الحب لا يموت

الجزء 4

ميسم : كنت واقفة تنتسنا نوبتي باش نشري الغذا و هو يوقف عليا واحد البوكوس منوريكش، شفت فيه لقيتو تيشوف فيا و تيضحك، قرب مني و قال ليا : شفتك ضاحكة ليوم، انا مفهمتش قصدو، و هو يقوليا : رآ حنا انبقاو نتلاقاو بزاف من هنا للفوق و مشا، نسمة : وصفيه ليا، ميسم : كان زوين بزاف، صحيح و طويل باينة فيه سبورتيف، شعرو رطيطب و عويناتو تيسطيو، و عندو واحد الفيم احححح منعاودش ليك، شديت راسي بزز باش منتلاحش عليه، نسمة (ضرباتها بواحد الملف لراسها) : كوني تحشمي، ميسم : هيهيهيهي، ولكن معرفتش علاش هضر معايا يكون تيعرفني زعما؟ نسمة : ولا تكوني تخالطتي ليه معايا، ميسم : واش انت تتعرفيه؟ نسمة : واقيلا عرفتو، ميسم : و مقايلاهاش ليا، شكون هذا؟
نسمة : ديك النهار كنت جالسة حدا البحر جا جلس حدايا واحد تيشبه لهدشي اللي قلتي دابا ولكن دغيا مشا، يقدر يكون هو نفسو شكون عرف، المهم يالاهي ناكلو قبل ميبرد....سالاو الماكلة و خرجو يتساراو فالمدينة و فالليل رجعو، دازو دوك الأيام روتينية مفيها حتا جديد، حتال نهار ايجي فيه أسامة للمغرب، و طبعا أول بلاصة ايجي ليها هي دارهم اللي ملاصقة معاهم، كلشي كان فرحان إلا نسمة اللي كانت خايفة و متوثرة بزاف، رحمة كانت مع البنات فالكوزينة تيوجدو ما لذ و طاب من الأكل حيت ايجي يتعشا معاهم فالليل، ميسم و نسمة خرجو يديرو الشوبينغ، دارو حتا عياو و شراو شي حوايج و ميكاب و رجعو باش يوجدو راسهم، ميسم (تتقيس اللباسي) : شوفي هادي زوينة؟ نسمة : اه، ميسم : و هادي؟ نسمة : حتا هي، ميسم : شنو يجي مع هاد الكسوة الصباط الحمر ولا الكحل؟ نسمة : الكحل حسن، ميسم (حطات الحوايج من يديها و جلسات حدا ختها و حيدات ليها التيليفون من يديها) : انت بالك ماشي معايا، النهار كامل و انت هاكا (هزات ليها وجهها) شوفي فيا، قولي ليا شنو واقع ليك اليوم؟ واش قلقك شي واحد؟ دار ليك شي واحد شي حاجة؟ (قاست ليها جبهتها) واش مريضة فيك السخانة؟ قوليليا شنو عندك؟ نسمة : والو غير محاملاش هدشي و صافي، ميسم : شنو محاملاش؟ ياك انت اللي ديما تتكوني متحمسة فاش تيجيو عندنا الضياف ولا فاش تنمشيو لشي سهرة، نسمة : و مبغيتش أسامة يجي محاملاهش يجي، ميسم : يجي ولا ميجيش شغلو مع بابا اما انت غتلبسي لراسك ماشي للناس، نسمة : عندك الحق، ميسم : بالطبع عندي الحق، يالاه نوضي نخنارو منلبسو، نسمة : واخا
لبسات نسمة كسوة فالاخضر غامق طويلة و فيها سنسلة ذهبية رقيقة فالوسط مع جاكيت ديال الكوير قصيرة فالبني و جمعات شعرها و دارت ميكاب خفيف، أما ميسم لبسات كسوة بيضة سليم تحت الركبة شوية مع جيلي كحل و دارت حتا هي شوية المكياج، ميسم : كيجيت؟ نسمة : فنة احبيبة تتحمقي، ميسم : حتا انت جيتي غزالة ولكن متكونيش حسن مني، نسمة : ههه شنو الفرق ياك حنا توأم يعني فاش تنشوف فيك را بحالا تنشوف راسي فالمراية، ميسم : ههه عندك الحق غير ضاحكين، جاو الناس و هبطو البنات سلمو عليهم و فاش جا أسامة يسلم على نسمة بقا تيرمقها بنظرات إعجاب حيت مدة مشافهاش و هي طبعا كبرات و زيانت كتر، هضرات معاه عادي و فنفسها حقد كبير تجاهو ولكن حاولات متبينش،
تجمعو فالصالون و جلسو تيهضرو، هو فرق بيناتهم عرف شكون نسمة و شكون ميسم حيت ميسم كانت تتهضر و تتشاركهم النقاش، اما نسمة بقات غير ساكتة و ساهية فخيالها فحال ديما و أسامة مراقبها، تعشاو و هي خلاتهم طلعات لبيتها و نعسات، الغد فاقت فالصباح و خرجات باش تجري كيف العادة، بان ليها أسامة و بدلات طريقها باش متهضرش معاه، ولكن هو شعل طونوبيلتو و و مشا من نفس طريقها، وقف حداها و نزل لعندها : السلام، دارت لعندو و بقات تتشوف فيه "نهضر ولا منهضرش؟ صافي نجاوبو و نكمل طريقي" قبل متجاوبو نطق هو : نسمة لاباس عليك؟ هي : الحمد لله، المهم انا مشيت، دارت باش تكمل طريقها و هو يشدها من يدها، هو : فين غادة خلينا نهضرو، هي (بغات تنتر يدها منو ولكن هو زير عليها حتا قسحها) : وا طلق مني، هو : قوليليا متوحشتينيش؟ هي : عافاك را قسحتيني، هو : حتا تجاوبيني عاد انطلقك، هي : لا متوحشتكش، هو (زاد زير عليها) : انا بعدا توحشتك *قربها منو* زيانيتي بزاف، تنشوفك قلبي تيضرب، الليل كلو و أنا تنفكر فيك، هي : انت راك مريض سير شوف شي طبيب نفسي ولا سير داوا، هو : انت دوايا، هي : طلق عافاك را قسحتيني بزاف، هو : هانا انطلقك دابا ولكن عقلي را باقي لينا فين انتلاقاو، اتبقاي تشوفيني كل نهار، انبقاو نتغداو على نفس الطبلة و غتكوني مجبورة تهضري معايا و تسلمي عليا، و انا متأكد ايجي نهار غتبغيني فيه و غنتجمعو تحت سقف واحد، هي : وا بعد مني خليني شنو بغيتي مني؟ شنو درت ليك أنا؟ فرقني عليك، هو (طلق ليها يدها) : نتلاقاو فالليل، هي مشات تتجري و دموعها نازلين، كانت الدنيا باقا معمرات، وصلات حدا الشاطئ و جلسات فوق الرملة و بقات تتبكي بحرارة .