unicode
မနက် ၇ နာရီလောက်ကြီး အပြင်သွားဖို့ပြင်ဆင်နေသော ဂျက်စတင်ဟာ သီချင်းလေးဆိုရင်းနဲ့ကို လုပ်နေတာဖြစ်သည်။ ရှေ့ရက်ကျရင် အကြွေးဆပ်ဖို့ရှိသည့် gang တစ်ခုဆီသွားဖို့ရှိသည်။ ဒီနေ့တစ်နေကုန်အိမ်အပြင်မှာပဲ အချိန်ဖြုန်းဖို့တွေးထားသဖြင့် ထို gang ကိုသတိသွားပေးဖို့ဖြစ်လာသည် ။ ပြီးရင်တော့ ဟိုတယ်တစ်ခုခုမှာ၀င်နှပ်မယ်တွေးထားပြီး ညနေကျရင် ကလပ်သွားမည်။
အဓိက က ဒီနေ့အိမ်မှာရှိမနေဖို့ပင်။ တစ်စုံတစ်ယောက်ကတော့ သည်းကြီးမည်းကြီး လိုက်ရှာနေလေတော့မည်။ တွေးမိရင်း ဂျက်စတင့်နှုတ်ခမ်းပါးတစ်ဖက်က ကော့တက်သွားသည်။
အ၀တ်အစားလဲပြီးပြီဖြစ်၍ မှန်ရှေ့ကိုသွားလိုက်တော့ မှန်ထဲတွင်မြင်လိုက်ရသည့် မိမိမျက်နှာပေါ်က ဒဏ်ရာကြောင့် ဂျက်စတင် မျက်ခုံးတို့စုကျုံ့သွားသည်။ ဘယ်ဖက်ပါးပေါ်မှာထိထားတဲ့ဒဏ်ရာက အမာရွက်ကျန်လောက်မည်ထင်သည်။ အရမ်းကြီးမကြီးနေတာတောင် အသားဖြူတဲ့သူ့အတွက် မျက်နှာချောချောထက်မှာ ဒဏ်ရာက အထင်းသား..
အဲ့ဒါတင်မကသေးချေ။ သူဟာအခု ဂျင်းဘောင်းဘီဒူးအပြဲနှင့် suit jacket ကို အောက်ခံရှပ် မပါဘဲ တွဲ၀တ်ထားတာဖြစ်သည်။ အောက်ခံရှပ်အင်္ကျီမပါသဖြင့် သူ့ရဲ့တောင့်တင်းနေတဲ့ ရင်ဖက်ကြီးနှင့် ၀မ်းဗိုက်ကြွက်သားတွေက အတိုင်းသားမြင်နေရသည်။ ဒီပုံစံမျိုးက ဂျက်စတင်သူ့လုပ်ငန်းအတွင်းမှာပဲ ၀တ်တတ်တာမျိုးဖြစ်သည်။ အခုကလည်း ဟို gang ဆီကထွက်တာနဲ့ အ၀တ်ပြန်လဲမှာဖြစ်၏
အဲ့ဒါထက် အခုသူ့လည်ပင်း ညာဖက်ခြမ်းက လက်သည်းရာကြီးကြောင့် စိတ်ညစ်နေရသည်။ ညီအစ်ကိုနှစ်ယောက်က ဒဏ်ရာတစ်ယောက်တစ်မျိုးစီပေးသွားကြတာ။
'ဒေါက် ဒေါက်'
"စီးဂဲ(လ်)!"
တံခါးခေါက်သံနှင့်အတူ အခန်းအပြင်က အဲလစ်ရဲ့ခေါ်သံထွက်လာသည်။ ဂျက်စတင် တံခါးလည်းသွားမဖွင့်၊ ပြန်လည်းမထူးဘဲ ငြိမ်နေလိုက်သည် ။
"စီးဂဲ(လ်) အပြင်သွားမှာလား! မိုးရွာတော့မယ်"
အဲလစ်ရဲ့စကားကြောင့် ခုနလေးကမှကြည်လင်ရွှင်ပြနေသော ဂျက်စတင်ရဲ့မျက်နှာဟာ ဖြေးဖြေးချည်း သုန်မှုန်သွားသည်။ အေးစက်သွားတဲ့ မျက်၀န်းတို့နဲ့အတူ လှုပ်ရှားမှုတို့ကအစ နှေးကွေးသွားတာဖြစ်သည်။
