الحب لا يموت

الجزء 18

نواجهو؟ نقدر نواجهو، ولكن.......شنو نقوليه؟ كنت تنتوقع أنت اللي تخطبني ماشي هو؟ أنا تنبغيك أنت ماشي هو؟ لا ميمكنش، حتا انا عندي كرامتي، و هو أصلا كاعما مسوق، شفتي انا غير غبرت عليه شوية نساني، ولكن......علاش تقلق زعما؟ حنا تنتقلقو من شي واحد اللي تيهمنا، اللي تنبغيوه، كون مكنتش تنهمو ماكانش يتسوق صوا قلتها ليه صوا نن، يعني هو مهتم لأمري، ولكن حتا الأصدقاء تيتقلقو من بعضياتهم، كون رآه شافها بهاد الشكل، ولا كون هو كان بغى يسمعها مني ماشي من شي واحد آخر، ميسم : ولكن أنت تتبغيه، نسمة (قفزات) : ميسم شنو تديري هنا؟ ميسم : واش ختي تبات خارج الدار و أنا نعس مهنية؟ كنت تنقلب عليك و كانت هادي آخر بلاصة، كون ملقيتكش كون معرفت مندير، نسمة : كنت باغا نبقا بوحدي، ميسم : حتا دبا ممكن نخليك بوحدك المهم غير منين عرفتك بخير، نسمة : لا متخلينيش، أنت بوحدك اللي تتفهميني، اجي جلسي حدايا بغيت نهضر معاك، ميسم : واخا، نسمة : انا حايرة، حايرة بزاف، راسي مشتت و مشاعري مخربقين، مبقيت عارفة شنو ندير ولا باش تنحس، حتا هدشي اللي طرا باقا ممستوعباهش، ميسم : انا فاهماك، ولكن خاصك تعرفي حاجة، هادي هي الفرصة باش تأكدي واش تتبغيه ولا غير إعجاب ولا نزوة......هنا فين ايبان هو على حقيقتو، إذا كان بصح تيبغيك مغديش يخليك، ايبغي يفهم منك شنو واقع، و حتا كون كان هدشي بصح مغديش يتيق، و اهم حاجة مغديش يتخلى عليك، نسمة : عندك الحق، ولكن كيفاش أنعرف؟ ميسم : تبعي إحساسك، نسمة : وا إلا جيت نتبعو را مغديش نطفرو، انا جالسة غير بوحدي، مرة تنتقلق من دكشي اللي دار، مرة تنقول صافي هاوا بان على حقيقتو، مرة تنبكي حيت مواجهنيش و مدار والو، مرة تنقول إلى بغا يمشي الله يهنيه، والله معرفت، واش غير ولف ولا إعجاب ولا حيت معمري بغيت من قبل ولا شنو ،اففف، ميسم قلبي ضرني، مموالفاش يوقع ليا هدشي كامل، و بابا، شنو غادي نقوليه، ايقوليا علاش مقبلتيش وعلاش درتي هاد الحالة كلها، شنو نقوليه؟ معندي منقول، ميسم : آه سمعي، بقات حاجة وحدة تدور ليا فراسي من هدشي كامل، فاش مشيتي مع عمتي و مي للبيت، سمعتكم تتهضرو، قالت ليك هي شافتك معا أسامة فالليل، واش بصح؟ نسمة : آه، ميسم : كيفاش؟ نسمة : وا را هو من شحال هادي و هو تابعني لا حقا تنبغيك لاواه كدا، و أنا كنت تنرفض حيت متنحملوش متنحملووووش، اووووف، ميسم : ايوا نقوليك واحد الحاجة؟ را قبيلة علاء سمعك و انت تتهضري و غيكون فحالي فاش ماجاوبتيش تصدم، غيقول هدشي رآه بصح،نسمة : دابا كلشي تخرمز، يا ربي، راسي عيا، ميسم : المهم انا نقوليك الحل، نصلحو الأمور فالدار بعدا و من بعد بقاي متبعاه، شوفي إلا مشا حتا نساك و مبقاش مسوق ليك و ماجاش واجهك و لا بدلك بشي وحدة غير نسايه حسن ليك، حيت الواحد اللي تيبغي متيتخلاش بسهولة، و الواحد اللي مباغيكش معندك مديري بيه، انت زوينة و ضريفة عندك خدمتك و قارية و ضحوكية و بنت عائلة ألف واحد يتمناك، الحياة متتوقفش على شخص واحد، يدوز الوقت ايرجع غير من الماضي، عيشي حياتك و اهتمي براسك و قراي و تقفي و تفكري أنا ديما فجنبك....نسمة عنقاتها : حبيبتي لولاك والله معرفت كيف غنكون، و تعرفي واخا نبغي أي واحد را عمرو يوصل ليك، أنت اللولة فجميع الأحوال، أنت راكي حياتي، ميسم : وأنت كثر.....نعسو معانقين و تيتسناو الغد شنو مخبي ليهم، أما فبلاصة أخرى، كان علاء ناعس ففراشو تيقلب على النعاس و والو، منين حط راسو و هو تيتقلب، مشا صايب كاس ديال القهوة و خرج للبالكون يضربو الهوا البارد و جالس تيتأمل الأضواء فالمدينة، عقلو خدام تيفكر، سمع الصونيت فالباب، مشا حل لقاه حمزة : صحبي باقي منعستيش؟ علاء : فين هو هاد النعاس جيبو ليا، و أنت باقي فايق؟ حمزة : انا را بقا عقلي مشوش عليك قلت نجي نشوفك، علاء : دخل نهضرو لداخل....دخلو و جلسو فالفوتوي و بقاو ساكتين مدة، حمزة : امالك اصحبي معمري شفتك فهاد الحالة، ياك غير بنت تمشي وحدة يجيو 100 حسن منها ياك هادي هي هضرتك، علاء : هاد الهضرة قلتها قبل منعرفها، هاد البنت بدلات فيا بزاف، حمزة : هي تتبغيها، علاء : معرفتش، فالأول كنت حاسبها غير ختي، ولكن مع الوقت ولفتها، وليت تنبغي غير فوقاش نتلاقاها و نهضر معاها، تتعجبني بديك التلقائية ديالها و فاش تتلف ليها الهضرة و تتبدا تضحك، معرفتش، فيها شي حاجة مختلفة، معجبنيش الحال فاش مبقاتش تتسول فيا و نهار كانت طالقة شعرها ولابسة دكشي قصير معجبنيش الحال، مبغيتش شي واحد يشوفها، حسيت بيها ديالي أنا بوحدي اللي عندي الحق فيها، ولكن فاش وقع دكشي كرهتها، على الأقل كانت تعتبرني غير صديق و تجي تقوليا را غادي نتخطب من صاحبك، كنت نسرطها واخا صعيبة شوية، ولكن فاش سمعتها منو منكذبش عليك، شديت راسي بزز باش منضربوش، معرفتش علاش ولكن كرهتو، وفاش شفتها فرحانة و تضحك، قول هدشي علاش كانت غابرة هاد المدة، كانت تتوجد للخطبة ديالها مع حبيب القلب.......