الحب لا يموت

الجزء 6

رجعو للدار و مراد مشا للمكتب ديالو و نسمة مشات تقلب على ميسم، كانت غتحماق بالتقلاب عليها كل واحد و فإينا بلاصة شافها، حتا كانت راجعة و هي تبان ليها جالسة تحت واحد الشجرة و عاطياها بالظهر، مشات بلا حس حتا وقفات موراها و هي تفوت، ميسم قفزات بالخلعة ولكن مضحكات ما والو، سمعتو! ميسم مضحكاتش، ميسم : خلعتيني اصحبتي، نسمة (بتعجب) : ميسم شنو واقع ليك؟ ميسم : والو غير معندي گانة ندير حتا حاجة، نسمة (جلسات حداها) : عاودي ليا شنو اللي مقلقك؟ ميسم : معرفتش مالي غير مراشقاش ليا على بنادم، نسمة : حتا أنا؟ ميسم : لا لا انت راكي حالة خاصة راكي عارفة، نسمة (حطات ليها راسها على صدرها و بقات تتلعب ليها فشعرها) : لمكان فيك متعاودي ماشي مشكل، غير راكي عارفة فوقما تحتاجيني راني معاك، أي حاجة بغيتها كيفما كانت غاتلقايني ديما فجنبك، ميسم (باست ليها يدها) : عارفة، نتمنى نبقاو حياتنا كاملة هاكا، نسمة : نبقاو، اه حقا فكرتيني، ميسم : شنو؟ نسمة : نورة غادي تجي نهار الثلاثاء، ميسم (ناضت من بلاصتها) : نورة مامات أسامة؟! نسمة : هي هاديك، ميسم : بفف آش جاية دير هنا عاود، نسمة : تابعة ولدها، ميسم : و أنت شكون قالها ليك؟ نسمة : قالهالي مراد فالصباح، ميسم : يا ربي حتا تهنينا منها و جات تسلطات علينا عاود، نسمة : حنا نعطيوها صوابها و صافي، ميسم : أنت راكي ما عارفة والو، نسمة : علاش شنو كاين؟ ميسم : والو والو، نسمة : لا كاينة شي حاجة قولي ليا، ميسم : واخا ولكن ماشي دابا، نسمة : و فوقاش؟ ميسم : قريب حتا أنت اتعرفي، نسمة : واخا، جاني الجوع، ميسم : حتا أنا، يالاهي نتغداو، نسمة : يالاه .
نهار الثلاثاء كانت الحركة كبيرة فالدار كل واحد و شنو تيدير، رحمة و البنات فالكوزينة تيوجدو، مراد و أسامة مشاو للمطار باش يجيبو نورة، السي حمد تيتسناها تجي على أحر من الجمر، و التوأم بعدما ختارو شنو يلبسو ووجدو كلشي مشاو للكوزينة تينقبو من الماكلة، عيط عليهم مراد قاليهم را هم جايين فالطريق، وجدو كلشي و فاش الباب تحل كلشي مشا يسلم عليهم، دخلات نورة هي الأولى، انوصفها ليكم بعدا، هي فعمرها 44 عام ولكن تشوفها متعطيهاش كثر من 35، زوينة شعرها قهوي و مقطعاه كاري، عينيها قهويين فاتحين و بشرتها بيضاء صافية و رشيقة و تتهتم بالمظهر ديالها بزاف و عندها مع البروتوكول كثر من القياس بحكم أنها دوزات فترة طويلة من حياتها ففرنسا، كانت لابسة سروال جينز و قميجة فالاحمر و دايرة طربوش على راسها و نظاظر كحلين، حيدات النظاظر على عينيها و سلمات على السي حمد بالوجه و هو بدورو عنقها و سلم عليها، السي حمد : أهلا أهلا لالة نورة نهار كبير هذا، نورة : ربي يخليك، السي حمد : وا طولتي الغيبة هاد المرة بقات بلاصتك، حتا البنات را توحشوك، نورة (مشات سلمات عليهم) : تبارك الله كبرو البنيات، ميسم (تتهضر مع نسمة فودنيها بشوية) : دابا هادي مالها دابا؟ نسمة : معرفتش، باقا كيفما هي مكتبدلش الله يستر، ميسم : عرفتي راني باقا هنا غا على قبل بابا أما كوراني فشي قنت عندي شلا ميدار، نسمة : دوز غير هاد الليلة و نتهناو، ميسم : غتهناي حلمي، راها ساكنة غير حدانا جوج خطوات هايا فقاع الدار، غير ولفي تبقاي تشوفيها كل نهار، نسمة : نااري جبتي ليا الإحباط بهاد الهضرة، سيف الدين : هيهو فين بقيتو را كلشي دخل، نسمة و ميسم : اه هاحنا جايين....جلسو تيتعشاو و يهضرو و طبعا موضوع الحوار كان غير على فرنسا و الأجواء ديالها و الخدمة تما، سالاو و خرجو للجردة حدا لابسين، السي حمد و نورة كانو منساجمين فالهضرة، نسمة و ميسم و مراد و مرتو صفاء و سيف كانو جالسين تيهضرو مع بعض، نسمة : أنا جاني النعاس هاني مشيت، سيف : باقي الحال بقاي معانا را غير الصيف هذا، نسمة : عييت بغيت نعس، ميسم : اتخليني بوحدي! نسمة : راكي ماشي بوحديتك، ميسم : لا ساينيني حتا أنا غادة معاك، طلعو البنات ينعسو و خلاو الآخرين تما، بدلات نسمة حوايجها و لبسات كسوة قصيرة بالسميطات حيت كان الجو سخون و تخشات ففراشها باش تنعس ولكن حلف النعاس لجاها بقات غير تتقلب ففراشها و والو، نسمة : ميسم....ميسم واش نعستي؟ بفف باينة نعسات، مشات للكوزينة شربات و فاش كانت راجعة لبيتها دخلات فشي واحد و مع كان الظلام مبانش ليها شكون، ناضت بشوية و هي تتلمس الحيط تتقلب منين تشعل الضو حتا تحطات شي يد عليها، نسمة : شكون؟ الشخص : اششش، نسمة (تتهضر بشوية باش مديرش الصداع حيت الليل و كلشي كان ناعس) : مراد واش أنت؟ حسات بديك اليد تتجرها حتا دخلاتها لواحد البيت و سمعات الساروت تيدور فالباب و تشعل الضو و هي تقفز بالخلعة، نسمة : شنو بغيتي مني؟ أسامة : بغيتك .