الحب لا يموت

الجزء 1

رواية بعنوان الحب لا يموت
الكاتبة : khullo
لا احلل النشر بدون ذكر الإسم
⊙قراءة ممتعة⊙
نسمة و ميسم آجيو تغداو را كلشي مجموع على الطبلة.....نسمة : ميسم يالاهي نهبطو، ميسم : غير سبقيني انت انا جاية، نسمة : واخا غي متعطليش .
نسمة فعمرها 20 عام تقريبا، فتاة رقيقة فكامل الأنوثة ديالها، بشرتها بيضاء و عيونها فلون الزيتون مابين العسلي و الأخضر، حجبانها قهويين و مقادين من عند الله، شعرها القهوي رطب و مكريبي فايت نص ظهرها، ملامحها زوينين و لاطاي ديالها واعرة مرقيقة مغليظة، هي و ميسم توأم متقدرش تفرق بيناتهم فالشكل، ولكن الشخصية ديالهم مختلفة ، نسمة تتبغي الهدوء و السكات، حنينة بزاف و قلبها رهيف، تيعجبها النظام و تتسمع الهضرة، ولكن متتسكتش على حقها و متيعجبهاش الظلم، أما ميسم العكس ديالها تماما، متقدرش تجلس بلا مدير شي حاجة، عنيدة و عزيز عليها تجبد الصداع، و مع ذلك قلبها بيض، هي و نسمة متافقين فكلشي، توأم بمعنى الكلمة، تيديرو أي حاجة بجوج و متيخبيو على بعضياتهم والو، قراو بجوجهم و دارو نفس التخصص (الماركوتينگ_التسويق) و عندهم ورشة ديال العطور ، هبطات نسمة لقات عائلتها مجموعة على الطبلة ديال الغذاء، الأب ديالها السي حمد، جداتها لالة حورية و عمتها خديجة، خوها مراد و مرتو صفاء و سيف الدين، جرات الكرسي ديالها و جلسات بكل هدوء، من الطبع ديالها تكون مهدنة و لبقة، السي حمد : فينها ختك؟ نسمة : هايا جاية، ميسم : هانا جيت، السي حمد : منين تجمعتو يالاه نبداو، ميسم متبقايش تعطلي على الماكلة مرة أخرى منبغيهاش تعاود، ميسم (بتذمر) : أوف واخا، كانو تيتغذاو و الأب و ولادو تيتناقشو فالخدمة ديالهم، ميسم نغزات ختها برجليها و قالت ليها بشوية : فاش نساليو لحقي عليا للبيت، نسمة : لاياش تتخططي عوتاني؟ ميسم : ماشي شي حاجة خايبة، المهم حتا نطلعو و نعاود ليك، نسمة : باينة معولة على شي مصيبة عاود غير الله يستر، ميسم ضحكات و كملات ماكلتها دغيا و مشات تتجري لبيتها و لحقات عليها نسمة و سدو الباب .
نسمة : اييه! ميسم : عندي ليك واحد البلان، نسمة : ربي يستر و صافي، آش عندك؟ ميسم : عقلتي على عماد ولد عمي الحسن، عقلتي فاش خصر ليا عيد ميلادي؟ نسمة : علا انا نقدر نسا و انت فوقما تلقاي الفرصة تفكريني، ياكما ناوية ديري ليه شي حاجة عاود؟ ميسم : هاا اخليلي اللي يفهمني، نسمة : حشوما عليك و الله، واش ثلث سنين باش وقع هدشي و من داك الوقت و انت تتنتقمي منو و مخلا مدار باش تسمحي ليه و انت باقا حاقدة؟ ميسم : انت مفاهماش شنو بيناتنا، دابا اتعاونيني ولا لا؟ نسمة : راكي عارفة جوابي...قبطات ليها فيديها و هبطو بجوج بالتخبية، مشاو للمخبأ السري ديالهم اللي كان عبارة عن غرفة صغيرة وسط طاحونة القمح فمكان معارفو حتا واحد غيرهم، اكتشفوه بالصدفة فاش كانو صغار و ولا مقر تخطيطهم و المكان اللي تيتخباو فيه فاش تيديرو شي فضيحة، تافقو على الخطة و بداو التنفيذ، مشاو للمدينة و جلسو فواحد القنت تيتسناو عماد، بان ليهم جالس فواحد الكرسي تيتسنا شي واحد، ميسم : جبنا كلشي ياكي، نسمة : اه، عرفتي غير يالاه نرجعو حشومة عليك، ميسم (خنزرات فيها) : دابا واش غتعاونيني ولا لا ؟ نسمة : بففف والله حتا كيبقا فيا مسكين، ميسم : شوفي شوفي...
دارت نسمة تشوف بانت ليها واحد البنت زوينة غادة عند عماد، وصلات لعندو و سلمات عليه بالوجه و بقاو تيتمشاو فالمدينة و البنات تابعينهم بالتخبية، وصلو لواحد البلاصة مفيهاش الناس بزاف و جلسو، بقاو شي ربع ساعة تيهضرو شوية قربات منو و حطات راسها على كتفو، نسمة : شفتيه ياك شفتيه، إيوا انا غنوريه، قبل متنطق نسمة بحتا كلمة لقات أختها مشات جيهتو، وقفات عليه و قالت : عماد حبيبي توحشتك، غبرتي عليا غير نهار خليتي بلاصتك، قوليا واش هادي هي ختك اللي عاودتي ليا عليها؟
عماد بقا غير ساكت مصدوم و ديك البنت وقفات و جمعاتها معاه بتصرفيقة و مشات غضبانة، عماد (معصب) : واش انت تصطيتي ولا مالك؟ شنو هاد التبرهيش دابا علاش درتي هاكا، ميسم : باش تعلم متبقاش تلعب معايا، عماد : واش 3 سنين دازت على دكشي وانت باقا مبغيتي تنساي، ياك طلبت منك السماحة و مخليت مدرت، شنو باقا باغا مني؟ ميسم (ببرود) : انا غير تنستمتع و صافي، و انت جيتيني فالطريق معندي مندير ليك، يالاه بالسلامة دابا خصني نمشي، مشات و خلاتو تيعاير بوحدو و هي تضحك، قلبات على ختها ملقاتهاش و عرفاتها اتكون رجعات للدار، تمات راجعة بشوية، فاش قربات للدار بانت ليها نسمة جايا تتجري و مخلوعة، ميسم : نسمة مالكي شنو واقع؟ نسمة : بابا تيدابز مع مراد عاود، مشاو بالجري للدار لقاو السي حمد تيغوت على ولدو : انت مفيك فايدة، مكتصلاح لوالو، مكانش خصنا نخسرو هاد الصفقة، مراد : وا بابا الله يهديك واش انا بخاطري؟ را درت ما فجهدي باش نقنعهم ولكن هوما عندهم شروط بزاف، إذا وافقنا عليها غتمس الشركة و غنصدقو خاسرين، را ربي يجيب ما حسن