူတို့နှစ်ဦးလုံး အ၀တ်အစားလဲကာ အိပ်ရာ၀င်ခဲ့ကြတာဖြစ်သည်။ အရင်ဆုံးအိပ်ပျော်သွားတာက ထယ်ဟျောင်းဖြစ်၍ ဂျက်စတင်ကပဲအစစအရာရာအကုန်သန့်ရှင်းပေးထားတာ ။ အခုလည်းညသန်းခေါင်ကြီးကျမှေယာင်နေကာ အထိတ်တလန့်ဖြစ်နေသော ထယ်ဟျောင်းပုံစံကြောင့် သူ့မှာခြေမကိုင်မိ လက်မကိုင်မိ။
